|
Les p'tits faîtchieaux mangîtent un mio d'pizza. Les vaituthes fûtent m'nichies par lé nièr tchian Tchi couothait par les c'mîns - par 'chîn, par là - Et not' cacheux d'taxi vit un r'vénant. Sus la grève, souos les ièrs des sèrpents d'mé, L'vièr Porte-Fagot 'tait à sé solilyi. Acanté li, eune vîsion fraide et g'lée: Lé r'vénant veu par not' cacheux d'taxi. La vioge, siez lyi, r'gardit un bouôn vidgo, Mais éthait aimé mus un film d'horreu Entouor un tèrribl'ye dragon, ou l'ouotho - Ou lé r'vénant tchi hantit not' cacheux. Toutes les chorchiéthes 'taient hortes au grand sabbat; Eune séthée d'néthes pensées et d'chorchell'lie. Mais ch't êpitafl'ye fut piéthe qu'un êpeûthas: Lé r'vénant veu par not' cacheux d'taxi.
Geraint Jennings
|
Un cacheux d'taxi Irlandais m'racontit coumme tchi qu'il avait veu eune blianche femme - mais d'aut's disaient, s'lon li, qué ch'tait un r'vénant dé blianc j'va.
Viyiz étout: