à Portînfé, Saint Ou.
Jeudi au sé.
Moussieu l'Editeu,
Oh, grand doux d'la vie! comme se faisait ma grand'-mèthe quand y'avait tchiquechose tchi n'allait pas bein, mais i' fait fraid par siez-nous chais jours! Il est vrai que hardi d'monde sont bein pièthe que nous. La Merrienne, avec une pelle et une brînge, a gardé l'passage cliat du héchot jusqu'à la porte et, don, je n'sommes pas tout à fait isoles, comme hardi d'villes et d'villages en Angliétèrre. Mais, Moussieu, j'espéthons que la fraid molitha au pûs tôt, car si, ichîn siez-nous, j'pouvons nos garder cauds, et la mangeâlle ne manque pas, j'n'sommes pas sans saver que ch'est un triste qu'mench'ment de l'année pour hardi d'gens. Nou n'a qu'à lièthe la liste des morts dans la gâzette pour vaie chonna.
Parmi mes vièrs amîns tchi n'sont pûs se trouve le George Lé Masuthi, à l'âge de quatre-vîngts-quatre. Pour pûs de souesante ans il avait 'té membre du Comice Agricole d'Saint Martin, et un show d'bêtes ne s'pâssait pas sans tch'i' fûsse là. J'crais que la djobbe tch'il amait l'mûs ch'tait la chienne de referee, pûstôt que yun des juges d'une clâsse. I' prenait san temps et n'disait jamais un mot d'vant aver fait sa décision, mais une fais qu'ou 'tait faite, ch'tait fini. J'n'voudrais pas dithe que parmi les juges à ch'teu' j'n'avons pas son supérieur. Il avait 'té mal pour longtemps et nou-s-est content d'saver à ch'teu' tch'il est heutheux ouèsque i' n'y a pas d'malades ou d'maladies.
D'vant lièthe la nouvelle dans la Post, je n'avais autchune idée que l'Henri Ahyi, après aver 'té Connêtablye d'Saint Martin pour une douzaine d'années, avait décidé de se r'tither. Il a d's amîns partout, car il est un homme bein trantchille et bein avenant, et je n'craithais pas tch'il a un seul en'mîn dans l'Ile, mais san docteu a dit tch'il est temps tch'i' se r'pôse et ch'est final. Nou-s-avait creu que l'Tom Billot, yun des trais Chantgnièrs, éthait la djobbe sans oppôsition, mais la Post nos a dit à ces sé que l'Chantgni d'la Mathe est étout sûs les rangs, chein tchi veur dithe qu'une élection contestée est certaine. N'étant pas Saint Martinais je n'sais pas tchèsque les électeurs en pensent, mais si j'avais une vouaix j'éthais à la donner au Sieur Billot, sans disputer que l'Sieur d'la Mathe est étout un homme bein capablye. Ch'n'est pas souvent que nou vait deux Chantgnièrs en oppôsition pour la djobbe de Connêtablye, mais châtchun est libre de faithe chein tchi li semblye bouon, et sans doute le Sieur d'la Mathe a dans l'idée que s'i' n'prend pas à ch'teu', il éthait p't'être à attendre longtemps d'vant aver une autre chance.
I' n'faut pas que j'oublie que la Merrienne m'a dit de faithe ses apologies à autchun d'ses amîns tchi n'ont pas r'chu une carte de li à Noué ou pour lé Nouvel An. Le fait est qu'ou s'trouvit à court de cartes, mais ou peut asseûther tous qu'oulle a mantchi qu'ou lûs souhaite tout ch'qui voudraient souhaiter pour yeux-mêmes.
J'éthais voulu fini ma lettre en vos racontant l'histouaithe d'la vaque au Chantgni Cooke, de Saint Sauveux, et pourtchi qu'un bouan jour ou r'fûsit de donner une autre goutte de lait, mais ma bouonnefemme a dit que tant mains qu'nou disait de ch't' êpisode-là tant mûs. Mais yun d'chais jours, quand ou ne s'sa pas par les qu'mîns, j'pouôrrais p't'être vos dithe tchèsqui' s'arrivit et pourtchi.
J'peux vaie à ch'teu' que j'éthais à attendre pûs longtemps que j'avais creu pour man fricot d'nouvelles patates, car si y'en avaient dans les côtils à l'Etâ, la Grève de Lé et à Rozé tchi qu'menchaient à pousser à travers la têrre, ch'est seux tch'i' se sont r'endormies souos la né. Mais une fais qu'une Rouoyale a fait une bouanne rachine i' faut qu'ou craisse, et man temps veindra, tôt ou tard, quand j'pouôrrai dithe à la Merrienne de s'mettre à prépather un bouan soupé de gras lard avec des patates fricachies.
Assez pour agniet, Moussieu, mais y'a tréjous la s'maine tchi veint!
Ph'lip
Viyiz étout: