Quand l'Sieur Caouain vit sus la gazette

Quand l'Sieur Caouain vit sus la gazette que j'avais dans l'idée de raconter tchiques p'tites scènes à l'entouor de l'élection pour Député à la Trinité, y s'fit que viyant que ch'tait la grande mathée n'v'la qui l'suiterait magnifique de n'pon aver à êcrithe son gniollin car il avait dans l'idée d'aller avec une p'tite djingue à la paique ès ormers.

J'pensi à mé même que p't'être que n'v'la qui valait mus viyant qu'il n'y a pon d'auberges ès Mintchiers et qu'oprès touot y rapporterai un buan fricot. Mais d'mandez ly combein qui rapportit d'ormers car quant au fricot il n'y en ieut pon en touot!

Pouor vos dithe, lorsque les siens du parti à Charles apprinrent que Moussieu l'Recteu d'la paraisse à mon biau cliochi avait promins de seconder la candidature au sien de la Commune qu'est de la Chapelle, ch'est qu'il y en ieut du d'vis et nous aurait bein voulu que Moussieu l'Doyen y mette son veto, chein qu'il n'peut pon faithe. Y faut dithe qu'il y en a hardi qui sont d'avis que du moment qu'il y a élection dans une paraisse l'Recteu n'd'vrait pon s'en mêler en touot et mé, touote bête que j'sis, j'crais qu'il y a d'la vérithèt dans dithèt dires.

Alfi avait été mins au rât et en était fort mârri mais quant il apprint qu'il s'en aller aver élection pouor député n'v'la qui fut une autre chanson.

Dans ieunne des boutiques d'la paraisse, iou qu'il tait à d'viser, tchiques jours d'vant l'élection, y s'faisait : L'jour du meeting du Comité de taxation pouor entendre les réclamations j'tais touot frais rasé pouor aller protester mais la Missis n'voulait pon que j'y aillites et quand vint un temps oulle s'fit qu'il tait trop tard! Bein seur j'en fut fort marri mais annièth j'en sis bein content d'pis qui s'en va y aver une buanne bordée d'élection. Bé seur, j'sis pouor Charlie mais l'sien qui m'offrirait une bille de chinq louis, eh bein j'n'sais pon chein qu'il en s'rait!!

Ch'est d'même que d'visait Alfi.

Quand nous alli pouor criyer Jean, du bord des Hautes Croix, l'jour de l'élection, l'oisé ch'tait envolé et nous n'pus l'amener au poll.

Ch'est que chut oisé avait été mîns en cage la séthèe de d'vant de tchique bord d'la Commune et touote la nièth il eut à baithe et à mangi tant qui voulait.

Nennin, j'n'veur rein dithe sus chein qui s'passi à la Godillerie, car j'n'crais pon la maintchi de chein qu'nous dit.

T'chest qu'en pense achteu Harold qui avait tant de becque au meeting et qui embêti l'sien tréjous jeune qui en d'vint touot nerveux quand y fit son speech?

Couomme s'faisait ieun des siens bein intéressi dans de même élection, dans des bordées de même ch'est les boustres d'p'tits ouasseurs qui embêtent l'pus.

J'pouorrais vos dithe èttout que Samedi passé y fut tchestion d'aller vais un Moussieu dans ieunne des offices d'Hill Street pour saver s'il n'fallait pon opposer l'assermentation pour Procureur, viyant que l'Moussieu élu n'pouvait pon signer couomme Procureur ses propres comptes.

J'pouorrais vos en raconter d'autres p'tites scènes à l'entouor de chutte élection, mais y faut mus que j'vos dis chein qui s'passi oprès.

Un coup que touot fut passé, nou n'perdi pon d'temps et nous alli siez Edwin pouor qui prenne pour chantgni.

Charli alli èttout siez Edwin et ly d'mandi s'il allait prendre mais Edwin ne ly dit ni oui ni non!

Claude alli à la députation l'Jeudi au sé mais j'crais qu'il avait un miot mâ au tchoeur.

Dans un temps, Fred de Rozé était d'avis d'aver une autre bordée d'élection, couote que couote, mais pouor achteu y faut mus laissi l'affaithe couomme oulle est et n'v'la pouortchi qu'Edwin s'ra élu chantgni sans opposition Lundi tchi vint, fouai de Marie Hibou.