Les Pages Jèrriaises

Lé Vièr Soudard

The Old Soldier

 

Lé Vièr Soudard

 

Pouor quâsiment un siècl'ye la boutique “Lé Vièr Soudard” 'tait bein connue à St. Hélyi.

En 1895, à l'âge dé 21 ans, lé Sieur C.S. Bisson enrouôlit dans l'régînment du West Yorkshire. I' s'n allit en Afrique du Sud et soudardait dans la Dgèrre des Boers jusqu'à 1900 quand i' fut estropié et s'èrtithit d'l'Armée.

Il avait acouo à marchi auve deux cannes quand i' tchittit l'Hôpita militaithe à Londres et r'vînt en Jèrri.

I' décidit d'investi san pinnetchinne dans eune boutique à 34 lé Neu C'mîn, St. Hélyi.

 

Lé Vièr Soudard

 

Viyant qu'i' n'tait pon supèrstitieux, il ouvrit la boutique sus un Vendrédi. Ch'fut lé 18 d'Juilet 1902 et dans les preunmié deux jours d'ouvèrtuthe, lé Sieur Bisson prînt douze louis, sept ch'lîns et quat' pénîns. L'affaithe fur lanchie!

Lé Sieur C.S. Bisson gardit la boutique jusqu'à sa mort - i' mouothit en 1959 à l'âge dé 84 ans. San fis, tch'avait travailyi auve san péthe pouor eune quarantaine d'années, prînt chèrge d'la boutique - et auprès li, lé p'tit-fis du fondateu rempliaichi san péthe à la tête d'la compangnie.

 

Lé Vièr Soudard

 

Mais quand vînt l'temps pouor lé Sieur Miché Bisson d's'èrtither, les temps avaient changi et nou décidit d'freunmer les portes du Vièr Soudard pouor la dreine fais.

Lé bâtisse a 'té èrdêv'loppé en offices - mais la côtchiéthe d'la vielle boutique a 'té prêsèrvée.

L'êcritcheau d'la boutique s'trouve achteu au Musée d'Jèrri.

Dans des vielles gâzettes, nou trouve d's annonces pouor Lé Vièr Soudard.

 

"Hullo, where are you going, old man?
To "Le Vier Soudard" in New Street, where I can
Buy Clothing that will stand all weathers,
And Boots (not of cardboard) but made of Solid Leather.
Just pay him a visit, take my advice,
You will not hesitate about going twice
To 34, New Street, where the goods they stock
Under the sign of "La Rouoge Casaque."

1905

 

Viyiz étout:

 

Les Pages Jèrriaises