|
L'aoutre jour j'tais à promné par la ville, Et mon doux, j'en vit t'y d'chais filles; Ne v'la t'chquéque j'rencontre sinon ma soeur. Où m'dîts t'ouas l'air de bouanne humeur. J'ly dis ch'nest pas rein d'êtonnant, Ch'nest pas souvent qu'jsis en gronnant; La vie est trop courte, ma soeur, Pour être de maouvaise humeur. Et pis j'veins d'être si amuzée, J'ai veu eun homme avec eun si long néez; Ma p'tite êfant j'ten prie n'dit rein, J'pouourais grigniy d'ichein à d'main. Mais nou z'an vait de toutes les sortes, N'en v'la yieunne j'criyiais qu'où tet morte; Dit mé, pouourais tu m'dithe san nom? Pour le moment, j'men rappelle pon. T'chyi drôle de marche, comme est qu'où saoute, J'pense qu'où voudret être bein pus haoute; J'ten prie, ne m'fait pas rithe en Ville, Les gens dithont que j'sis eune drôle de fille. J'einne scait pas t'chyi faithe, je dêfondscé, Ergarde chette là dansicotté; Et chès dueux là qui s'en vont passé, J'pense qui s'en vont bétôt lus mathié. "My good," t'chyi doux yieux qui l'y fait, Et yï qu'est comme eun marmouzet; L'entends tu? d'vant dithe à la préchaine, Y l'y demande voeux ti dueueux-s'très châtainnes. Les v'la qui vont à la Française, Q'uest là bein assize dans eunne t'cheize; Y yien acatte à quatre où siez sou, Et l'y dit: met chonna dans ta poautte, Lou Lou. V'la qui nos rêcauffathe la bédaine, Chute puour vieille là a bein d'la peine; En éthas tu ouquo t'chi-qu'eunnes, Oh! mais t'chi magnifique kyié d'leunne. Comme j'taîmes oùquo à êcouté chès-zla, Ne v'a eunne femme qui r'cappelle par là; La v'la qu'ou vein à mé en riant, Où riait tant que j'vit toutes ses dents. J'nu pas grand peine à les compté, N'yiaithet pas grand peine à les ôté; Ou'l en avet justement deuex, J'vos dithait bein où m'fit grand peuex; Car où qu'menchit à châtchyi d'main, Et m'dizet, mais j'vos connaît bein; Et mé j'dîzais, Eh! bein, Eh! bein, Et tout l'temps t'chet chaque, chaque de main. Et pis où m'er dît, j'vos connaît bein, Et mé j'dîzais tréjous |eh! bein; Ne v'la qu'ou m'dis, mais tchquest qu'où zête, Mon doux, y faout que j'sais bein bête. Eunne aoûtre fais où m'dis j'vos connait bein, Et mé j'dizais Eh! bein, Eh! bein; Créthais tous bein ne v'la qu'où m'enbrache, Et sêcrie ma puoure petite garse. Penscées, j'taîmes tout près du marchi, Où m'dîzet mais comme t'uas changi; Scait tu bein bein chnest rein qu'par ta voiex, Que j'ai peut savé tch-quest tué tais. Hélas!! y yia bein des années, Que j'nos entre t'aimes pas rencontrées; Chut!! Chut!! y n'faut pas dithe est gens, Combein est qui yia de temps. J'la connaissais quand j'tais êfant, Et achteu j'ai eun p'tit pus d'vingt ans; Où m'dîzet qu'javais bein changi, J'sais bein drôle si j'navais pas grandi. Enfin j'ly dîmes à la préchaine, J'en r'vîmes eunne aoutre dans eunne "van" Qui mé r'fît les mêmes compliments, Yï étout me môtrit ses dents. Je rencontrîmes eunne aoutre Olympe, Qui pathaîset diversément syïmpe; J'ly fît eun biau long salut, Et où m'rêponnit diversément crut. J'dis tout d'suite que chette là fait laid, Vraiment j'voudrais n'yiavai pas pâslet; Y sembïye que nou z'est à la grimmé, Avec une ronche où eun râté. Ne v'la qu'je rencontre eunne fille qu'a nom Louise, Où va au Marchi portai des chérises; Ou'l y porte et tout des fieurs, Tout est portet dans l' "prambulator." Nou créthait que chest un p'tit êfant, Mais jamais où n'rend les gens savants; Où fait tréjous sa p'tite cambrolle, Et s'touanne comme eunne vendrêsse de bolles. Quand n'où s'promène pour un p'tit d'temps, Nou veit toutes sortes de gens; Yian a qu'ont eunne gambe de boïes, D'aoutres ont eunne diverse grosse voïex. Yian a qu'nou n'entend pas pâslé, D'aoutres pâsle si haout qui vos font trembyié; Yian a qu'nou n'peut pas lus hallé eun mot, D'aoutres pâsle bein douochement et d'aoutres pâsle bein trop. J'men vais finit pour enniet, M'nhistoiethe de Samedi pâset; J'ein veux pas trop vos eannié, Qoù pouorrez yiethe chonna au sé. A la préchainne erveue. Georgie |
Viyiz étout: