Chutte puorre Marie Hibou a une vilaine suée de fraid
Chutte puorre Marie Hibou a une vilaine suée de fraid. Oulle est coumme l'boss qui passi sa journaie du prumi d'l'an au lièt et qui n'a pas sorti d'sièz li d'pis.
Mais n'v'la qui n'fait rin et d'pis qu'nous a mins dans la gazette de Mercredi que dans celle de Samedi il y aurait un p'tit but des dithes chutte cahuette qu'est Marie Hibou, n'v'chin tchiques histouethes sur chein qui s'est passè.
***
A Gouoray il y eut un miot de capucherie l'arlevée.
J'éthais jutchie dans l'pâleux de la "British" quand arrivi l'use car dans tchi s'trouvait l'rose George, l'tcherpenti de Gouoray, Philip de l'Alva, Douard et son fils d oprès l'Golf Club, Bertie l'fils du gros Philip et l'amein Auguste.
Tchique temps oprès n'v'chein quatre motors qui arrivent à lus tour et parmi les siens qui étaient d'dans j'erconnu Ted, Dolphus, l'grand Jack, Bill du Câtillon, Arthur du parcq, Sid l'vingtgni mantchi, George, son pépée, Freddy du Câtillon et coumme nous met sus les gazettes, etc., etc.
L'row starte entre Dolphus et l'gros Phlip de l'Alva, mais l'pouorre George de Cattle Street, l'sien qu'est tréjous time-keeper pour les matches de boxe en ville n'eut pas l'temps de déhaller sa montre qu'il tait happé par l'co par l'gros George l'tcherpenti. coumme l'affaithe tournait vilaine mé j'm'n'alli bè vite et j'crais que les siens du rose car en en firent de même car un p'tit temps oprès je les rencontri mais pon à Gouoray pour seur!
L's'autres allites faithe une touornée dans les autres paraisses et ieun des cars crochetti une véthute mais pour seur l'sé nos gens fites un raide buan dinèth sièz George d'en face l'marchi à paisson.
Faut vos dithe que l'grand Jack avait fait v'nir un waiteur d'la ville pour servir nos gens à Carteret mais l'waiteur failli tomber sans connaissance quand John, l'tcherpenti, li dit que ch'tait l'sien de la Sente qu'était v'neu top.
J'en sais bein d'autres et j'pourrais vos raconter pourtchi que l'bieu car fut trais fais à Gouoray village s'en pouver trouver la Missis qu'avait promins d'voter pour l'grand Jack.
Et tchi qu'est la Missis qui n'allait pon voter contre l'fils à Mérrienne qui l'y ressemblye comme deux gouttes d'ieau!
***
L'amein Piteur, de St. Martin, l'jour de l'élection, alli avec un kerr ramasser Willie de St.-Louotheins. Quand Willie apprit que ch'tait Peter qui v'nait l'ramasser y dit à sa missis: Va ly dithe que j'sis hors par train.
La Missis pensi èttout d'aver une ride pour rein et ou monti dans l'kerr à Peter. Y avait pas chein minutes qu'ils taient hors quand y rencontrites l'moter à Douard et Peter aperchu Willie faisant d'son grand comme un Monsieur. Est-che vrai l'amein Piteur?
***
Tchès que l'buanhomme Charles s'en va faithe li qu'aime bein vèr des bordées d'élection. Dépêche té, Charles, l's autres sont à canvasser raide.
J'connais ieun des électeurs qu'est tréjous rouelland et qui s'rait bein aise d'ver une autre bordée.
Chu pouorre Oliver est allright achteu, mais tout d'même tchi drôle d'ieau nous l'y servi avec les deux d'goûts de whisky. Pour seur chunna devait être un trick du Old Tom.
***
J'vos ai dit la dernièthe fais qu'une jingue de St.-Ouennais en eûtes du fun l'jour des élections.
I'l tait diez heuthes du matin quand l'moter-buss arrivi oprès l'parish Hall. L'prumi a monté fut Piteur l'chauffeur.
Ch'est George qu'éthait l'boss de l'affaithe, - mais mon pouorre George pourtchi que tu n'laisse pas craithe un miot ta moustache car en te viyant d'même j'criyais quassiment que tu étais l'ministre d'la petite Chapelle!
Charles, l'sien du Haut d'la Mathe était tout excithèt car il avait gagi un chelin avec sa Missis que dans la paraisse du bouan bergé, Mess Luce éthait pus de chent vouaies de majorité. Et il y en couotit pus de 2/- à téléphoner de Grouville pour saver tchès qu'il en tait mais j'crais que les mousse, ramassites les sous et oublierent de téléphoner.
L'grand George d'Léoville li gagni onze sous a jouer à nap.
L'jeune Jack d'la Villaise, qu'est eiun des chanteurs dans l'choir d'la petite chapelle s'dounni tout pliein d'pliaisi pour seur. J'ouï l'petit Jack du bas de l'Etacq, chu jeune corps qu'a septant huit ans s'faithe: Si y avait des êlections touos les jours j'vivrais jusqu'à chent vingt ans car n'vla qui ravidotte les vièrs coumme mé. Pour seur ch'est un luouthie d'pis qui s'fit: Quant j's'rai hors de chu monde j'espéthe qu'nou mettra un luouthie sus ma tombe!
Ch'est à St.-Jean que nos gens firent lus prumièthe halte et ma fingre, ils avaient la gorge à sec.
Caouain
Chroniques de Jersey 3/1/1920
Viyiz étout: