États-Unis d'Améthique,
Lé jour de Pâques, 1961.
L'articl'ye sus les r'vénants d'aut' fais dans l'Bulletîn neunmétho dgiex-neuf mé rappelle ma jannesse siez Papa à La Forge, ès Landes à St. Ou. Y'avait un tas dé r'vénants par les c'mîns dans chu temps-là. Quand nou sortait au sé et tch'i' n'faîthait pon cliai d'leune, y'avait des temps qu'nou n'viyait pon la main d'vant sé. M'n oncl'ye Charles avait eune ronde lantèrne tch'avait des f'nêtres de corne à la pliaiche dé vèrre. Ch'tait eune chandelle tchi donnait la lueu, et ou n'montrait pon fort dé veue, mais ou li'aidgait à trouver lé c'mîn entre Lé Mênage ès Feuvres (au but d'La Rue d'La D'vise) et La Forge quand i' v'nait pâsser la séthée siez nous. I' m'sembl'ye qué j'lé vai acouo entrer dans la tchuîsinne atout ses braies d'bâthîn à pliatchet, sa c'mînse dé molleton et san chapé d'feûtre amathé en d'ssous d'san moton atout un but d'ficelle!
Quand Papa voulait aller d'tchique bord au sé, et qu'la niet 'tait sombre, il empruntait chutte lantèrne-là et j'allais auve li. I' portait la lantèrne à corne d'eune main et j'lé t'nais par l'aut' main. Auve la faillie lueu d'la lantèrne, l's ombres avaient tréjous un air fantastique pour mé tch'étais mousse, et tch'avais ouï tant d'histouaithes entouor des r'vénants et des balles-à-leunettes. Les vièrs bouais sus les fôssés l'long d'la route, tch'avaient 'té êpîlés touos l's ans, avaient l'air grotesque étout, et pathaîssaient r'semblier à des faûtômes, sustout quand il' 'taient difformes. Quand y'avait des creux dans les têtes des cheins tch'étaient à maîntchi pouôrris, v'là tchi donnait l'împression d'un giant atout des grands ièrs! Dé temps en temps nou ouiyait qu'des blianches femmes hantaient ichîn et là.
Lé pâssage par cèrtaines routes 'tait craintif, viyant tch'il' avaient la r'nommée d'êt' hantées. La Route des Vînchelez en' 'tait ieune. Ou pâssait entre les Mannièrs dé Vînchelez d'Haut et dé Vînchelez d'Bas et les branques des bouais faîsaient eune "voûte" en d'ssus d'la route et nou n'y viyait lèrme. Cèrtaines routes, étout, avaient des noms tragiques, comme la Rue à la Pendue. Nou ouiyait l's anciens mentionner l'nom en convèrsâtion et étant d'âge imaginatif, i' sembliait ès mousses tch'i' pouvaient vaie des pendus la niet quand i' pâssaient souos les bouais auprès du Carrefour ioù qu'Mait' Tanminne Lé Cornu d'meuthait.
Y'avait eune pétite ruette - oulle est acouo là - tch'allait d'la maison et tchèrpent'tie à Maît' Fred dé Caen à La Vielle Fontaine, maison d'anchêtres dé la fanmile du défunt Juge Francis Vibert Lé Feuvre, Chutte pétite ruette-là 'tait hantée par un cadâvre couochi sus l'fôssé la niet. La m'mèe du défunt Juge, née Esthèr Lé Bliancq (décédée en 1914 à l'âge dé pus d'huiptante ans), soulait nouos raconter qué sa grand'méthe et eune aut' bouannefemme èrvénaient par la ruette à mîniet d'eune niet bein sombre pour s'en aller à La Vielle Fontaine, où-est qu'la grand'méthe Lé Feuvre démeuthait. En pâssant l'long du fôssé où-est qué l'cadàvre soulait s'couochi, l'aut' bouannefemme dit à la grand'méthe Lé Feuvre "Bon! J'avais tréjous ouï qu'y'avait un cadâvre couochi sus l'fôssé, mais chutte niet yen a DEUX!" I' s'adonnait qu'un farceux du vaîsinné, voulant faithe peux au monde, s'était couochi sus l'fôssé et s'était couvèrt auve un lincheu, mais quand i' ouït la bouannefemme dithe qué nou viyait deux cadâvres là, i' fut si épeùthé li-mème tch'il en eut les sangs touannés et en mouothit
Pour nous, mousses, i' n'y avait autcheune doute dé l'existence du nièr tchian tchi hantait l'Carrefour des Chinq Vèrges, et bein des gens vouos asseûthaient tch'il' avaient ouï sa chaîne traîner. Eune séthée, man fréthe Fraînque eut eune fichue peux en pâssant par là. Ch'tait ieune dé ches sombres séthées-là qu'nou n'viyait pon la main d'vant sé. Il avait à peine travèrsé l'carrefour quand i' ouït tchiquechose sauter driéthe li et du tapotage dé fé dans la route. I' happit la pathe ava la route dans la direction d'siez nous. Il allait à feu d'galop, mais tant pus vite tch'i' couothait, tant pus d'brit i' ouïyait driéthe li. Arrivé quâsi à la tchérpent'tie au Sieur dé Caen il 'tait à but d'vent et n'en pouvait pus. I' pensit qué ch'tait la fîn pour li et i' s'arrêtit l'long du fôssé et s'touannit d'bord, quâsi au m'sespé d'sa vie. Heûtheusement, sa vie n'tait pon en dangi. Lé nièr tchian avait touanné en vaque! Ch'tait eune géniche tchi s'était abanonnée et tchi l'avait suivi. San lian et l'paisson, tapotant dans la route, 'tait vrainment la chaîne traînante !
Les Vînchelez 'taient l'hant dé pus d'eune sorte d'èrvénants. La hèrse d'la Rue des Geonnais mé ramémouaithe qu'un côffre était tchiquefais veu dans l'mitan d'la route, entre les deux Mannièrs, mais y'avait eune raison pour chutte crianche-là tchi n'tait pon surnaturelle. M'n oncl'ye Ouinn'teur Lé Feuvre (mort en Dgérnésy en 1955 à l'âge dé huiptante-trais) m'avait souvent raconté l'originne dé chu hant-là. Étant mousse, il avait apprîns sa vocation d'tchèrpentchi dans la tchèrpent'tie à Mess Lé Mèrquand, Fraînque, à La Fontaine - et i' faîsaient des côffres pour lé Sieur Philippe Lé Feuvre (péthe dudit défunt Juge Francis Vibert Lé Feuvre), tch'était entrépranneux d'entèrrements. Dans chu temps-là, l's apprentis d'la tchèrpent'tie avaient à délivrer les côffres au domicile du décédé, et i' fallait l'faithe la niet viyant qu'les gens n'taient pon fort en peine dé vaie des côffres vièdes portés par les c'mîns d'jour.
Eune séthée, m'n oncl'ye et un aut' apprenti lus en allaient porter un côffre à eune maison d'tchique bord du côté d'Liouville, I' portaient l'côffre à l'êpaule et décidîdrent d'aller par Vînchelez. Arrivés à côté des Mannièrs, i' ouiyaient tchitch'un v'nîn ava la route et i' mîndrent lé côffre bas en travêrs d'la route et lus muchîdrent souos l'arche à l'entrée du gardîn du Mangni d'Bas. M'n oncl'ye m'a tréjous affirmé tch'i' n'en n'tait pon d'avis li-même dé faithe d'ité, mais qu'san compangnon mînt san but du côffre bas et tch'i' n'pouvait pon l'porter tout seu, et tch'i' fut oblyigi d'laîssi couôrre et d'faithe comme l'autre et s'muchi. L'homme tchi d'scendait la route tchulbutit sus l'côffre, et pis i' satchit eune alleunmette pour vaie l'encombrément. Quand i' s'apèrchut tch'est qué ch'tait, v'là tchi li fit tellement peux tch'i' s'mînt à couôrre comme un fo, et lé v'là hors quédaine ava la route.
Sans doute tch'i' racontit ses aventuthes, car l'histouaithe d'un côffre sé trouvant dans l'mitan d'la route la niet à Vînchelez 'tait bein connue ès Landes quand j'tais mousse. M'n oncl'ye et l'aut' apprenti eûdrent l'avis dé n'lus vanter pon d'êt' les r'vénants coupabl'yes!
Y'avait d's avèrtis d'toutes les sortes étout dans l'temps passé. Quand y'avait un mort dans la maison, ch'est seux qu'tchitchun dans la fanmile avait ieu un avérti. Maman L'Feuvre pâssit l'pas siez m'n oncl'ye Ouinn'teur en Dgèrnésy. Oulle avait dêpâssé ses huiptante ans, et oulle avait gardé l'liet pour tchiques sémaines. Lé matîn du jour dé sa mort m'n oncl'ye dit à ma tante : "Jé n'crai pon que M'mèe pâs'sa l'jour - ou pathait bein faillie!" Ch'tait dans l'hivé, et comme i' r'vénait d'san travas à la niet chutte séthée-là, à sa grand' surprînse i' rencontrit Maman dans la route, habilyie dans san dînmanche et bein embonn'tée, mais atout sa capote. Il' arrêtîdrent touos les deux et m'n oncl'ye lî dit "Bon! T'èrvélo par les c'mîns! Tu dév'thais aver pus d'avis qué d'sorti dans la fraid si vite auprès êt' malade au liet!" A san grand êtonnement, ou s'èrmînt en marche sans l'rêpondre. I' trouvit ch'la bein drôle, et en entrant à la maison i' racontit l'affaithe à ma tante et ou li dit "Tu n'es pon bein dans ta tête, don - ta m'mèe est si faillie qu'ou n'peut même pon l'ver l'bras, sans pâler d'aller s'prom'ner!" I' n'la criyait presque pon et ramontit la montée deux pas à la fais pour aller dans sa chambre. Sans doute oulle 'tait là, sus san liet d'mort et sans connaissance comme i' l'avait veue l'matîn. Ou n'pâssit pon la niet, et l'lendemain la pouôrre vielle maman 'tait au suaithe.
M'n oncl'ye avait ieu un avèrti quand Papa mouothit étout. Chutte fais-là ch'tait un vaissé tch'avait tchée dé d'ssus l'ais du drécheux dans sa tchuîsinne, sans cause appathente, et tch'avait d'pichi en mille brédelles dans l'aithe. Mais, comme lé dit l'Rédacteu dans s'n articl'ye entouor les r'vénants, y'avait d's avèrtis et des crianches dé toutes les sortes, et y'a acouo des gens tch'ont des crianches dé nos jours. Quand j'tais en Jèrri en 1956 un portrait dêpendit tout seu eune niet dans la maison d'un ami dreinement décédé. Quand je l'dis à eune cèrtaine pèrsonne ou m'dit "Y'étha eune aut' mort dans chutte maison-là dévant longtemps! " Comme j' s'adonnit, un membre dé la même fanmile, mais tchi né d'meuthait pon dans la même maison, mouothit dans l'couothant de trais ou quat' mais. Viyant tch'il 'tait âgi, nou n'pouôrrait p't êt' pon craithe qué l'dépendage du portrait 'tait vrainment un avèrti - ouaithe qué l's anciens n'en éthaient pon douté! Tch'est tchi sait - les crianches ieux-mêmes mouôrront p't êt' dé lus belle mort étout auve lé pâssage du temps!
Ouaithe qué j'ayons tout pliein d'douteurs parmi les jannes d'aniet au sujet des vielles crianches, j'peux affirmer qué ma m'mèe m'a dêcompté et r'dgéthi d's orians à la veue pus d'eune fais auve sa bague dé neuches quand j'tais mousse, et j'ai connu bein d'aut' mousses tch'ont pèrdu lus véthues à la vielle manniéthe. Comme nouos l'dit "Françot" à la page 118 du preunmié voleunme dé ches bulletîns, y'avait bein des manniéthes à les cachi. Man fréthe Fraînque en avait sus les mains. Un jour il 'tait à visiter nouot' tante d'Aubert à La Mouaie à St. Brélade quand i' rencontrit l'bouanhomme Jacques Gavey, dêjà dans sa huiptantaine à ch't êpoque-là. Lé bouanhomme dit à Fraînque: "Combein d'véthues qu'tu'as sus tes mains, man garçon?" Frainque les contit et lî dit combein. "Eh bein, j'm'en vais té l's acater!" li dit l'bouanhomme Jacques en lî donnant un sou. Tchiques jours pus tard, Fraînque avait pèrdu ses véthues et i' n'sont janmais r'vénues! Eune chose est bein cèrtaine: Ch'tait des r'dgéthîsons d'orians et d'véthues à bouan marchi. Ch'n'est pon êtonnant qu'les docteurs d'à ch't heu' n'y craient pon !
G. F. Le Feuvre
Viyiz étout: