Les Pages Jèrriaises

Couotheais vite à vais la Boutique!!!
Rempyïe de choses magnifiques...

Te v'la ma vielle Nancy i'sis bein contente de t'vais
J'ai penset, et rapenset en té des chents fais,
Quand nou d'meuthe à la campagne et yiein d'la ville
Nou n'peut pas s'entre vais souvent ma pouore vielle fille.

Tu'eais comme mé ma vielle garse tu sçait bein yiou allé
Pour avé du bouan marchi, du bon, et du bé;
Et ois eun bouan choiex; chest eunne nobyïe boutique
N'yia pas à m'nidaie eunne aoutre comme Le Riche.

Te rappelles tu bein; yia t'chiques anneais; quand j'taîmes êfants
Nou ziallet de bouan matein en sauticottant;
Cherchi du café, du theais, du schucre ou t'chique aoutre chose
Pour le daîsjeuné faut eun p'tit ragoût quand i'sçait du "toast."

Y m'sembyïe que j'vet oùquo Monsieur et Madame Le Riche
Et lus deuex jeunes gens qu'étaient étout dans la Boutique,
Y vos r'chévaient si bein t'chet eun piatzi d'yiallé
lls avaient tréious un souorit du matein au sé.

Achteu tout est changi: chest eunne grande compagnie
Mais comme le temps pâset; nou ziet tréious bein servis,
Ils ont des oeufs, du beurre, du fromage, du jambon;
Des oranges, des noiex, des chucreins, des pommes, du limon;

Du raizein, d'la coreinte, des êpices de toutes sortes,
Pour le podein de Noué; yian faut de bein des sortes,
Ils ont étout eunne boutique en Giernézi
Rempyïe de friandises, et à bein bouan marchi.

Y n'faut pas oublié le cognac, les liqueurs et l'bouan vein,
Du bouan cidre en bouteilles, de la bièthe et du champagne; Enfein!!
Mais penseais t'chil honneur; ils ont d'zordres du Roïe
Des veins et des litcheurs, ils ont yiou à yienvié.

Et pas seulement le Roïe: mais san fils l'Preince de Galles
Lus a étout ordonnet plusieurs choses égales,
Y faut que chein qui vendent sçait diversément bon
Pour que la famille Royale, les patronise étout.

N'où n'a pas besoin de s'gêneai d'emporté ses achats;
Y les envis par lus vétuthes: v'la qui soauve tout embarras,
Y sont si compiêzants: y vont en campagne où en ville,
Preneais m'navis alleais y vielles gens, garçons et filles.

Les jeunes hommes sont tréjous gêneais pour les filles t'chi lus donné,
Le Riche vos aîda à choiezi ; ils ont eun tas d'bouannes choses pour Noué,
Et comme les p'tites drinettes ; aiment les doux mots et les doux regards,
Ils aiment les doux chucreins acatteais les ; devant qui sçait trop tard.

Si où vouleais mes chieirs anmeins être bein servis
Alleais siez Le Riche oùprès l'Marchi où la Colomberie,
Où zétheais eun bouan choiex et a bein bouan marchi
Tout est frais comme eunne laitue du Lundi au Samedi.

J'vos sçouètte à tous eunne bouanne anneaie et eun bouan Noué
N'oublieais pas que chest siez Le Riche qui faut allé.

Georgie.

 

Viyiz étout:

 

Les Pages Jèrriaises