Les Pages Jèrriaises

La Nouvelle Année

San Antonio, Texas,
U.S.A.
Lé 4 janvyi, 1969.

Moussieu l'Rédacteu,

N'èrvéla eune aut' année passée qué j'n'èrvèrrons janmais! Touos nouos anmîns nouos l'avaient souhaitée bouanne quand san preunmié jour fut né. Ch'est chein tch'i' s'fait touos l's ans!m En fîn d'compte, oulle a 'té bouanne pour bein des pièches et probabliément pénibl'ye pour d'autres. Ch'est la vie! L's uns prospèthent et l's aut' ont d'la peine à gabather, mais i' nouos faut touos vivre en espéthance car nou n'gangne rein d'être au m'thespé, et j'espèthe qué chutte nouvelle année d'mil neu chent souoxante-neu s'en va êt' bouanne pour touos vos lecteurs en Jèrri et à l'êtrangi.

Ou' s'en va sans doute apporter des changements un mio partout l'monde, la nouvelle année. En Jèrri, la tonnelle souos l'Mont d'La Ville s'en va probabliément êt' finnie. La mé s'en va dév'nîn souche dé bouaisson pour touos l's habitants - Jèrriais, touristes et autres - sans les soûler, et, si assez d'gens veulent contribuer l'montant suggéthé par L's Êtats, La Tour dé La Rocco es'sa r'bâtie. J'pense bein qu'ou' n'est pon vielle assez pour êt' considéthée monument historique et dingne dé prêsèrvâtion par L's Êtats, et qu'ch'est pour ch'la tch'i' faut faithe les gens contribuer. Et pis, étout, touos les membres dé La Chambre Législative n'ont pon 'té nés à St. Ouën. Ch't honneu-là n'est pon accordé à tout l'monde! Nou n'peut don pon s'attendre qué La Rocco aie l'mème întéthêt pour ieux comme pour les St. Ouënnais!

Eune aut' chose qué nou peut s'attendre à vaie en Jèrri est l'agrandissement d'L'Aérodrôme à St. Pièrre pour pouver acc'moder l's avions à rêaction. Faut s'péther qu'tchitchun s'en va înventer tchique tracas pour avaler l'brit d'ches avions-là à la pliaiche dé l'laîssi dêfoncer l's ouothelles au monde!

J'viyais dans ieune des gâzettes du mais d'novembre (les cheinnes dé dézembre s'en vont c'menchi à v'nîn dans tchique temps chu mais!) tch'i' s'en va faller r'dêpenser un tas d'hèrpîns pour agrandi d's êcoles et en bâti d'neuves. V'la tchi veurt dithe qué la nouvieauté craît pus vite qué l's êcoles! Espéthons qu'ou' s'sa comme les êfants Peldgé et qu'oulle amend'da à craître, la nouvieauté, et qu'ou' f'tha honneu ès belles êcoles bâties par l'ambition du Sénateu Jean L'Mèrquand et les sou des contribuabl'yes! Mais est-che tch'i' n'est pon beintôt temps d'y porter r'miède, à chutte situation-là? Ichîn, en Améthique, i' sont à êprouver à molli l'nombre d'êfants à la pliaiche dé bâti pus d'êcoles! Il' ont peux qu'l'av'nîn s'en va nouos apporter eune situation tch'il' appellent "explosion d'population", et i' veulent apprendre ès gens mathiés à êl'ver deux ou trais êfants au grand pus à la pliaiche d'aver d'grand' fanmiles. Point d'veue d'réligion, v'la tch'i' n'pliaît pon à tout l'monde, et mème lé Pape s'est considéthé oblyigi d'en dithe san p'tit but, mais j'sommes à penser pus liain que l'but du nez ichîn, et l'viage à la leune a prouvé qu'nou peut aller bein pus liain dans l'espace, et l'idée est tch'i' y'etha p't êt' la probabilité d'trouver tchique aut' plianète sus tchi nou pouorra transporter l'surplius d'explosion d'population! I' dîsent qué l'homme peut faithe autcheune chose tch'i' peut s'înmaginner. Tchi danmage qué jé n'savais pon ch'là quand j'tais mousse!

Eune aut' chose tch'est cèrtaine d'êt' faite en Jèrri ch't année est la bâtithie d'un tas d'aut' maiethons, et l'êlaîsissement d'routes. Si l'affaithe continnue, tout l'Île es'sa eune ville et i' n'y étha pus d'campangnards. I' s'sont touos villais ou "Town Pats," comme l's anciens soulaient l's appeler quand j'tais mousse! Enfîn, espéthons qué L's Êtats n's'en vont pon pèrmettre la bâtitchie d'trop sèrres. Si y'a tchiquechose tchi d'sahonte la campangne, ch'est des sèrres, et y'en a dêjà bein trop par les c'mîns! En mème temps, j'veurs bein admettre qué l'pouorre dgiâtre d'fèrmyi a fort' à faithe. Il êprouve à siéthe les compôts et craître dé tout, mais l'clŷinmat est souvent contre li, et quand il a eune bouanne récolte lé conmèrçant dans l'marchi lî donne siez sou pour eune caboche et vend un ch'lîn ou mème pus! Ch'n'est pon ravissant tch'i' pense à craître des récoltes ou lédgeunmes souos l'abri d'eune sèrre. Malheutheusement les sèrres né sont pon des monuments artistiques, et i' n'embellissent pon la campagne!

En Améthique, j'avons grand bésoin d'espéthance p't êt' acouo pus qu'bein des pays viyant qu'nouos jannes hommes sont en dangi d'la mort sus l'camp d'batâle. J'espéthons don qu'1969 nouos apportétha la paix. Jé c'menchons bein. J'avons êlu un consèrvateur comme Président pour la preunmié fais dans huit ans. Sa tâche n'est pon aîsie. Heutheusement tch'il est janne et en plieine vidgeu d'vie et d'santé.

Quant à mé, j'sis r'connaîssant d'êt' acouo du rang des vivants et qué L'Bouan Dgieu m'a donné l'privilège dé r'vaie eune nouvelle année naître pour la septante-septième fais! Et j'attends fête dé r'vaie touos m's anmîns en Jèrri l'mais tchi veint!

George d'La Forge

 

Viyiz étout:

 

Les Pages Jèrriaises