|
J'pensais que j'tais dans eun aoutre monde, N'yia pas pus bé, à Paris ou à Londres. J'ai tet vaies chute Belle Grande Boutique; Et, mon doux!!! qué tout est magnifique, Chest bein vrai chein qu'la Gâzette dîzet, Nou peut avai de tout là à san grèt. Ma vaiezeinne y vint avec mé, Ou trouvit tout diversément bé, Ou fut si êtonnaie que tout tet à si bas prix; Qu'oul acatti eun fat, pour touos ses p'tits. Ouprès qu'ou fut rentraie siez yi, Ou diz à san buoun homme, sitôt qu'oul vit: J'ten prie acatte tes habits siez d'Gruchy, Si tu saveais comme y vendent à bouan marchi. Chest vrai; ils ont des braies et câzaques toutes faites, Des vèstes, corsets, chapieaux et castchiettes, Des qu'mînzes, kauches, guélesses et collets, Et touos lus habits sont extrêmement bein faits. Ils ont yieu des médalles à l'Exhébition, La marchandise, le travâs, tout fut trouvet bon; Y font des robes pour les membres des Etats, Pour le Bailli, les Juges, Ministres et Avocats. Y font des uniformes pour toutes les grades, "(Vâ-là man Nicqlesse acatté tes hardes)." Pour Officiers, Captaines, Maître d'Port et aoutres, Y peuvent avai tout là, sans lus en troubyié d'aoutre. Y font des robes pour les dames qui vont à chva; Pour les siennes qui vont sus rouelles, ils en font en drap; Y gardent eun assortiment d'habits tuous faits, A la dernièthe mode, et y sont tous bein fraîs. Yia notre Johnny qu'a grand besoin d'habits, Y faut l'emné en ville, yieun d'chest Samedis, Y dit qu'touos ses ammins vont siez d'Gruchy; Et qu'sils alleais ailleurs, y paîthaies bein pus chi. Yia notre Mary Jane qui s'en va s'mathié, Hélas!! combein qui s'en va nos en couqoté; Il est grand temps d'acatté san trousseau, Car j'comprends qui s'en vont en finit au pus tôt. Il y ra Jane Hélène qu'à bésoin d'un fro, Il est vrai chest êfants là sortent bieaucoup trop; Ou'l a à r'cité eunne pièche à l'examen, Et lus sermons chest Dimanche t'chi-vein. Enfin man Nicqlesse y'n faut pas san gêinné, J'cuourait en ville demain au matein; Les êfants m'ont dit qu'ils en ont veu à bouan marchi, Etalées dans les f'nêtres siez les Messieux d'Gruchy. Ah!! combein qui m'teurmentent qt qui m'vange la vie, Y savent bein qui vendent lus marchandises à bas prix; Ils ont des boas et des "muffs", quâzi à donné: Craît tu qu'jen acatteais yieun pour notre p'tite Néné? Y n'faut pas lâissi d'côtet, notre Nathanaël, Il est engagi à eunne bein belle hardelle; Aussi bein yiavé eun portmanteau siez d'Gruchy, Car quand y s'ont mathiéz, y sen vont viagi. Y faut bein lus donné t'chique chose pour lus Noué, Y yia Mary Ann, il y faut eun chappé; Pour Rébecca et Sara, j'lus acatté des robes, Et touos les p'tits, ont grand bésoin d'calobres. Nicqlesse se lève du matein, et prépathe le dêjeuné, Car y fallet bein vite, en ville nos en allé; Y mint jusqu'à sa "Frock Coat" et san "Tappeur," Y voulet être habillyi comme eun vraie Seigneur. Y n'tet jamais v'nu avec mé boutitchyi, Il tet pus qu'content, il en étet tout fi; Mais chu panfaique là ergardet t'y les filles; Y faut l'pardonné, chnest pas souvent qui va en ville. Tchi belle boutique à vaisselle qu'ils ont là, J'navons qu'à acatté des tasses et un pia, Y nos faut étout des assiettes et des bolles, Y'n faut pas oublié eunne pêsle, et eunne castrolle. J'avons assées bésoin de dueux-streis breinges, J'prendraîesmes bein avai d'zeaipîlles à leinges, J'éthons t'y eunne lampe pour le p'tit parlueux? Les êfants voudraient eunne lanterne, la nyiet ils ont peuex. Tandis que j'sai à faithe chest êmpiettes là, Acatte eunne couvertuthe pour la vaque et le chva; Chest chein qui yia d'bon siez d'Gruchy; Nou peut yiavé de tout, et nou n'en paie pas chi. Et pis n'yia pas bésoin d'emporté ses ballots, Ils envient tout siez vous, les p'tits comme les gros; Y vont toutes les s'maines partout Jerri, Et y n'vos cherge pas eun sou pus chi. Nicqlesse ênmi le pus p'tit d'nos garçons à vaies l'Arcade, Chest êtonnant comme des êfants prenne d'avis et qui r'garde; De pis chu jour là, y n'a fait que de m'tempêté, Y dit qui veux être habillyi comme un p'tit frégatein. Sans doute qui vit d'chest Sailors' Suits dans lus f'nêtres; Tchesque y sait: p'têtre que l'pèthe l'y meint chonna dans la tête; J'sai bein qu'ils en ont tréjous un bouan assortiment; Chest aussi bein d'en avai pour les deuex, Tomesse et Jean. Mais man Nicqlesse il est temps d'nos en allé, Si j'restons ichein, j'nos z'nallons nos ruiné; Enfin, j'tai dithait, n'yia pas pus près qu'sais êfants, Nou n'veux pas qui scais pitethe que les siens à d'aoutres gens. Nicqlesse fut si enchantet d'la boutiques, Qu'il avet ergret d'san allé si vite; Y m'dîs chest vrai chein q'tu m'as souvent dit: Nou va dans chute boutique là avec piêzi. Ah! dame chest qui n'voudrait pas allé ailleurs, Y n'aime pas d'aoutre marchandises que la leurs; Pour dithe vrai, chest eun homme qu'aime l'honnêtetet, Y sait bein si va là qui n'sa jamais trompet. Y puoret aiêlvé chute boutique l'à jusqu'est nuéez; Y n'est pas l'seul, ou'l a eunne bouanne ernoméez. J'ai tréjous entendu "qu'chest vrai chein q'tout l'monde dit," Y disent: Alleais siez d'Gruchy pour du bon et bouan marchi. Ou n'pouveais pas faithe mus, que d'yiallé l'Samedi d'Noué Pour veais lus Bézaar, Oh! Mais que tout est bé; Gennes hommes, qui vouleais donné à votre fille eun cadeau: Acatteais lé siez d'Gruchy, pour n'en payi pas trop. J'vos souette à tous eun bouan Noué, et bouanne Annéez. Georgie |
Viyiz étout: