Né v'chin l'alibêle
Des gens du grand sang,
Chorchièrs et tchéthauds
Et tou lus pouver!

Erfrain
Dé la Couochette ès Nonnes
Jusqu'ès Trais Rocques
Et dans l'Pûlé
Jfaîsons nouot' rigodon
Touos les vendrédis!

I' y'a l'blianc chorchyi,
Et pis la néthe méthe,
A tout nièr onguent
Dé verjus au dgiâbl'ye -

Sans pâler des cheins
Tchi vouos laîssent bein couorrre,
Eune raide achie d'pouèrs,
Véthe, à vouos vengi.

L'ourteu et l'tchi-cô,
Et l'tchian du Bouôlay,
Atout ses chaînes traînantes
A êpouvanter!

Quant ès p'tits faîtchieaux -
N'en ayiz pon d'peux,
Mêfi'ous des r'vénants
Et du bélengi!

Erfrain
Dé La Fontaine ès Mittes
Jusqu'à Rocque Bèr
Et La Hougue Bie,
Touos les vendrédis!
J'faisons nouot' rigodon!

Et lé gros nièr cat
Du Carrefour à Chendres -
La vielle cauminne hantée
D'La Craque au Ouéthou!

La Ruette à la Vioge,
La Valette au Meurtre
Et Lé Betchet ès Cats -
J'hantons tout chenna!

Frank Le Maistre
(Jersey, 1953).