Y'avait eune p'tite ruette tch'allait d'la maîson et tchèrpent'tie à Maît' Fred de Caën à La Vielle Fontaine, maîson d'anchêtres dé la fanmil'ye du défunt Juge Francis Vibert Le Feuvre.

Chutte pétite ruette-là 'tait hantée par un cadâvre couochi sus l'fôssé la niet.

La m'mèe du défunt Juge, née Esther Le Bliancq (décédée en 1914 à l'âge dé pus d'huiptante ans), soulait nouos raconter qué sa grand'méthe et eune aut' bouannefemme èrvénaient par la ruette, auprès mîniet d'eune niet bein sombre, pour lus en aller à La Vielle Fontaine, où'est qu'la grand'méthe Le Feuvre démeuthait.

En pâssant l'long du fôssé où'est qu'lé cadâvre soulait s'couochi, l'aut' bouannefemme dît à la grand'méthe Le Feuvre: "Bon! J'avais tréjous ouï tch'i' y'avait un cadâvre couochi sus l'fôssé, mais chutte niet i' y'en a deux!"

I' s'adonnait qu'un farceux du vaîthinné, voulant êffriter l'monde, s'était couochi sus l'fôssé et s'était couvèrt auve un lîncheu, mais quand i' ouit la bouannefemme dithe qué nou viyait deux cadâvres là, i' fut si êpeûthé li-même tch'il en eut les sangs touânnés et en mouothit!

Pour nous, mousses, i' n'y avait autcheune doute dé l'existence du nièr tchian tchi hantait L'Carrefour des Chînq Vèrges, et bein des gens vouos asseûthaient tch'il' avait ouï sa chaîne traîner.

Eune séthée, man fréthe Fraînque eut eune fichue peux en pâssant par là. Ch'tait ieune dé ches sombres séthées-là qu'nou n'viyait pon la main d'vant sé. Il avait à peine travèrsé l'carrefour quand i' ouit tchiquechose sauter driéthe li et du tapotage dé fé dans la route. I' happit la pathe ava la route dans la direction d'siez nous. Il allait à feu d'galop, mais tant pus vite tch'i' couothait, tant pus d'brit i' ouiyait driéthe li.

Arrivé quâsi à la tchèrpent'tie au Sieur de Caën il' tait à but d'vent et n'en pouvait pus. I' pensit qué ch'tait la fîn pour li et s'arrêtit l'long du fôssé et s'touânnit d'bord, quâsi au m'sespé d'sa vie. Heûtheûsement, sa vie n'tait pon en dangi. Lé nièr tchian avait touânné en vaque! Ch'tait eune géniche tchi s'était abanonnée et tchi l'avait sieu. San lian et l'paîsson, tapotant dans la route, 'tait vrainment la chaîne traînante!

George d'la Forge
(Dé l'articl'ye "L'temps pâssé" JEP 20/7/1979)