Sus un grand rotchi appelé l'Rotchi d'Rocque Bèr, ou sîmpliément Rocque Bèr, les chorchièrs et chorchiéthes soulaient s'attrouper pouor souôlever des tempêtes auve lus chants. Si les pêtcheurs adonnaient à pâsser par-lâ en r'vénant dé d'houors, i' d'vaient y laîssi eune partie d'lus pêque, un treizième, tch'i' pathaît. Autrément, lé baté du chein tchi n'lé faîthait pon 'tait seux dé s'trouver dêchithé sus Rocque Bèr. Lé pêtcheux 'tait don t'nu d'lanchi lé treizième paîsson sus l'rotchi et, n'împorte combein forte la tempête, 'tait seux d'arriver â tèrre sain et sauf. Les cheins tch'oubliaient, ou tchi r'fusaient, avaient maille à parti quand les chorchiéthes sé m'ttaient à chanter lus chants maûfaits. I' trouvaient la mort à l'ieau.

Un bouôn jour, un cèrtain janne pêtcheux tchi s'en r'vénait à tèrre ouit l'chant des chorchiéthes. La tempête sé c'menchait et, à m'suthe tch'il appraichait du rotchi, les chorchiéthes dansaient et chantaient lus chants înfèrnals. Nouot' janne gas en faîthait fouah, dé tout chenna, et i' happe un paîsson du fond du baté, eune grand' êtaile dé mé, et en cope iun d'ses chînq bras auve san couté, fliantchant l'restant du paîsson ès démons en lus criant par sus la tempête: "La Crouaix est man pâsseport!". L'êtaile dé mé tchit sus l'rotchit dans la forme d'eune crouaix, et la tempête sé tut du coup, lé temps d'vînt tout calme, la mé trantchil'ye. Et d'pis chu jour-là les chorchiéthes dé Rocque Bèr dispathûdrent à tout jamais.