Les Pages Jèrriaises

Lé chapé

Fort Lauderdale, Florida,
U.S.A.

Lé preunmyi d'févri, 1975.

Moussieu l'Rédacteu,

Lé costeunme traditionnel Ch'n'est pon souvent qu' nou vait un homme dans les rues atout un chapé à la tête en êté ichîn et au Cannada à ch't heu, et v'la tchi m'ramémouaithe qué j'avons la réputâtion, man fréthe Fraînque et mé, d'aver c'menchi la mode d'aller sans au Cannada. J'tions touos les deux dans l's offices du gouvèrnément ("civil servants") à Ottawa tôt auprès nouot' arrivée dans l'Nouvieau Monde en 1919, et dans l'êté d' 1910 jé c'menchînmes à marchi d'siez nous à l'office nueue-têtes. Nouos compangnons dans l'office trouvaient ch'la si drôle qué, par tchuthiôsité, deux-s'trais d'ieux fîdrent la méme chose. Lé temps est supèrbe en êté au Cannada et i' trouvîdrent évidemment l'expéthience d'aver la tête nue au grand air bein pliaîsante, et d'vant longtemps jé c'menchînmes à en vaie par les c'mîns tch'étaient nueue-têtes comme nous et j'vînmes à aver la réputâtion d'aver fondé lé "Hatless Brigade" à Ottawa!

Ch'tait aut' affaithe dans l'hivé, sans doute. Auve la tempéthatuthe souvent bein en d'ssous d'zéro, nou m'ttait des chapieaux ou bonnets d'pé d'ourse ou d'aut' annima, et nou s'couvrait l's ouothelles. Eune fais j'eus les meinnes g'lées quand la tempéthatuthe 'tait quarante dégrés en d'ssous d'zéro, et j'ai veu d's hommes tch'avaient des p'tites brédelles d'ouothelles mantchantes par l's aver ieus g'lées. Quand il' y sont, i' d'veinnent cruelles et craquent aisîement. L'temps pâssé nou les frottait douochement atout eune pouangnie d'né pour èrfaithe lé sang cirtchuler d'dans, mais les docteurs d'à ch't heu èrquémandent dé les bangner douochement auve dé l'ieau ligiéthement caude pour les ravigoter. Mais, pâlant d'chapieaux, ch'est r'mèrquabl'ye dé vaie l'nombre d'gens tchi n'en n'mettent pon dans les rues à ch't heu.

Quand j'tais mousse à St. Ouën, nou viyait tout pliein d'chapieaux d'paille qué nou pouvait acater ès boutiques au Sieur Jean L'Feuvre et au Sieur Francis Selous à La Fontaine, et à la cheinne du Sieur Francis Hamon à Portînfer - pour quat' sou. Pus tard, quand j'tais janne homme et d'vant aller à la dgèrre dé 1914-18 ch'tait la mode dé mett' un chapé d'paille dans l'êté, mais ch'tî-là couôtait pus d'quat' sou, et il avait un riban l'tou d'la couronne. Tchiquefais, l'riban 'tait nièr ou bliu, mais il 'tait souvent d'toutes les couleurs. Pour tchiques années, l'bord 'tait êtrait, mais la mode changeait et i' dév'nait large. Nou l'acatait tréjous à la mode d'eune année à l'autre. Y'a d's années qué nou n'les vait à vendre dans les boutiques en Jèrri, mais y'a tchiques anciens tch'en ont consèrvé. Lé Sieur " Willie" L'Brun dé mémouaithe récente et respectée, membre dé L'Assembliée d'Jèrriais, en m'ttait tréjous iun quand il allait ès excursions d'L'Assembliée dans la campangne en êté, et né v'là l'drein qu' j'ai veu en ûsage.

Dans l'hivé, pour êt' bein habilyi et quand nou m'ttait l's habits du Dînmanche, ch'tait l'dû chapé "M'lon" ("Bowler Hat" en Angliais) qué nou m'ttait. Pus tard, lé chapé d'feûtre d'vînt pûtôt la mode. Y'avait sans doute lé Bill-tappeur qué nou m'ttait auve la câsaque à pannieaux pour aller ès mathiages et l's entérrements. Quand j'tais mousse nou m'ttait des cipres lé tou d'chu chapé-là pour les entèrrements. Lé cipre 'tait eune bande dé crêpe à bein prés un pouce et d'mi d'laîze, du nièr crêpe pour eune grand' pèrsonne, et du blianc pour un êfant. Y'avait, étout, lé chapé d'Minnistre, d'habitude un nièr chapé d'feûtre atout dé grands bords dans les vièrs temps. Et acouo d'nouos jours dans l'églyise Catholique Romaine et dans cèrtaines églyises Anglyicannes lé Minnistre met la "Barrette" ("Biretta" en Angliais) auve les vêtements eucharistiques et en procêssion.

Les femmes soulaient mett' des chapieaux ornés d'flieurs et même d'ouaîsieaux tchi valaient la peine dé vaie, et l'mêtchi d'modiste ("milliner" en Angliais) pour les faithe 'tait eune vocâtion qu'un tas d'jannes filles apprannaient et y gangnaient lus vie. Dans les temps d'Pâques, les femmes aimaient à s'farder dans touos lus falbalas et les chapieaux 'taient l'couronnement d'l'ensembl'ye. Sans doute les mauvaises langues disaient tch'il' allaient à l'églyise ou à la chapelle pour montrer lus bieaux chapieaux!

En temps d'deu ch'tait aut' affaithe. Ch'tait la couôteunme des veuves dé mett' des chapieaux à vouailes - sîmpl'yes et sans ornéments - et l'vouaile, généralement d'nièr crêpe tchiyait jusqu'à la taille en d'vant d'la fache.

Y'a, étout, des chapieaux pour couvri aut' chose qué la tête des gens. Par exempl'ye, lé chapé du pot à thée ("tea-cosy" en Angliais), et l'chapé d'vlicot. Et l'bonnet d'âne qué les maîtres d'êcoles mettaient sus la tête des mousses dans l'êcole quand i' n'apprannaient pon bein.

Et en fîn d'compte, n'oublions pon, qué dé tout ancienneté, lé chapé 'tait appelé un "Capé".

George d'La Forge

 

 

Viyiz étout:

 

Les Pages Jèrriaises