|
Ch'tait dans ches temps ichîn l'année passée Qué not' mémée passit eune arlevée Siez not' grand' tante tchi d'meuthe ès Augerez; Car la tante Lise voulait lî môtrer Des choses dé valeur qu'oulle avait deshallé Et qué d'la famille oulle avait héthité. Coumme not' pépée n'tait pon embarassé Il offrit d'aller la porter, Mémée rêponnit qu'l'exercise lî f'thait Du bein, coumme lé docteu y'avisait, Car à ches drain oulle avait prîns du paids Tchi pouorrait bein san tchoeu affecter. Quand ou sortit oulle 'tait heutheuse et gaie En pensant à la bouanne arlevée Qué seux et certain ensembl'ye i' pas'saient; Car la vielle tante la bein'v'nue lî fait, Et d'eune chose et l'autre sans doute pâl'laient. I' bûtent ensembl'yes pour les ravigoter Un vèrre dé vîn auve d'la galette à vraic Et fûtent à haut les trésors èrgarder: Des châles en dentelle, des robes i' y'avait D'la porcélaine travers tchi nou viyait Qu'nos anchêtres en Chine avaient acatté. Mais mémée fut compliètement extasiée Quand toute l'argent'tie fut dêhallée! Sa valeur ou' n'pouvait estimmer Et dit à sa tante tchi fallait l'asseûther Dé peux qué v'là tchi s'sait volé! Tante Lise lî dit dé n'pas s'gêner Qué pour £5,000 tout 'tait asseûthé. Quand la tante ses trésors eut sèrré A mémée eune bague en diamant donné, I' d'valites à bas pour béthe du thée. Mémée n'avait don pas rèalisé Qué d'aûssi bouonne heuthe la niét tchèrrait, Ou' s' èrmint en route toute à fait décidée Dé n'perdre pas d'temps pour siez l'yi r'arriver, Ou marchit à grand' pas avau l'Pont au Bré, Dans la Verte Rue bouan rond ou filait, Et là v'là don ès Huthiaux arriver. Sus la Grand' Route les vouétuthes allaient Par lus lumiéthe oulle 'tait êgaluée, Et décidit par la p'tite route aller, La vielle route du Coin du temps passé Qué par les prisonnièrs nettie avait 'té. Ou' passit en d'vant d'siez l'Chent'nyi L'Mottée Et d'scendit l'p'tit c'mîn tout cou'ert dé bouais, Tout en marchant à sa bague ou pensait Et ès trésors qué sa tante avait, Quand subitement i' sembliait qu'ou ouiyait Un pas bein seux tchi la suivait; Ou' s'arrêtit pour vaie tch'est qué ch'tait, Dans les ténebres rein ou' n'viyait Et certainement rein ou n' entendait. Et continuant san c'mîn ou pensait, "Chut pas là, j'l'ai p'têtre bein imaginé". Chutte idée ou' dut bein vite abandonner Car bein clièthement un pas ou r'ouiyait, Et pensit don qu'incrédule qu'oulle 'tait Car ès fantômes et r'vénants ou' n'criyait Et souvent auve sa famille ardgumentait Qu'oulle 'té seûse tchi n'y'avait pon ditet.- La peux la saisit, san tchoeu battait, Lé pas pus près tout l' temps appréchait , Ou' pensit qué san drain moment 'tait arrivé Et qué siez l'yi janmais ou n'erveindrait - Si seulement dans san bel ou s'trouvait San bouanhoumme lé fantôme achouêmithait Et ch't idée là du couôthage lî donnit , Tout l'restant du c'mîn ou' couothit Et sus l'pas dé s'n hus ou s'êvannit ! Lé frédas à la porte la famille am'nit Et pépée à sa brachie la r'lévit Et sus l'sofa du parleux la portit. Auprès tchiques minutes ses sens ou r'gangnit Et toute s'n avantuthe ou nos racontit. Pépée auve s'n arme et sa lanterne sortit Pour aller tither chut vilain èsprit, En ouvrant la porte tch'est qué ch'est qu'ou criyis tchi vit? Sans autchune doute et là drait d'vant li Eune petite g'niche tch'avait mémée suivit! Pépée l'attrapit et dans l'êtabl'ye l'amathit Et r'vint à mémée pour l'y'explitchi Qué dé fantômes et r'vénants i' n' y' avait, Dé ch'là j' soummes seux au jour d'agnièt.
|
Viyiz étout: