|
Moussieu Dour' Gallichan Nos dîsait, y-a un an, Dans un discour' habile: (Ch'tait à l'Hôtel-de-Ville), Mèttèz-mé Député! Et ou' vêrrèz bein vite Qu'sûs mé n'ou peut compté. A MARDI! – J'vos invite, A v'nin voté pour mé. - J'sîs haeûraeûx d'entammé Mân discour' devant vous. Eh bein! êcoutez tous: Ch'est d'tyi abominablle, Grévant et dêtestablle, D'avei laîssi allé Les soudar'! – En pâslé Vos fait v'nin en colére. Ma fé, n'ou n'a qu'd'en braire! N'ou dit qu'à-cht'heu, sûs l'Mont, Les spectre' et les démons, Nièt et jour font la danse. - J'en frémîs quand j'y pense! - Et pîs, n'ou m'dit èttou, Que l'hèrbe y creît partout; Qu'les souoris et les rats Y vont fair' lûs êbats. Ah! i' faoûdrait d'bouâns cats, Pour happé tout chonna! - L's'haoûlouoge' sont arrêtèes, Et les montre' emportèes. - Tch'est qui vos ramènena Soudar' en fortérèsse, Et la vie et l'commèrce? – - MÉ! – si j'sîs Député! Mais pour mé faoût voté!!! - Quand l'temps fut révolu, Moussieu Douar' fut êlu Un Député d'la ville. I' n'est pas imbécile, Moussieu Dour' Gallichan! Car, bigre! en meîns d'un an, Rouog' câsaque et musique, Et toute la boutique, Apportant lûs argent, R-étaient au Fort-Régent! - Honneur à Moussieu Douar', Tch'a ram'nè les soudar'!!! Bèrnabè Nov. 1905 |
Viyiz étout: