Achteu que l'élection pouor Chantgniers dans la pus p'tite paraisse de Jerri est passée et que James est d'r'tour de son p'tit trip hors paraisse pouor l'r'mettre de son désappointement, j'crais qui faut que j'vos raconte tchiques p'tites scenes qui s'passites d'vant et oprès chutte élection.

Nennin, n'v'la qui n'm'èrgarde pon de saver si l'tcherbon est tréjous à buan marchi dans des bordées d'même ni si ch'est l'temps d'aver un reçu d'la boutique sans déshaller ses sous.

Chein que j'peut dithe chèst qu'il y avait assez d'iaue à la Fontaine pouor en épargni tchiques bouctées à la Pompe pouor èsprouver à inonder la Forêt.

Charles ly est bein content d'être v'nu top et d'un bon but èttout. Il est pu content qu'il ne l'était tchiques séthées de d'v'ant quand y perdi son temps à cherchi dans l'Parish Hall son chapé et qui s'en ralli siez ly nue tête, assez pouor attraper un fraid de cervé, chein qu'aurait été d'sa faute car pouour seur Mary Ann n'aurait pon erfuser de l'y prêter sa bonnet et pis il aurait pu mettre son mouocheux sus sa tête s'il avait voulu.

Y faut dithe que Charles était un miot gêné et ch'est qu'il canvassi raide et il tait passant minièth le Lundi d'vant qui fut d'r'tour sièz ly.

Oprès l'élection, il y eut grandes réjouissances a la fontaine qui n'tait pon à sec car il y avait de tchi pouor plaithe à touos et j'oui l'maistre s'faithe que pouor Connétable les blieus auront lus candidats si l'affaithe en vint à chunna.

D'l'autre bord il y en avait qui étaient mârris et quant vint un temps j'criyais quassiment que l'grand John s'n'allait montrer à Arthur Cliff qu'il pouorrait ly taithe sa becque mais enfin l'affaithe fut settlée sans aver à jugi qui aurait été plus fort et qui aurait ieu la pouque!

Un p'tit pus tard, en voltigeant du bord d'la grande rue, près l'trou du Vis, j'vit trais matelots dans deux semblaient bein ennièth d'lus job.

Couomme s'faisait Jim, à son parchionner Jack: A l'toué d'même, ch'est aussi pire qu'a ramonter l'baté à la Gréve et quand vint un temps y s'fit: Jack, tiens bon, il faut nos mettre le long du fossé, je n'peux pus t'nir!

Et les siens du vaisiné disent qu'est pictures à West ou encouore au théâtre nous n'pourrait vais pus risible pantomine.

J'sis bein seur que Jim l'captaine et Jack son contre maître n'oublierons pas de sitot chutte job là.

Honni soit qui mal y pense.