à Portînfé, Saint Ou.
Vendrédi au sé.
Moussieu l'Editeu,
À la fîn, don, nos v'là tout près du Jour de Noué, et j'crais, entre nous, que la grande mâjorité du monde ne s'sont pas mârris de l'vaie pâssé, car après Noué veint l'Jour de l'An, et après Noué veint le r'nouvé. Y'en a tchi prédisent que les trais preunmiers mais de l'année s'en vont être bein fraids, mais, au mains, quand veint la maîntchi d'jnavyi, nou peut s'aperchéver que les jours r'allouognent, et quant à la fraid, ch'n'est qu'une affaithe de s'abrier dans l'jour, et de s'appréchi un mio pûs près d'la bouonnefemme la niet. Par ichîn les p'tits ouâisieaux qu'menchent à s'faithe la cârre, et y'a deux rouoge-gorges tch'ont bâti lûs nid dans un grouâisillyi en drièthe d'la maison. Chais ouâisieux-là aiment à lûs mathier jeunes, et n'craient pas à la divorce, et n'en sont pas d'piéthe.
À ch'teu', Moussieu, j'fus en Ville samedi, et l'seul sujet de conversâtion ch'tait le casino, que y'en a tchi voudraient vaie êtablye sûs l'haut du Fort Régent. Y'en avait tch'i' 'taient pour, et y'en avait tch'i' 'taient contre. Comme, sans doute, ou-s-avez veu, la "Post" est raide contre, et je n'crais pas qu'nou-s-en vêrra yun en Jêrri ocquo. J'sis persuadé quand-même tch'il en veindra yun tchique jour.
I' faut que j'vos diche que y'a bein d's années, quand j'avais dans les djais-huit ans, j'fus pour tchiques jours à Saint Malo, et une séthée je m'trouvis au casino à Paramé. Comme un bouon Méthodiste je n'avais pas besoin d'être là, mais, Moussieu, dans l'couothant d'ma longue vie, j'n'ai jamais rencontré un homme, ou même une femme, tchi n'a pas par bordée oublié ses principes. Ch'n'est pas natuthel.
À Paramé j'me mîns à gagni sûs les p'tits ch'vaux, et j'fis bein sûs le neunmétho chînq, un gris bidet. Assise aupid d'mé y'avait une jolie hardelle tchi m'invitit à pâsser la niet dans san louogement, tout près. Si j'avais yeu pûs d'sous dans ma pouchette, jé n'voudrais pas dithe qué j'éthais r'fûsé, comme j'fis, car, n'ayant pas tout-à-fait perdu la tête, j'savais que si j'y'allais j'en sortithais pliumér comme un picot d'Noué. Ch'est pourtchi j'm'êcappis, mais si j'avais bu un p'tit vêrre ou deux de pûs au casino ch'est prèsque certain que j'm'en s'sais r'penti. I' faut dithe que quant ès courses ichîn en Jêrri j'ai tréjous mînt mes sous sûs un gris bidet, mais j'ai tréjous perdu, et il est êvident que j'n'éthais pas la chance que j'eus chutte fameuse séthée à Paramé.
Dans l's Etats les nouvieaux membres n'ont pas ocquo dit grand'chose, mais, Moussieu, n'ou n'pouvait pas s'y attendre. Y'en a parmi yeux pûs d'yun tchi n's'en va poas être content d'rester la bouoche freunmée fort pûs longtemps, mais quand ils éthont tchiquechose à dithe, i' voudront s'faithe seux que ch'n'est pas du gniolin. Après tout, ch'n'est qu'du bouon-sens.
Nos exporteurs d'bétail et surtout l'Sieur Perrédès, le président d'la Société Rouoyale, sont ocquo à envier des vaques, des g'niches et des boeux ichîn et là, et, quant à mé, j'dis tant pûs, tant mûs. Y'a bein d's années que j'n'en ai pas vendu, sinon au bouochi à des prix riditchules, mais j'ai une g'niche d'un an dans l'êtabl'ye tchi pouôrrait faithe bein au "show" swa Trais Pâraisses au mais d'mai si j'peux li dréchit la coue et li amendé san piéchot. La Merrienne, tchi n'est pas inouothante, dit qu'oulle est seuze de v'nîn preunmièthe dans sa clâsse si n'y a qu'une entré, mais j'vis ocquo en bouonne espéthance. Une fais tch'i' paiethont les juges, y'étha p't'être moyen, pour bein tch'i' ne d'mandent pas trop pour lus services.
À ch'teu', Moussieu, j'n'ai rain d'autre à vous dithe, mais i' faut que j'vos souahaitons, la Merrienne et mé, un Bouon Noué et tout ch'qu y'a d'miyeu pour l'année tchi veint.
Ph'lip
Evening Post 23/12/1963
Viyiz étout: