Les Pages Jèrriaises

La Milice

Il entri l'aut'e jour à la boutique iun d'nos viers amins de la campagne que je n'avions pas veu pour au mains djaix-huit mais.

Ch'tait Maît'e Fraînque Sparabille, le cordonnyi, iun de nos pus anciens clients, un homme que j'aimons tréjous bain à vaie, à cause de sa conversation intêressante sus les choses du temps passé.

Il a une mémouaithe extraordinaithe et rain n'li fait pus d'pliaisi que de s'trouver avec deustrais auditeurs qui veulent bain êcouter un récit des choses qui s'passaient en Jêrri dans san jeune temps.

Opprès aver êchangi tchique patholes avec li sus l'temps fraid qu'il a fait à ches dernyi, distchutté les difféthents candidats probablyes pour Juge et oui tch'est qu'il avait à dithe sus a Connaîtablie de St. Ou, je lî d'mandîmes, "Eh bain, Maîte Fraînque, et tch'est qu'ou criyiz que nos Messieux s'en vont faithe par rapport à la Milice?"

"Ah!" I' s'êcriyi, "n'm'en pâlez pas! Je n'ai pas d'patienche avec nos autorité! Je n'sais pas si ch'est la faute au Gouvernement angliais ou bain à nos Etats, mais pourtchi qu'i' faut continuellement faithe des changements dans chute malheutheuse Milice? Oulle 'tait bain comme oulle 'tait quand j'en faisais partie. Ch'tait des soudards qui valaient la peine dans chu temps-là, des gaillards qu'avaient d'l'appathence dans les uniformes.

You qu'i' y a acheteu un seul régiment à compathaître au nôtre quand j'avions nos rouoges câsaques et nos blianches braies avec notre "shako" ou chapé à saluette avec une rouoge et blianche balle de pitchie sus le d'vant!

Et j'étions c'mandés par des officiers jerriais pur-sang, dépis le colonel jusqu'au pus jeune lieutenant, des messieux pour lestchels j'aithions passé à travers le feu, surtout si' n'taient pas trop "dry-pocket" et nos baîllaient tchiquechose pour aver un boua dîner d'compangnie le jour de la p'tite erveue.

Quand nous allait dans les Bianches Banques tither au bianc le Sergent des Couleurs amenait trejous sa vainne dans tchi qu'i' y avait une pan'née ou deux de gâches à vrèt et un boua bathi d'biéthe, et quand nous avait des sergents qui savaient tch'est que ch'tait d'vivre, i' y avait ettou deustrais boutelles de "John Kuyper" de muchis dans un pannyi souos l'banc.

I'y avait tréjous un dîner le jour de la "P'tite Erveu," et nous engageait des cârrosses à quatre chevaux de siez Pellow, Fauvel, Livermore ou Gregory, et nous allait faithe le tou d'l'île dévant dîner.

Quand i'y avait une bouanne hôtel dans sa propre pâraisse, ch'tait là que nous dînait généralement, ch'tait pus prudent, car quand ch'tait hors pâraisse, tchiqu'uns d'nos hommes, opprès aver bain dîné, aithaient 'té enclins à s'enhermeler avec la police, et pis i y avait un autre avantage ettou, i' n'y avait pas si liain à bouler les chivièthes quand i' fallait que j'fussions erportés siez-nous par chu moyen-là.

La saison militaithe finissait touos l's ans par la grand'r'veue sus la grève dans la baie d'la ville à l'occasion du jour de naissance de la Reine Victoria et pus tard du Rouai Edouard, et ch'tait oquo une grand' bordée, mais les maudits St. Ouennais gâtirent tout chenna la bordée qu'i' r'fusithent de marchi, viyant que par une fausses amoeuvre du c'mandant I' lus trouvithent êloignis d'la "band" et une autre compagnie était à lus pliaiche ordinaithe.

Ch'tait un pliaisi que d'être soudard dans ches temps-là, et il aithait valu bain mus laissi tout comme il 'tait.

Mais nennîn! Un tout-se-mêle de Gouverneux s'imagini que nos Officiers et nos Sergents étaient un tas d'achocres et i' persuadi l'Gouvernement à les rempliaichi par des Irlandais et d's Angliais.

Tchique temps opprès I' nos hallithent nos braies et nos firent en mettre des naithes et à la pliaiche de not'e biau chapé i' nos baillithent une petite "scotch" avec des ribans quivos cluittaient au co quand i' tchiyait d'la plyie.

Selon mé, not's Milice n'a fait que de déteriorer dépis chu temps là. Ils l'ont changie et rachangi quand bouan lus sembliait et à la fîn le Gouvernement a trouvé qu'ou couôtait trop et qu'ou n'servait d'rain à rain.

Ch'est pourtchi il a r'fusé de contribuer à s'n entretchain et v'là don l'île de Jêrri sans autchune défense et à la merci de n'importe tchil aventuthi qui veurt venin nos prendre.

Mais je n'pouvons pas rester d'même!

Je m'en vais m'en otchuper, mé!

Je comprends que les Connaîtablyes s'en vont réuni lus constituants, et quand la rêunion se tchaindra dans not's pâraisse je m'y trouvethai et je f'thai la proposition que nous organisi une Milice comme dans man temps. Que nou nos r'sonne not'e "shako" not's rouoge casaque et nos bianches braies, que nous ait au mains la mine de soudards et que nous ne r'semblye pas à des conducteurs de la J.M.T.

Je n'demandons pas d'être payès, sapresti!

Que nos Officiers et nos Sergents nos donnent des rafraîchissements quand j'ithons tither, et un bouan fricot le jour de la r'veue, comme le temps passé!

Et pis ou verrez si y en aitha des volonataithes.

Tout vyi que j'sis je s'sais l'prumi à m'enrôler!

Je n'ai pas roublié à manier une "Snider!" "Hordeur Hum!" "Support Hum!"

Et l'bouonhomme se mins à faithe l'exercice avec san parapluie.

"Rite habout turn!" One-two-three-four."

Opprès qu'il eut arpenté l'office treis ou quatre feis i' se r'calmi un mio.

Je li d'mandîmes si ch'est qu'i' criyait réelement, prenant en considéthation les armements modernes, qu'une milice aithait autchune valeur défensive.

"Peut-être bain qu'nennin," i' nos raîponni, "mais i' y a un point pus important. Ch'est l'êffet moral que v'là qu'aithait sus l's autres puissances! Si' n'y a pas de Milice en Jêrri, la Ligue des Nations n'a autchune raison-d'être et i' f'thaient tout aussi bain de la dissoudre, car i' n'y a que l'existence d'une Milice Jerriaises qui peut garanti que les décisions de la Ligue es'sont respectées et obéies!"

La d'sus je li dîmes que je craignaîmes bain que jusqu'achteu, chu point-là avait êcappé ès Membres d's Etats.

Et Maît's Fraînque raiponni, J'allons les êcliaithi! Not'e Député est là!"

Caouain
Les Chroniques de Jersey 19/1/1929

 

Viyiz étout:

 

Les Pages Jèrriaises