M'v'chein encouore une fais à baillyr de ma becque
M'v'chein encouore une fais à baillyr de ma becque car y faut que j'vos raconte pourtchi qu'il n'y eut pas de fricot sièz la grande Mary Jane, l'autre s'maine.
N'v'la qui s'passi l'Jeudi de la tchillette pour l'lecteur d'la paraisse de Grouville.
Charles avait commandé l'fricot coumme d'amor pour les siens qui faisaient la collecte. L'arlevée, l'grand Jack qui était boudé d'aver perdu s'n'élection, quand il apprins que l'gros Philip allait au dînèth y s'fit que pour seux y n'irait pon.
Son parchionni Walter, viyant chounna s'fit: D'pis que ch'est d'même et Jack n'veur pas y aller mé èttout j'n'irai pon.
L'pouorre Charles, tout paigneux, monti sus sa bike s'faisant: Tchès que je vais faithe achteu mé qu'à commandé l'frigot.
Y s'n'alli bein vite trouvé Mary Jane, d'vant qu'oulle mins les banniths à tchuire et l'y raconti ses peines et coumme y s'fit: Faites chenqu'ou voulez mais pour seux j'n'vais pon payi de ma pouchette.
N'v'la pourtchi que les collecteurs fûtes obligis d's'passer de dînèth.
Chu pouorre Jack eut bein d'l'embarras pour san papi d'nomination et pour trouver un proposant. La Poupette n'voulut rein y faithe.
Deux trais jours d'vant l'poll, nous avait clieutté un poster sus ieun des bouais d'oprès l'èscoles et sus chu poster il 'tait mins: "Faut souonner la pêle et les bachins, Marie Hibou est tchique bord par ichin.
L'bouanhomme Turmel li n'y comprenait mot et comme y s'fit a Ted, l'sien sièz qui la belle tchaise est restèe: Tchi que ch'est que chounna veur dithe, ce n'est ni angliais ni français.
Le pus bé de l'histouèthe c'est que l'bouanhomme n'sait pas lièthe!
***
Dans la paraisse à man biau cliochi l'affaithe est tréjous fort mêlèe d'pis la séthèe que la Godillerie ieut à s'abriter contre l'fraid un grand d'la paraisse fort lassé.
Y s'en va y aver du feu de satchi d'vant p'tit temps. J'en sais fort sur chein qui s'passi et pour soeur j'pourrais vos dithe pourtchi que l'jour d'l'élection Tom, les deux Frainques et un autre parchionni allites r'lever lus claviaux et qu'nou n'les vit pon au poll.
J'rest ès ècoutes dans chutte paraisse.
***
L'affaithe est dans la balance à St.-Jean et ma fingre p't'être bein qu'oprès tout d'élection il n'y aura pon.
Pour seux l'bouanhomme Charles en s'ra fort mârri mais tchi qu'nou gagne d'eprouver. N'v'la qui s'rait dépenser des sous pour rein.
J'en ai grand ergret èttout car j'pensais douonner un raide buan tip à Raymond pour la préchaine bordaie d'élection et ch'tait d'li prêter la vouaithute à paraffine de Mess Bouchéré pour porter l'ber. N'v'la qu'aurait était mus que l'kerre à Joe. Si ch'est d'même J.P. pourra mettre sans motor dans l'bel du pavillon.
Nou dit que ch'est Cléry qui converti l'Ministre l'sien qu'avait quassiment promins d'voter d'un bord et qui signi l'papi de l'autre!!
***
Achteu y faut que j'vos disse chein que nos St.-Ouennais firent. À St.-Jean y futes conviés à "La Bonde." Frainque de Lecq alli au Pavillon pour acater des clious car y voulait faithe une board pour jouer à nap mais coume s'fit l'boss du Pavillon: Ch'nest pon ichin une boutique à clious!
Les v'la hors à la Trinité iou que l'sien de la Godillerie lus offrit un spécial.
À St.-Martin, El Hassa d'mandi au foreman a Paul de les conduithe a la Crown.
Nos gens eûtes un buan lunch à l'E fine: soupe au louothi, stake, pâte de poummes crues sus un fossè a vacques, pudding, cafe-au-lait et un ptit lermin de tchique chose de pus fort pour les siens qu'éthaient faillis.
Quand nos gens arrivites à Grouville le poll venait d'être frumé. L'grand Jack lus dit d'aller bé vite à Cartert car d'lautre bord nou donnait que du thée.
À St.-Pierre l'Frainque qu'i v'nait d'être élu ermercia nos St-Ouennais d'lus félicitation mais faut craithe qu'il est court de mémouaithe ou qui criyait qu'nos gens étaient des teatotlers car y n'eût pas la civilité d'les convièth et y fallut qui paient pour lus bèthe. Et tchés qu'en fut fort marri. D'mandez à Charlot.
Piteur l'chauffeur, viyant des taxis avec de bliancs rubans s'mit a cachi saoûtre et n'v'la nos gens à la grande ferme de Vincheles iou qui y avait des neuches. Je n'sais chein que pensites les invités en viyant toute chutte djinque arriver mais Percy dit à un offici; happe ton sabre et coupe lus un miot de gâche de neuche.
Nos gens n'avaient pas d'armes a tithait mais avec un cork-screw nou fit sauter... es bouchons.
Ch'nest pas tous les jours qu'nou va a d's'elections et des neuches l'arlevée.
Pour seur nos braves St.-Ouennais s'rappeleront de chutte bordée de sport.
Caouain
Les Chroniques de Jersey 10/1/1920
Viyiz étout: