Moussieu l'Editeu,
Chein qu'j'ai à vos dithe agniet, en qu'menchant, ch'est qu'j'ai yeu eune bein triste s'maine. Vendredi pâssé tout allait bein, mais Sam'di matin ch'tait une autre affaithe, car, comme ou l'savez, y faisait une fraid d'tchan, et du moment qu'ou s'rêvillyit la Merrienne tait si roupilleuse que je n'pouvais pas l'y pliaithe.
J'pensais au mains qu'ou s'n'allait d'vallé après avé bu la tâsse du tais que j'y'avais apporté, mais je m'trompais hardi, car ou n'bouogit pas du liet jusqu'à dans les chinq heuthes de l'arlevée, quand oulle appathut dans la tchuisine toute enfliubée, voulant savé ouèsque j'avais tait tout l'jour et avais-je idée d'la laissi crevée d'faim.
Pour vos dithe, Moussieu, tout étant trantchille, et les bêtes soignées, j'avais sauté jusqu'à Piémont pour vais les courses, mais j'éthais fait mûs d'resté aupi d'man feu, car quand je r'vint après la traisième course j'étais g'lé et pour agvé tous les bidets qu'j'avais chouaisi n'valaient pas quatre sous. Ch'estentchi ch'tait comme si j'avais fliantchi trais pièches d'êtchu au vent.
Bein seux j'n'en dis rain à la Merrienne, et ou n'se doutit pas qu'j'avais sorti, mais quand vint l'sé et que j'me mint |à êtèrnué une doûzaine de fais par minute, ou s'doutit que j'avais tait d'hors pour une pôse, et quand vint un temps j'avouotit qu'j'avais tait à Piémont pour tchiques minutes. Pour une bouonne dém'ieuthe ou m'en chantit de pûs d'une sorte, et je crai véthitablyement qu'chonna l'y fit du bein. Les femmes sont d'même, Moussieu.
Y'en a tch'y disent, qu'un mio d'né n'fait pas d'ma, car ou tue un tâs d'inséctes dans la têrre, mais quant à mé, la né et la g'lée tuent autres choses étout, et n'y'a pas un entrepreneur tch'y n'en profite pas. Pour les jeunes gens, bel et bon, mais pour les viers v'là tchi n'va pas. Quand en nonante-six j'allais touos les siers à la Mathe au Seigneur, faithe des slides et tchais sûs man dos une vingtaine de fais, ch'tait magnifique, mais j'frisonne dans touos mes membres quand j'y pense ach'teu, et la Merrienne est ocquo pièthe.
Enfin, ne v'la l'temps tchi s'radouochie et bétôt j'pouorrais m'mettre à fouai man mio d'gardin, que j'ai idée d'plianté d'vant la fin du mais, si la Providence me préserve et que j'n'attrape pas trop d'ma dans l'dos. Et la Merrienne qu'menche à oublié touos ses maux et sa mauvaise humeur, car oulle a dêjà mint une poule à coué, et la p'tite bandine a produit trais oeux, comme pour se fichi d'la fraid. Dans l'êtablye je n's'y pas à court de fain, et y'a une bouonne pile de réchines souos la tchérquethie. Hier je consultit l'almanach des Chroniques de l'année passée, et j'caltchulit qu'les jours avaient dêjà élouognit de sept ou huit minutes. La Merrienne a d'la peine à l'craithe, mais oulle avoue que l'papi dit la véthité et qu'nou peut s'fiér d'sûs.
"Chein tchi faut ach'teu, Moussieu, et je l'dis à la bouonnefemme, ch'est du couathage. Y faut oublié toutes les minsèthes de l'année pâssée, et allé en avant pliens d'confiance que tout îtha mûs en chinquante-chinq. Ch'est là l'vrai plian. Mé, j'envîsage une raide saison d'patates, pûs d'vente pour les bêtes, et des Juges au show des Trais Pâraisses tch'y vêrront pûs cliait qu'l'année pâssée, quand ma g'niche r'nouv'lée fut minse bétôt au mauvais but d'la ligne. J'éspèthe étout d'vais notre rât baissi un mio, mais sûs chu point-là, Merrienne châque la tête, et dit que ch'est pûs probablye que nou l'vêrra hauchi, que ch'ne s'sa pas la faute du Connêtablye et qu'ou n'voudrait pas sa djobbe avec toutes les dêpenses que y'a au jour d'agniet.
Enfîn, nou vêrra, mais dans l'entretemps, bouonnes gens, n'oubliez pas que chein tchi nos faut à tous ch'est d'la confiance, du couothage et la férme éspethance que notre p'tit Jêrri est bein lien d'avé veu ses miyeu temps.
Ph'lip
8/1/1955
Viyiz étout: