Yune de chès qu'minzes, monièthe d'ouvrèes,
Que l'air peut tréjous traverser,
Qui sont bain fraîches - sans d'ghêne emp'zèe,
Ni d'vant trop stiff à vos badrer.
J'entri don siez un couotuthi,
Qui reste dans la Rue d'Drièthe,
Et tout d'un embront j'lis d'mandi
Si n'éthai pon d'tchi m'satisfaithe -
En fait dé qu'minzes!

Il en avait une quantitè!
Des blianches, des grises, des blues rill'yies;
L's'unes de coton, l's'autres de fliannet;
Et qui couothaient dans touos les prix.
J'en choêsi yune coumme i' m'fallait,
Ov' une molle d'ghêne qui r'touanne en bas,
Et ov un d'vant qui boutonnait,
Car pour des studs, n'men pâlez pas
Ov une soupl'ye qu'minze!

Coumme j'étais pus-à-co pressi
Jé n'péyi pon ma qu'minze sus l'coup;
Je d'vais d'aut'chose au couotuthi:
- "J'veindrai, j'lis dis, vos r'péyi tout,
Tchic jour quand j'pas'sai par ichin; -
Mettez la bas ov le restant. -"
- "All right, fit-i', j'lé f'thai m'n'amin."
Et jé l'tchitti en emportant
Ma soupl'ye qu'minze.

Un jour, dé vier treis s'maines oprès,
Dans ma pouchette j'avais tchic sous:
J'entri sièz li coumme je passais
Et, honnêtement, j'li péyi tout.
Ma qu'minze, ètou, il avait mins,
Sus l'compte, j'veur dithe, - pas sus san co -
Et coumme i' prenait mes hèrpins,
I' m'dounna un r'chu - que j'ai oquo
Pour ma soupl'ye qu'minze, etc!

L'aut' jour j'étions en compagnie
Quand nou m'apporte un p'tit billet.
- "Tch'est qu'est chonnechin, secours?" qué j'fis!
Tout d'suite l'papi fut dêhallè...
Hélas! jugiz d'ma triste mine,
Ch'tait pas une lettre de tchic janne fille,
Ni carte d'Noué, ni valentine,
Ch'tait - assez pour mé faithe d'la bille -
Un compte pour ma soupl'ye qu'minze!

Ah! y'en eut-i' d'fait sus man compte,
Quand j'lus dis tch'est qu'était chonna!
- "Ch'est d'même, s'fit-nou, tu n'as pas d'honte,
Pendard qué tu'es! Halle té dé d'là!
Va-t-en d'ichin! - Passez l'chapé!
Faudra lis faithe une souscription
P'têtre que nou pouorra collectè
Assez - ov un mio d'discrétion -
Pour péyi ma qu'minze!

J'eus biau lus dithe: "Oul est péyie!"
Pas moyen d'les faithe en r'venin
Fallit tchitter la compagnie,
Car j'n'y pouvais vraiment pus t'nin!
J'm'en fus sièz nous cherchi man r'chu
Et j'l'apporte à man couotuthi,
J'lis meins souos l'nez - "Là, m'crêthas-tu?
Jé t'prouvthai par tan propre êcri
Que j'paie mes qu'minzes!"

Et la Morale

Ya une morale à chaque histoethe;
- Chette-chin n'est pas une exception -
C'hest pour tchi faites coumme vot' grand'pèthe;
Gardez vos r'chus d'chaque transaction,
Même quand ch'es'sait pour une quéminze!

Elie