Les Pages Jèrriaises

Chanson des grands tchésus

Bouannes gens, j'voudrais vos amusé
Soumefaite le plaisir d'mécouté,
Car sans être trop gnôleux
J'ai tréjous 'tait un mio rimeux.

Nevchin revenin le printemps
Bravons la plis, et l'mauvais temps;
Yn faut pas nos tnin drièze lus
Allons vite a nos grands tchésus.

Pierre et Jean, prennais vos bêques,
Pour gobilionné les bliaites.
Et tai Robert, prend tan fouet
Et soigne de cachi ban drait.

J'menvais prendre les manchots
Et gouvernai a propos.
Rondis mé bain les foyèze
San mêtre la terre comme en nèze.

Car la plis, la nai, la g'lais,
A mis la terre sy boursouflais,
Que sy oul est trop pilaquis
De récolte y nian esa mie.

Garçons dites a la hardelle
De nos apporté des merveilles,
D'la gâche, du cidre, et du rom,
Car chest chonna qui nouris l'homme.

Faut vivre sous bouanne espérance;
L'annais passais j'nume pas grand chance.
Mais l'hiver a tait rude et frait
Et j'crait qu'jesons un beau mais de Mai.

Ne mettons pas la terre trop fine
V'la qui la raclaque j'mimagine.
Pourvu qu'nou y mettes du fumi
Et d'bouanne sémenche; Ne vla tout dit.

Car j'ai oui dize a mes anchêtres,
Ya chinquante ans, comme je v'nons d'naître
Que bain ezait ou mal ezait
Quand y ya d'la graisse, y veint du blait.

Tout comme je dit que bain arangi
A le r'gardé y fait plaisi.
Hallais vote blanchait mes garçons
Q'la sueut vos en parte du front.

Faut travailli, bèze et mangi,
A ces sé jéson du plaisi.
Seyons tréjous de bouanne humeur,
Prêst a soulagi le malheur.

Ainchin étant de bouans garçons
Ou craîtrais comme des champignons.
Condizons tréjous comme des hommes,
Et jamais n'malpâlais de personne.

Et bétôt quand je ne sai pus
Et quon vos r'trouvezais tchésus,
Ou r'pensrais a chu vier papa
Qui vos a contait tout chonna.

Mes garçons autfez les tchésus
Des nos ayeux n'tait pas connus.
Et quand nou culbutait la terre
Pour des panais ou pommes de terre;

Fallait avait un floquet d'homme
Et bèze un tas de jus de pommes.
Et chacun avait san frico,
Ainchin chacun faisait sans lot.

Sans doute la terre netait pas chièze,
Car j'ai oui dize a ma grand mèze
Q'nou pouvait avait de sans temps,
Une vrégis de terre pour 12 francs.

Acheteu faut en payi 4 louis
Et quicqun en paye jusqua 6.
Pour mé si lafèze continue
Je men vais mêtre la clait sous lus.

Autfez jezais fait feu dans lieau,
Je batais tréjous mes fiers caux.
Et jetais tréjous l'prumi l'veit
Et soignez man faim: d'beaux soleit.

Ainchin j'ai gagni deux strais sou
Et je men vais tâchi d'vivre atou.
Et q'un chacun faiche comme mé
Quand nou vin viers faut s'erposé

J.D.V.

 

la Grand' Tchéthue

 

Viyiz étout:

 

Les Pages Jèrriaises