“À la Saint George, bouonhoumme sème tes orges, car à la Saint Mar il est trop tard” - né v'là un vièr diton Jèrriais. Et av'-ous s'mé vos orges, bouonnes gens? Sénon, i' vaudrait adréchi eune priéthe à St. George tchi 'tait, li, fèrmyi avant d'êt' soudard et pis tortuthé et exétchuté souos l'Empéreur Romain Dioclétien au c'menchement du quatrième siècl'ye.
Et, bouonnes gens, s'ous avez des dragons siez vous à vos vengi, à roussi lé lînge à la lîngne auve lé feu d'lus nâsil'yes dans l'gardîn ou dans l'bel, ou à enfuntchi l's appartéments, i' faut vos adréchi à Saint George étout, car il est eune manniéthe dé Rentokil parmi les saints quand nou-s'est disteurbé par des fichus dragons.
Lé pouôrre Saint George dait êt' bein embarrassé, car auve touos l's Angliais dé tchi qu'il est patron, nou n'éthait dgéthe creu qu'il éthait un moment d'êpaîngne. Il est iun des patrons du Portûnga étout - sans pâler d'la Lithuanie, la Catalongne, la Georgie, Moscou et d'aut's pliaiches.
I' souongne les j'valièrs et les soudards, et ch'n'est pon don eune surprînse qué Shakespeare - tchi mouothit et tchi fut né, à chein qu'nou crait, à la Saint George - êcrivit dans sa pièche “L'Rouai Henri Chînq” (en Angliais, bein seu): “Criez Dgieu pouor Henri, l'Angliétèrre et Saint George!”
Pus paisibliément, Saint George est l'patron des fèrmièrs, mais pouor tchique raîson i' n'sembl'ye pon s'întérêssi trop dans l'cricket, ni dans l'football, ni dans la biéthe nitout.
En tout cas, j'souhaitons eune bouonne Saint George à touos nos anmîns Angliais et Portûndgais - et ès cheins tch'ont s'mé lus orges!
Viyiz étout: