San Antonio, Texas, USA.
Moussieu I'Rédacteu,
"Tch'est qu' ch'la veurt dithe, 'entchéthaûdés'?", j'lî d'mandis.
"Eh bein," i' m'dit, "nou peut dithe qué ch'est à bein près la même chose comme d'êt' enchorchélés."
"Létchels est-che tchi sont entchéthaûdés?", s'fit Manman. "J'criyais qué tout chu niolîn-là 'tait oublié d'nouos jours, mé."
"Ch'est vrai qué v'là tchi dispathait à ch't heu qué j'sommes dans l'annee 1900, mais v'là tch'est acouo entchéthinné dans cèrtaines fanmil'yes," Papa nouos dît.
"Dans chu cas, ch'est Aaron Laffoley et sa bouannefemme tchi d'meuthent dans la p'tite caûminne sus l'haut d'Pliémont. Aaron fèrmotte acouo un mio et garde eune vaque. I' crait tréjous qu'tchitch'un est à lî jouer des tours. Quand il anm'nit san vièr bidet à la forge pour êt' féthé à matin, i' m a d'mandé si j 'connaissais tchique tchéthaûd tchi pouôrrait lî d'senchorchéler, 'Nannîn', j'lî dis.
"Man p'pèe, Jean Thomas, né en 1804, en connaîssait iun tch'avait nom Isaac. Pèrsonne né connaissait san nom d'fanmil'ye. Dévant mouothi, Isaac env'yit pour p'pèe et i' lî donnit l'sègret pour d'senchorchéler. Ch'tait d'bouoilli eune couothée et un tchoeu d'boeu. Pis i' fallait remplyi la couothée d'êpiles, et l'tchoeu d'clious. La préchaine chose 'tait d'rangi eune quantité d'boutelles dévant l'feu en liêsant dans la Bibl'ye et manniant un sâbre, la pointe en haut, amont la cheunm'née pour empêchi les chorchièrs dé d'valer, et pis tout d'suite en bas sus les boutelles. Y'avait acouo tchique bargouêchîn à r'citer. P'pèe n'y criyait pon, à tout chu niolîn, mais il en fît note comme étant eune tchuthiôsité, et j'n'ai autcheune envie d'êt' tchéthaûd mé-même!"
"Quand j'y pense", Manman nouos dît, "i' n'est pon bésoin d'aller liain d'nouot' fanmil'ye pour trouver des crianches dé vièrs temps. Nouot' fil'ye Annie eut d'drôles d'avâries y'a tchique temps. Sén homme, Frainque d'Aubèrt, fèrmait à L'Harmon'nie à La Mouaie d'St. Brélade, et l'jour vînt qu'ou n'pouvait pon faithe san beurre. Un vaîsîn lî dît d'mettre un êtchu dans l'fond d'la selle, et l'beurre sé fît dans p'tit d'temps. Et l'vaîsîn lî dit qué la preunmié pèrsonne qu'ou vèrrait s'sait la cause dé san troubl'ye auve lé beurre. Ch'tait la femme tchi d'meuthait dans l'bel, et Annie est seûthe qué ch'tait lyi."
"Annie dév'thait aver pus d'avis," s'fît Papa.
"Mais ch'n'est pon la preunmié fais qu'oulle a ieu d'l'embarras," Manman nouos dît. "Eune fais, sén homme, tch'est la bonté et la proprété même, sé trouvit pliein d'pouèrs et n'pouvait pon s'en dêfaithe. Dans chu cas-là lé vaîsîn tchéthaûd dît à Annie d'fricachi eune douzaine dé ches pouèrs dans eune vielle câssetrole, et quand ou l'fît les pouèrs à Fraînque dispathûdrent."
"Nou créthait tout d'même qué nouot' fille éthait pus d'avis à s'n âge dé craithe à tout chu niolin-là," s'fît Papa. "I' dait y'aver tchique raison pour ches p'tites aventuthes dé fais'sie d'beurre et d'aver des pouèrs. Sans doute, y'a acouo un tas d'vielles crianches par les c'mîns tchi n'ont rein à faithe entouôrre la chorchell'lie. Par exempl'ye, eune vielle crianche est qué quand l's ouothelles vouos piquent, si ch'est l'ouothelle drouaite tchitch'uns sont à dithe du bein d'vous, mais si ch'est l'ouothelle gauche i' sont à vouos dêchither. Quand la drouaite vouos cône, ch'est bouanne chance, mais si ch'est l'ouothelle gauche tchi cône, ch'est malheur à v'nîn. Nou pèrche lé bas des ouothelles pour y mett' des p'tites melles pour renforchi la veue des cheins tchi l'ont soupl'ye. Les cheins tch'ont l's ouothelles grandes sont d'longue vie.
"Et i' y'a un tas d'crianches entouôrre les pêtcheurs. Ch'la s'comprend, car i' sont souvent en dangi dans eune grosse mé. Un pêtcheux n'conte pon les paîssons d'sa pêque dévant arriver à tèrre car en l'faîsant ch'est mauvaise chance. Ch'est mauvaise chance étout pour lé pêtcheux dé lî souhaiter bouanne chance quand i' s'en va au baté. Pis i' n'faut pon lî pâler d'aller à la pêque car i' n'est pon seux d'prendre du paîsson. I' faut lî dithe 'aller au baté'!
"Un pêtcheux en mé né dait janmais mentionner l'moulîn où'est qu' i' s'en va faithe moudre san fronment en flieu pour faithe du pain, ch'la étant chein qu' châtchun chèrche en gângnant sa vie - la gângne dé Dgi. Ch'est en tchi i' pâle du 'Mêrtcheux' ou 'Gângneux' pûtôt qué l'moulîn. Et pour lé cliochi d'l'églyise parouaîssiale, tch'a fait sèvi d'mèr ès pêtcheurs pour des chents ans, i' l'mentionnent comme étant 'L'Pointu' ou 'L'Mèrtcheux'."
JERSEY EVENING POST, Saturday, January 14, 1984
Viyiz étout: