La Fête dé Saint Ouën est célébrée châque année lé vîngt-quat' d'Août. Normalement lé jour dé fête pouor un Saint est l'annivèrsaithe du jour dé sa mort ou dé san entèrrement. Dans l'cas dé Saint Ouën lé 24 d'Août est l'annivèrsaithe dé sa naissance. I' fut né en siêx chents neuf à Saucy, près dé Soissons.
Pouor bein d's années i' travaillit comme Officyi dans la Cour des Rouais Chlotar II et Dagobèrt I. Pus tard i' fondit l'Abbaye de Rebais et fut appointé prêtre, et en siêx chents quarante-tch'ieune Archêvêque dé la Cathédrale à Rouen, nommée après li. I' gângnit eune ênorme réputâtion auve ses êfforts pouor am'ner tous dans san diocèse à la fouai chrêtchienne. Saint Ouën mouothit en siêx chents huiptante-quatre à Clichy, près d'Paris.
Quand l'églyise dans la pâraisse du nord-vouêt dé Jèrri fut originnellement consacrée i' y'eut un problème. I' n'y avait pas d'èrlique dans l'autel. Après tchique temps un p'tit morcé d'un os dé Saint Ouën fut acaté, sans doute à un prix fo, d'eune églyise en Nouormandie et la consécrâtion eut lieu. La date n'est pas cèrtaine mais lé quat' dé Septembre mil chent trente est mentionné dans lé record du “Livre Noir” à Coutanches. Et sus la liste des Recteurs d'la pâraisse lé preunmyi nommé appathaît en mil chent chînquante-six, un Moussieu Etienne.
Avaû l's années l'églyise a 'té agrandie et modèrnisée pouor sèrvi les fidèles. Dé nos jours au vîngt-tch'ieunième siècl'ye l'églyise dé Saint Ouën continnue à prêchi la bouonne nouvelle dé Jésû-Christ auve l'aîgue d'la technologie. Saint Ouën s'sait fi dé saver qué s'n églyise en Jèrri est vivante et active.
Brian Vibert
Viyiz étout: