V'là les grands messieux angliais en distchussion quant à la proposition de creuser une tonnelle souos la Manche et nou lièt sus les gâzettes touos les ardgûments pour ou contre.
Le Caouain ne s'en va pas s'aventuther à exprimer une opinion sus la tchestion, mais je crai que che s'sa oquo bain d's année devant qu'ils arrivent à faithe autchune chose de pratique.
Mais, tandis qu'i' sont à lus décider, je voudrais suggéther que nous lus montre un exemplye et que j'en creusions iune, nous, d'ichîn à St. Malo!
Chenna ne devthait pas être bain difficile, et en s'y prenant comme i' faut et en d'mandant ès Etats pour un mio d'assistance la djob ne couôt-tait p't-être pas tant comme nou craithait bain et i' y aithait tant d'monde qu'en prendraient avantage que je sis persuadé que dans tchiques années les recettes dêpas'saient d'un biau but les frais de sa construction.
I' faudrait, sans doute, tandis qu'nous y s'sait, la faithe large assez pour conteni une doublye ligne de c'min d'fé, et pis un passage qui permettrait des 'bus comme les siennes de la J.M.T. de passer côte-à-côte.
En outre, i' faudrait un c'min pour les piétons et les cyclistes.
Pensez don, à touos les grands avantages qu'i' y aithait à r'tither d'une patheille entreprise.
D'abord chenna don'nait de l'empliai pour tchiques semaines à touos les siens qui sont sans travas.
Et pis toutes les chivethées d'robbidge que le creusage fournithait pouorraient servi pour remplyi le but de la vieille cauchie auprès du weighbridge, et i pouorrait même s'arriver que nou trouvethai une veine de bouan tcherbon ou même de l'or à une certaine profondeur.
La biâse et l'rude temps n'aithaient pus autchune terreurs pour les siens qui sont tréjou malades de la mé, comme, par exemplye, le Chef et mé.
Quand je voudrethions aller en France tout che que j'aîthions à faithe es-sait de nos rendre auprès du weighbridge et d'monter dans un 'bus qui s'sait mertchi "St. Malo," et au but d'une petite heuthe je nous trouvethions dans chute charmante ville-là sans aver passé à travers des agonies que j'êprouvons toutes les feis que j'faisons le viage.
Ergardez ettou comment qu'une tonnelle es-sait appréciée par les fermiers qui vont à St. Malo vaie les patates ou qui vont en Bretagne cherchi un ch'va. Pour cheux-chin i' n'y aithait pas la risque d'accidents en embertchant ou en débertchant lus bidès d'a bord d'un baté. Tout ch'qu'ils aithaient à faithe es'sait de monter sus l'dos à lus bérisse et s'en v'nin en Jêrri par le tuyau.
Le Secrétaithe de l'Union des Fermiers en profit-tai ettou lî, car i' pathaît qu'i' n'a jamais 'té trop bouan matelot et ch'est bain seux qu'il aimethait mus prendre une 'bus pour aller ramasser ses défouisseurs que d'aller dégôsillonner san dêjeuner par sus l'bord d'un baté tout l'long su c'min jusqu'à Binic.
A man point d'veue, une tonnelle comme chette-là ne s'sait pas complièe s'ou n'avait pas une branque qu'en sortait à mié-c'min, ch'est-à-dithe dans l'travers des Mintchiers, avec l'ouvertuthe sus la Maîtress-Ile, à côté d'la Maison des Impôts.
Comme chenna che s'sait une grande c'modité pour les pêtcheurs de là-bas.
Touos les matins i' n'aithaient qu'à apporter lus pêque de homards, d'ormers et d'chervette jusqu'à la ligne principale et mettre tout à bord du train ou dans une 'bus pour la ville.
V'là qui lus êvit'tait l'embarras de mettre lus paisson pour une semaine en nouôrriche et de not'e côté, j'aithions du paisson frais touos les jours.
Je sais bain qu'y a hardi d'mes lecteurs qui s'sont opposés à l'entreprinse car i' partagent la théorie qu'une tonnelle comme ch'la mettrait Jêrri en dangi dans l'cas d'une dgèrre.
Mais i' n'y aithait autchun dangi.
Pendant la dispute nou frumethait la tonnelle, v'là tout.
Ch'est bain simplye.
Nou mettrait un heinmie de châque but avec un cadenas d'sus et une enseigne du but d'St. Malo, "Défense de Passer," ou "Passage Interdit," ou tchiquechose comme ch'la, et d'chu but ichin, "No Thoroughfare."
V'là don l'entreprinse que je propose, et comme ch'est mé qu'a 'té l'prumi à la suggéther, j'espèthe que l's Autorités, dès que l'moment es'sa v'nu pour quémenchi les travaux. fethont l'honneur au Caouain de li d'mander de donner le prumié coup d'bigorne.
Caouain
Les Chroniques de Jersey 2/2/1929
Viyiz étout: