Les Pages Jèrriaises

Pus fraid que Jamais?

Ocquo les élections

A Portinfé, Saint Ou,
Vendrédi au sé.

Moussieu l'Editeu,

Nos v'là à la fin d'Novembre, et l'hivé n'est pas lyien. Y'en a tchi disent tchi s'en va être même pûs fraid que jamais, mais quand nou lûs d'mande pourtchi qu'i' craient chonna, i' n'peuvent pas vos donner une bouonne raison. Il est vrai qu'un bouonhomme de l'Etâ a prédit que l'mais d'janvyi s'sa si fraid qu'un homme tchi n'est pas mathié itha a parcouothi la pâraisse pour trouver, une bouonne grôsse femme tchi l'gardétha caud au liet, et qu'il a accaté tchiques tonnieaux de tcherbon pour être seux de n'crever pas d'la fraid dans l'jour. Mais ch'n'est pas tous qu'ont l'moyen de l'faithe, et nou craint que dans bein des cas, i' faudra téléphoner au docteu. La Merrienne a des r'frédeuses sûs ses ouothelles et ses ortets, et mé j'souffre hardi du campre dans ma gambe gauche, de tchi que j'ai bein d'la peine à marchi, même d'un but d'la tchuisine à l'autre. La femme à Bram attend un autre mousse au r'nouvé, et quand j'en pâsle à s'n homme, i' hauche les êpaules et dit: que yun ou mains dans une telle quantité n'fait pas hardi d'difféthence. Heutheusement, Moussieu, ch'est li qu'étha à l's êlever et pas mé.

J'allons aver un nouvieau Gouverneux. et nou-s-espéthe tch'i' s'accoutum'tha à notre manièthe de vivre aussi vite que pôssiblye, car les Jèrriais sont de drôles de balloques. J'me r'souveins de hardi de chais Gouverneux. Parmi yeux y'en avait ichi 'taient de vrais méssieux, mais étout, parmi l'nombre y'en avait que nou 'tait contents de s'en défaithe. Y'avait, par exemplye, le Général Abadie, tchi 'tait tréjous en brit avec le Baillyi Vernon, et tch'avait 'té envié pour réconstituer la Milice. Si jamais y'a yeu un Gouverneux tchi 'tait détesté, ch'tait l'Général Abadie, mais le Général Bingham, tch'eut l'malheur dé perdre sa femme, 'tait l'contraithe, car touos les Jèrriais l'aimaient et avaient r'gret de l'vaie s'en aller.

Je n'sommes pas ocquo fini avec les élections. Dans la Ville y'a des candidats au plyien, parmi yeux la Missis Green, tch'a tchitté Saint Sauveux et a transféthé à Saint Hélyi. J'li souhaite toutes les bouonnes chances, car s'ou n'a jamais fait grand' chose à Saint Sauveux, au mains ou n'a pas fait d'ma, mais dans m'n opinion je n'crais pas qu'ou trouv'tha assez d'support dans la Ville pour otchuper yunne des vacances.

Dans les pâraisses y'a des élections à Saint Sauveux, Saint Piêrre, Saint Louothains et à Grouville. A Saint Piêrre i' pathait que l'Sieur Egré ne s'en va pas gâgni facilement contre l'autre candidat, mais, avec chonna, je n'crais pas, comme j'avais dit la s'maine pàssée, tch'i' s'en va être battu.

A Saint Louothains, nou n'sais pas tchi craithe. Samedi pâssé rencontris un înmbécile tchi voulait dithe que si Ernest Le Cornu abandonnait che s'sait parsqu'il avait peux d'être battu par une femme. A ch'teu', Moussieu, vous tch'avez connu Ernest si longtemps, criy'ous sérieusement tch'il a jamais yeu peux d'une femme?

Pûs tard j'éthons les Connêtablyes, et en ville je n'vais pas d'changement, ch'est-à-dithe pas ocquo. A Saint Sauveux, l'Connêtablye n'a pas ocquo dit définiivement tch'i' s'en va abandonné, mais l'opinion parmi les électeurs est i tch'l' i faudra un nouvieau Connêtablye d'vant long, et la tchestchion est tchèsqu'i' voudrait la djobbe.

À ch'teu', Moussieu, n'en v'là assez pour chutte semaine. À la s'maine tchi veint, et dans l'entretemps, tout ch'qui y'a d'miyeu.

 

Ph'lip

 

Viyiz étout:

 

Les Pages Jèrriaises