Les Pages Jèrriaises

Le Budget et l'fameux tunnel



à Portinfé,
Saint Ou.


Moussieu l'Editeu,

I' s'en est pâssé de pûs d'une sorte chutte semaine, mais j'crais que je f'thais mûs de qu'menchi avec le Budget. Comme de couôtume, la position financièthe a pûs belle mine que nou-s-éthait peut craithe au mais d'novembre, mais quant à mé, i' m'semblye que la seule raison chutte fais est que j'avons hardi d'sous en main parsque j'n'avons pas payi nos dettes. Actuellement j'sommes du mauvais bord par une grôsse somme. Ch'est tout bein bon de prouver par des chiffres que y'a tout plyien dans l'côffre-fort, mais quand nou veint à r'garder d'dans nou peut l'trouver viède, et des créanciers d'mandant lûs sous. Enfin, Moussieu, ch'n'est pas à un inouothant comme mé de prétendre tch'i' sait mûs que notre Chancellyi et, don, je m'arrête là.

Chein tchi not intérêsse, la Merrienne et mé, ch'est preumièthement la décision au sujet du fameux tunnel, épis la grande mâjorité d'nos tchultivateurs tchi sont contre un "marketing board". J'avons liut, la bouonne-femme et mé, chu rapport d'la réunion à Saint Louothains, et si y'avait d's hommes là tchi d'vaient être hardi désappointés ch'tait Cyril le Mèrquand et l'Député Tomes. Nou n'peut pas sinon dithe tch'i' fitent d'lûs mûs pour persuader l'Assembliée que l'tunnel était nécessaithe et que les chinq chents milles louis s'saient bein dépensés, mais i' n'réussitent pas à convaincre la mâjorité. Le Merrienne dit que la preumié fais qu'ou s'en va rencontrer l'Connêtablye, ou s'en va l'embréchi, quand che s'sait dans l'mitan d'la Rue d'Drièthe.

Le Député L'Cornu s'trouvit dans une position tch'éthait peut être bein difficile, mais, dans m'n opinion, i' s'en dêshallit comme i' d'vait faithe, car il avait promins ès électeurs tch'il obéithait tréjous à lûs mandat, et un homme, Député ou autrement, dait t'nin à sa pathole. Quant au Sieur Tomes, il a résigné du comité, et, souos les circonstances, je n'voudrais pas dithe que j'éthais fait autrement.

À ch'teu', pour le "marketing board". Le grand nombre de tchultivateurs tchi donnîtent lûs vouaix contre 'tait p't'être une surprinse, car ch'tait une preuve que y'en avait hardi tch'avaient changi d'opinion dépis l'année pâssée. Les fermiers, à ch'teu', se trouv'thont pûs libres de dispôser d'lûs produits comme i' voudront, et nou-s-espèthe tch'i' n'ont pas fait une mêprinse. Chein tchi lûs faut à ch'teu' ch'est du temps caud et doux, et pas d'chais fichus obgelées tchi veinnent si souvent ruiner les pûs bieaux prospects. Y'en a tchi disent qu'une année sans obgelée est rârement une bouonne année, mais ch'est des gens tchi n'ont jamais souffert. Chein qu'est seux et certain, et ch'n'est pas la preumié fais que je l'dis, ch'est que pour les heûsives y'étha tréjous un bouon prix en Angliétêrre, malgré la compétition d'autres pays. Dans un monde ouèsque prèsque tout change, la bouonne vielle Royale ne change pas.

Mais i' n'y étha pas tant de nouvelles patates comme de couôtume, car nou-s-entend que dans un certain district tch'en craissait bein des vrégies, i' n'y en a pas yunne ch't' année. Sachant étout que y'a hardi d'fermiers tch'ont abandonné lé commerce des bêtes, nou se d'mande si à ch'teu' l'Ile s'en va dépendre seulement sûs l'tourisme pour sa prospéthité. La Merrienne, tchi n'sait pas tchèsqu'ou fait par bordée, m'a dit qu'ou s'en va en Ville yun d'chais jours pour accater tchiquechose pour l'êté, car ou s'fait seuze que j'allons aver des grandes chaleurs, et ou veur être à la mode. Ou pâsle de tchique vêtement tchi s'appèle un "bikini" sans saver exactement chein qu'ch'est. Sav'ous, Moussieu, chein qu'ch'est que chu "bikini"? Est'che convenablye pour une femme de s'n âge, ou est'che seulement pour les jeunes filles? J'en ai pâslé à man fils, lé Bram, mais i' s'est mint à rithe et a d'mandé si sa mèthe veur se trouver à l'Asile dans ses vièrs jours. Chonna m'a fait peux, et la preumié fais que ma bouonnefemme voudra s'en aller à la grève à maintchi nue je téléphôn'nait au Connêtablye pour tâchi de l'empêchi de faithe un spectaclye d'li-même. Il a souvent 'té dit, Moussieu, tch'il en affôle à tout âge, mais j'éthais grand r'gret de vaie ma Merrienne enfreumée dans la grande maison à St. Sauveux.

Le problême du trafic n'amende pas : au contraithe il est pièthe que jamais. À Saint Louothains nou-s-avait pâslé d'installer des feux de cirtchulation au Bel Royal, mais la "Post" et bein d'autres sont contre, car i' considèthent que ch'n'est pas là le r'miède. Ch'là s'peut, Moussieu, mais le fait est que n'y a pas de r'miède tandis que y'a tant de trafic sûs nos routes. Par chein qu'nou-s-en comprend, y'en étha ocquo pûs dans tchique temps, car y'étha un grand nombre de visiteurs à cachi des autos sûs des routes tch'i' n'connaissent pas, et ouèsque y'a des mauvais dêtours toutes les chent verges, ou mains.

Nos v'là tout près du Vendredi Saint et du Lundi d'Pâques. J'avions fait plusieurs bouonnes résolutions, la bouonnefemme et mé, mais j'crains hardi que la plupart ont 'té oubliées ou r'minses à l'année tchi veint.

À bétôt pour chutte semaine, Moussieu.

Ph'lip
Evening Post 9/4/1963

 

Viyiz étout:

 

Les Pages Jèrriaises