Ayant chanté "L'amour du vièr temps" au Nouvel An, les gens en généra oublient Robèrt Burns pouor lé restant d'l'année – mais pouor d's Êcossais l'tou du monde lus rînmeux nâtional est ramémouaithé dans toutes les saîsons et sustout la Séthée d'Burns, tch'est l'vîngt-chîn d'Janvyi – l'annivèrsaithe du poète.
Burns fut né en Alloway en mil sept chents chînquante-neuf, lé fis d'pouôrres fèrmièrs. Mais lé mousse fut bein êdutchi et i' s'mînt à êcrithe des vèrs en Scots sus chein tch'il aimait l'mus – lé whisky et les hardelles.
D'pis deux siècl'yes l's Êcossais ont mèrtchi la Séthée d'Burns auve un bouôn souper. Ch'est cèrtain qu'nou-s'y bait du whisky mais tout dépend du parti s'i' y'a assez d'hardelles...
Lé boudîn Êcossais est oblyigatouaithe – mais les végétariens n'sont pon exclius au jour d'aniet pa'ce qué nou peut en acater sans viande pouor les cheins tchi veulent êviter la machacréthie d'annimaux. Les cheins tch'aim'thaient mus êviter la mang'gie d'boudîns ont mains d'chance car la pathade du boudîn et l'èrcitâtion d'la poésie d'Burns "Adrèche au boudîn" sont des couôteunmes essentielles ès soupers.
Ch'est bein d'vaie coumme tchi qu'nos anmîns Calédonniens fêtent lus auteu nâtional. L's Angliais n'font rein d'même pouor Shakespeare, ni les Français nitout pouor Molière. Et nous les Jèrriais? Vaut-i' lanchi eune Séthée d'Wace auve d's èrcitâtions du Roman de Rou et eune "Adrèche à la mèrvelle"? Véthe, des mots en w sont d'tchi rare en Jèrriais, mais nou trouve Wace et whisky rêunnis dans l'grand Dictionnaithe!
Bouôn appétit à touos nos anmîns Êcossais et ès anmîns d'Êcôsse!
Geraint Jennings
Viyiz étout: