|
Le jour de St. Swithin si ch'est qu'i' tchai d'la pl'yie Nou s'sa seux qu'quarante jours ensuivant s'sont muolli'yis |
Nouvelle Chronique de Jersey 16/7/1902
Lé tchînze dé Juilet est mèrtchi coumme la Saint Swithin, et tout l'monde connaît la crianche entouor lé temps, mais tchi qu'i' 'tait, Saint Swithin? Bein, i' 'tait un êvêque dé Winchester (dans l'diocèse dé tchi l's Îles d'la Manche lus trouvent d'pis la R'formâtion).
Duthant sa vie, i' sembl'ye qu'i' n'fît qu'un mithacl'ye: eune vielle femme avait laîssi tchaie eune pann'lée d'oeufs. L'saint fît l'sîngne d'la Crouaix au d'ssus d's oeufs crutchis et il' èrd'vîntent entchièrs.
Mais Saint Swithin est mus connu pouor chein tch'arrivit auprès sa mort en l'an 862. Humbliément, l'saint avait c'mandé qu'san corps dév'thait êt' entèrré dans l'chînm'tchiéthe d'la cathédrale - pas dans eune pliaiche d'hounneu en d'dans - à seule fîn qu'sa tombe pûsse êt' arroûsée par la plyie du ciel.
Mais tchiques années pus tard, nou dêcidit d'transféther l'corps du saint dans la cathédrale pouor la vénéthâtion des pélérîns. Lé corps fut r'mué lé tchînze dé Juilet, mais i' c'menchit à tchaie d'la plyie et la plyie continnuit pouor quarante jours.
Nou prînt chenna pouor un sîngne du ciel qu'lé saint n'aimit pon qu'nou-s'eûsse èrmué san corps, et don l'saint fut èrentèrré dans san chînm'tchiéthe préféthé.
Né v'là coumme tchi qu'la légende entouor la Saint Swithin appathut - mais i' sembl'ye qu'lé saint changit d'avis pus tard, pa'ce qué san corps fut èrmué dans la cathédrale où'est i' 'tait vénéthé jusqu'à la R'formâtion quand sa sépultuthe fut buchie et ses r'liques fliantchis hors.
J'viyons don qu'la R'formâtion tchi nos r'lyit auve Winchester r'fusait la tradition d'Saint Swithin.
Mais la crianche entouor la Saint Swithin et les quarante jours dé plyie ou solé a bein continnué, même si l's expèrts du temps n'y trouvent autcheune fiabilité!
2002
Viyiz étout: