A ch't heu qué j'nos trouvons du rang des anciens j'avons lé privilège d'aller par les 'bus' pour rein, et j'avons la chance où'est qué j'demeuthons d'aver un sèrvice raisonnabl'ye.
Ch'est rare qué j'prannons not' moto por aller en Ville au jour d'aniet. J'trouvons quand j'allons sus la 'bus' est coumme si j'taîmes à faithe eune prom'nade.
Nou peut vaie chein qué les gens ont dans lus gardîns, et y'a l'temps d'examinner les difféthentes propriêtés en route. V'la tchi m'ravie dé vaie combein d'bâtisses dé fèrme ont 'té touônnés en louages. Si nou fait lé même viage gentiment rédguliéthement, nou peut vaie châque fais qu'nou pâsse combein dé progrès qu'a 'té fait dépis la dreine fais, sus autcheune construction qu'i' y'ait en allant. J'avons dgetté les patates craître souos l'plastic ch't' année; ch'est érmèrquabl'ye combein qu'il'en font dans huit jours.
Assez qué j'veinge d'eune fanmil'ye dé fèrmiers, j'sis tréjours întérêssie dé vaie et dé compather lé système modèrne dé fèrmer au siein dé y'a vîngt ou trente ans.
Duthant la pliant'tie d'patates j'mé pliaîsais à conter lé nombre dé gens en travas dans les clios. La pus grand' dgaîngue que j'ai veu jusqu'à ch't heu est 33! Où est qu'est l'temps qué j'éthaîmes 'té, man péthe, mes deux fréthes, un français et mé à plianter? Chein qu'éthait prîns trais jours à faithe dans chu temps-là sé trouve fait dans trais heuthes au jour d'aniet.
Bein seux, allant par la 'bus' veurt dithe qu'i n' y'a pas tout l'suffat dé cachi parmi tout l'traffi, ni l'embarras dé trouver eune pliaiche pour stâtionner lé moto. J'avons c'menchi à connaître les gens qué d'eune règl'ye vont sus la même 'bus' coumme nous et v'la tchi m'fait un divèrs pliaîsi d'entendre convèrser en Jèrriais!
Combein qu'i y'a dé gens coumme nous qui vont en Ville et n'vaient pas eune âme qu'i connaîssent a tchi pâler! Tout l'monde pathaîssent être en hâte et en prêsse au jour d'aniet.
Mais à ch't heu j'èrgardons tchi 'bus' prendre pour aller et v'nîn, pour l'amour d'aver l'temps pour eune tàssée d'thé, et tchiquefais du dîner en Ville, et j'trouvons qué d' y'aller par la 'bus' nos a fait eune telle difféthence qué s'ou-s-avez un pèrmîns pour y'aller pour rein coumme nous j'espéthe qu'ous îthez car ch'est si pliaîsant et beinmains lâssant qué d'condithe un moto.
UT
Viyiz étout: