Pas d'niollin, nos gens! faut s'moustré quedainne, ch't'année. Faut capuchi du, ferme et longtemps! "Strike the iron while it's 'ot"; que j'soulaime dithe dans l'temps de m'n'apprentissage au bieau mêstchi dé tchi j'fut yun des ornements. N'y'a rin ditét coumme le travas! que j'disais hier a Laizé, tandi que j'tais a feummé eunne pipe d'man long sus l'sofa, et qu'oul 'tait a niérpiounné l'grée: l'travas, ma Laizé, vé tu, est ieunne des miyeu choses que l'Bouan Djeu ait inventées - sustout pour les femmes!
Eh don, j'vos en souhaite! S'ou me d'mandez tchès qu'est ieunne de mes pus grandes satisfactions sus chutte terre de minzéthe - ch'est ma femme qui la noumme coumme cheunna; car, pour ch'qu'est d'mé, j'm'y pliait assez bin.
Mais j'vos dithai en toute franchise que si y'a eunne chose qui m'met du baume au tcheu, ch'est de r'gardé les autres gens sué sus lus djob. Quand j'vé nos mécaniciens, les bras r-troussés et touos huileurs, a souognyi lus machine, l's'imprimeurs a joué des mains dans lus casses a lettres, les mousses a couore chin-et-là avec des fielles de papi, l'Editeu a faithe de grandes engambées d'un but a l'autre pour vaie qu'tout va bin: et la machine qui ronflye, et tout l'monde qui sue; et mé, jutchi sus l'haut d'un step a crié hourras! tout l'monde (ch'est ma poste quand y'a du presse) dèsbrouolle, mes ésfants! capuche, garçons! dèspêchous, mes soudards! avanchis, tas d'photomes! Quand j'les vé, tout en travas, en bras de c'mînze, qui d'puthent de sueu, les mains néthes, et la bouoche qui lus teurt de fatigue! J'monte oquo pus haut sus man step, et j'crie oquo pus fort: Go et, mi boys! Drive er elong! Rip er en bédaches! Bust er chaudiéthe to morciaux!
Et quand la dernié gazette est sortie d'souos la meule, je d'sends de d'sus m'n'èstchelle, y'un des mousses la r'met a sa plieche, et nou s'en va tous s'couochi, bin lassés.
Pourtchi que j'vos conte cheun'chin? Ch'est pour vos montré coumme nou pour vos encouothaji a en faithe autant pour vous mêmes. Ch'est pour s'moustre au "Morning News" et que v'la tchi vos serve d'exempl'ye pour l'année Djixneu' chents quatorze! Travaillyis du, ferme et longtemps, et .... Laizé, a tchi j'vains d'liéthe cheun'chin pretend qui n'y'a pas trejous d'travas pour les siens qu'en cherchent. Eh bin! Tchès qu'empèche! Que les siens qui n'travâllent pon, faiche coumme mé. Qui monte sus un 'step' pour faithe s'moustré l's'autres!
PITEUR PAIN
Morning News 31/12/1913
Viyiz étout: