|
Si l'Bouan Dgieu vos permet de travaillyi la terre Y faut sans doute y craitre des pommes de terre S'y vos faut du guano ch'est Reg Anmin qu'en vend Quand l'Connetablye en a ch'est la qu'il prend. Sus l'air du tra de ri de ra Tra la la la Si ch'est qu'ous avez besoin de Chabots en bouais De bottes de travas ou eune pathe de braie Allez siez l'Vier Soudard y' sont a bouan marchi Y'en a etout siez Krichefski Et si ch'est qu'ous etes en train de vos mathier Y faut sans doute lis mettre la bague sus l'de Et pour ches affaithes la ch'est Mess Hettich qui faut Des bagues et des broches en or ch'est par tonneaux. Si ch'est qu'ous avez besoin d'Service d'ecrivain Y'en a pas iun qui f'tha la job pour rein Si ous en voulez iun qui connais toutes les louais Y'a pas a battre le bouan J.J. Si ch'est qu'ous entendez de bouan matin Tchi'qu chose qui fait un grand potin Et qui s'en va bouan rond au Carrefour d'Otago Ch'est Charles Billot en route pour Ecreho. Si ch'est qu'ous avez un bouan lard a tue Et qu'ou n'savez pas iou aller l'porter Allez siez l'Averti Y vos dounne bouan prix Que ch'sai pour des quetots ou des vielles tries. Et si ch'est qu'ous avez tchique vielles poules qui coues Et qu'ou n'avez pas rein a mettre en d'sous Alles siez Mess Bertraim et si'il en a occouo Y' vos dounna deux ou trais oeus d'picot. Si ch'est qu'ou n'etes pas sieux de vout Jerriais Ne mantchez pas la Reunion chaque mais Supportez l'Assembliee qu'oulle alle de pus en pus Asseuthez son success ou n'pouvez pas faithe mus. |
Acouo eune vèrsion:
|
Si l'Bouan Dgieu vos permet de travaillyi la terre Ou d'craître de belles tomates dans vos serres, I' vos faut de l'engrais, ch'est George Munroe qu'en vend, Quand George Robillard en a ch'est la qu'il prend. Si ch'est qu'ous avez besoin de cauches ou corsets Des c'minses de travas ou eune pathe de braies, George Torode en a pour rêmpliaichi vos vielles, Y'en a étout siez Gabriel. Et si ch'est qu'ous êtes en train de vos mathier I' faut sans doute lî mettre la bague sus l'dé, Et pour chès affaithes la ch'est le Sieur Paint qu'i' faut, Des bagues et des broches en or ch'est par tounnieaux. Si ch'est qu'ous avez besoin d'service d'Ecrivain N'y'en a pas iun qui f'tha la djobbe pour rein, Et s'ous en voulez iun qui counnais san travas Allez siez l'Avocat Martel ch'est la le gas. Si ch'est qu'ous entendez de bouan matin Tchi'qu chose qui fait un grand potin, Et qui vos casse la tête auvec tout san tripot Ch'est Fred Torode auvec san tchethibot. Si ch'est qu'ous avez un bouan lard a tuer Et qu'ou n'savez pas iou aller l'porter, Allez siez l'Sieur Chillcott i' vos dounne bouan prix Que ch'sai pour des quétots ou des vielles tries. Si ch'est qu'ous avez tchique vielle poule qui coue, Et qu'ou n'avez pas rein a mettre en d'sous; Allez don siez Fred Heaume et s'il en a accouo I' vos doun'na deux ou trais oeufs d'picot. Si ch'est qu'ou n'êtes pas seurs de votre patouais Allez sans manque es rêunions chaque mais. Supportez l'Assembliée qu'oulle âlle de pus en pus Asseuthez san success, ou n'pouorrez pas faithe mus. |