Saint André est l'patron d'l'Êcosse et, ouaithe qu'sa fête né sait pon hardi célébrée dans chu pays-là, l's Êcossais à l'êtrangi aiment bein mèrtchi la journée.
I'n'sembl'ye pon qu'i' y'ait un grand nombre dé couôteunmes liées auve la journée - mais nou n'étha janmais d'problième à trouver eune extchûthe pouor baithe eune santé auve eune vèrrée d'whisky!
Nou dit qu'les gens en Êcosse du temps pâssé soulaient chasser les lapîns et les lièvres à la Saint André, mais auve la nouvelle louai contre la chasse pâssée par lé Parlément Êcossais, chutte tradition est probabliément morte!
Saint André est l'patron d'Avranches étout, tch'est la ville jeunm'lée auve la Pâraîsse dé St. Hélyi. Chutte ville avait eune grande cathédrale dé Saint André mênommée “la Belle Andrine” tchi fut dêtruite auprès la Révolution Française.
Ieune des pâraîsses en Dgèrnésy est St. André - ou Saint Andri, coumme nou dit en Dgèrnésiais. Les cheins d'St. André - les St. Andrillais en Dgèrnésiais - sont mênommés “les croinchaons” (les craînchons). Pouortchi? St. André est la seule pâraîsse sans un but d'côte et oulle est don tréjous la dreine à êt' mentionnée dans eune liste des pâraîsses!
Lé saint s'otchupe des pêtcheurs et paîssonièrs - v'là tchi n'est dgéthe eune surprînse viyant qu'i' 'tait pêtcheux li-même sus la Mé d'Galilée avant d'êt' lé preunmyi app'lé par lé Seigneu.
S'ous allez mangi du boudîn Êcossais ou un fricot d'paîsson ou eune êtchuivée d'lapîn, j'souhaitons eune bouonne Saint André à nos anmîns Êcossais, à nos couôsîns d'la Grand' Tèrre à Avranches, ès pêtcheurs, ès paîssonnièrs - et finnalement ès “croinchaons”!
Viyiz étout: