V'là don une autre êlection d'passée.
Et Moussieu Renouf a gagni par une ênorme majorité.
I' fallait s'y attendre.
Nos gens du “Labour Party” ne savent pas comment lus y prendre, i' pouvaient gagni s'ils avaient voulu.
Mais nennin, i' s'en vont chouaîsi comme candidat un p'tit chef d'orchestre, qui travaille pour les “Steam” dans san “spare time” un homme admithablye, probablyement, mais pas suffisamment connu par l'êlectorat.
Fallait mettre tchiqu'un d'autre en avant!
Tchiqu'un qui fusse connu de touos les êlecteurs, un homme populaithe, bain veu par touos les membres d's Etats, par la pus haute sociêté aussi bain comme par la classe ouvrièthe.
Et il 'tait tout inditchi ch'tis-là.
Ch'tait ni pus ni mains que l'Caouain d'la Chronique!
Oh! ou pouvez rithe si ch'est qu'ou voulez, mais ch'est d'même pourtant.
Et y en avait qui y avaient pensé.
Une petite députation etait v'nue envers mé m'en touchi tchique patholes, et sans doute, je n'vouli pas lus dithe “oui” du prumié coup, mais j'lus dis que j'étais prêt à considether la tchestion.
Chenna pathu lus faithe un divers pliaisi, et i' s'en futhent tout d'suite informer lus parti que l'Caouain était prêt à s'porter candidat.
Mais nou lus raîponni “Bah, bah! Ch'n'est pas ditèt qui nos faut!”
Et par chute raîponse-là de la part de deustrais maladrouaits, l'histouaithe politique de Jêrri est toute changie.
Si ches gens-là avaient r'chu la proposition favorablyement, John Ernon aithait peu aller s'frotter.
Je l'aithais battu par pus d'huit chents vouaix.
Personne ne peuvent lus imaginer le grand nombre d'êlecteurs qui m'ont certifié qu'ils aithaient voté pour mé si j'avais 'té candidat.
Le Chef li, sans doute aithait fait tout ch'qu'il aithait peu contre mé. Nou m'a dit que dès qu'i'ouï que l'nom du Caouain avait 'té mins en avant, i'vint comme un satan, et s'en fut trouver les Directeurs pour lus d'mander de m'ordonner d'rester trantchille.
Mais je sais bain tch'est qui l'tchaint li, ch'est tout simplyement la jalousie.
Touos les garçons dans l'imprimethie étaient pour mé, foremainne et toute la pêque, et i'm'avaient promins de mettre deux crouaix à côté d'man nom, et si vé à mettre des barres dans les reues, i' s'en allaient tous fliantchi lus d'vantcheaux bas et lus mettre en grève.
Ch'tait-là justement chein que nos messieux craignaient, et i' dirent au Chef qu'i n'taient pas disposés à s'mêler d'la chose du tout, iun d'ieux faisant la r'merque que “Tandis que l'Caouain fait san travas comme i' faut et continue à êcrithe ses articlyes comme d'habitude je n'pouvons pas nos otchuper de ses ambitions politiques. Quand nou veint à y penser che s'sait p't'être une belle chose qui veindrait Député. V'là tchi don'nait un miot d'ton ès Chroniques!”
Enfin, tréjous, le Caouain n'est pas Député.
Les “Leaders” du “Labour Party” n'en ont pas voulu. Mais i' sont v'nus à rêaliser lus bêtise, et pour tâchi d'la r'pather, ils ont idée, quand veindra l'Election Générale, à la fin de l'année tchi vaint de v'nin me d'mander d'prendre.
Mais nou n'joue pas avec le Caouain comme chenna!
Ma raîponse est toute prête “Nuthin doin”!
Caouain
1924
Viyiz étout: