Moussieu l'Editeu,
L'autre jour je rencontrit un certain membre d's'Etats, et, en conversant, j'l'y d'mandit s'il avait trouvé fraid dans la Chambre le jour dé d'vant. "Car," j'l'y dit, "siez nous, même aupi d'un bouon feu, dans la tchuisine, j'eûmes à nos abrié, la bouonnefemme et mé, pour nos gardé cauds."
"Ah, grand doux," y raiponnit, "nou n'gèle pas dans l's'Etats j't'asseuze, man Ph'lip. Pour dithe vrai, y fait tchiquefais trop caud, et nous est content quand nou dèshalle, d'pouvé avalé un mio d'air. Tu vé, y'a un grand boileur tch'est tréjous allumé en temps, et sans doute y brûle un tas d'chèrbon. Mais ch'est bein nécessaithe, car v'la tchi ne f'thait pas si les membres v'naient en ville pour attrapé une suée d'fraid ou même une enflammâtion des poumons."
J'racontit chonna à la Merrienne quand vint l'sé, et ou r'mérchit qu'une bouonne maladie ne f'thait pas d'ma à plusieurs membres qu'ou pouôrrait nommé. "Et après tout," oulle ajouôtit "même un entrepreneur à l'drouait de tâchi d'gâgni sa vie, sans pâslé du fôssoyi."
J'eut à souorithe, car quand la Merrienne se met à pâslé d'même, oulle s tchiquefais de bein drôles d'idées. Epis j'me mint à réfliéchi que dans l'couothant d'notre vie j'avions veu d's'hivers quand la fraid 'tait assez pour vos g'lé la moëlle dans l's'os. Et je d'mandit à la Merrienne s'oulle avait oublié les siez s'maines d'hivé en mil huit chents nonante-six.
"Dame, nânin," ou raiponnit, "ch'tait un hivé, comme nou n'avait jamais veu, et comme nou n'a pas veu d'pis. Ch'tait dans l'mitan du mais d'Janvyi qu'la g'lée qu'menchit, et pour siez s'maines, nou n'pouvait pas mettre frouque ou bêque dans la terre. Nou disait même que dans yunne ou deux pâraisses, n'y'avait pas moyen d'ensév'li les morts, et qu'les côffres restaient dans les salles parouâissiales pour le temps, mais ch'tait p't'être pas vrai."
"Je n'sais pas," j'l'y dit, "mais j'me r'souveins que touos les matins l'iau dans notre chambre tait g'lée, et tchi fallait mettre le ticlye sûs l'feu si nou voulait lavé san visage."
"Vèthe," ou dit, "et nous appréhendait d'avé à sorti du liet. Et à bas nou n'pouvait pas vais à travers des f'n'êtres. quant à la fraid j'mettais une démi-douzaine de cotillons, mais je n'pouvais pas m'êcauffé. J'eûmes bein d'la chance de pouvé en passé à travers, man Ph'lip."
"J'me r'souveins etout," j'l'y dit, "que j'pérdit pûs d'la maintchi d'ma s'menche la preumié niet, et qu'bein d'autres taient pièthes que mé. etout, y nos vint d'France des ouâisieaux sans nombre - des grives, des piacards, des piêvres et bein d'autres. Mais nou n'gagnait rain d'les tithé car y n'avaient qu'la pé et l's'os."
"Tu m'en apportais touos les jours," ou dit, "et j'les gardais dans la tchuisine, Tu t'pliaignais tchiquefais d'la sal'té, mais tu'aimais à les vais volé ichin à la le long des jours. Quand vint le r'nouvé tout s'en fut sinon une chiètche p'tite rouorgorge, mais un biau matin ou trouvit un amouotheux, et la v'la horte se mathié. Oh damme vèthe, ch'tait un hivé. Et réellement, Ph'lip, quand nou s'en r'souveint, je n'sais pas pourtchi qu'nou s'pliaint du temps tchi fait ach'teu."
"Tu'as raison," j'l'y dit, "mais avec chonna, j'n'ai pas r'oublié que ch't'année là j'avais des r'frédeuses sûs l's'ouothélles, sûs mes mains et même sûs l'bu d'man nez. Nous enduthait l'temps, mais nou souffrait quand-même."
"Tu n'tais pas l'seul," ou dit. "Mé, j'avais des r'frédeuses sûs touos l's'ortéts, et souvent je n'pouvais pas dormi d'niet. Mais, n'y'a pas d'soin, j'avons passé d'pièthes temps dans notre vie, et j'sommes ocquo là."
"Vèthe, ma vieille," j'l'y dit, "et j'éspèthe que che s'sa ocquo pour une pôse."
Ph'lip
Chroniques de Jersey 17/1/1953
Viyiz étout: