 La sépultuthe dé Dgillaume lé Contchérant |
Ch'tait lé vîngt-sept d'Septembre et auprès deux-trais jours dé séjour, i'fit marchi ses troupes envèrs Hastings. I' brûlîtent les maîsons et i'chèrfouoillîtent pouor la nouôrrituthe. Nouotre Duc eut d's l'arbalêtchièrs, d'la c'val'lie, et d'l'înfanterie; envithon siex mille gens. I' mîntent les teuniques d'ssous lus chaîne-melle et les teunettes à méta. Tchitch'uns portîtent les lances, l's arbalêques et èrchelles, les sâbres et les haches auvec les êtchussons, faichonnés comme eune aigl'ye. I 'taient v'nu dé La Nouormandie, dé la Brétangne et d'Allemangne, et d'autres parties dé l'Ûrope, comme mèrcénaithes.
Quand i' s'taient èrfaits, i' les fit marchi envèrs eune pliaiche nommée Senlac - un lac sablionneux - dans eune vallette entre des monts embouaisis. Là, il êtablit sa position, p't-être qu'il avait examinné lé tèrrain d'vant, tandis qu'san ennemîn, l'usurpateur et s'n armée dé Saxons, arrivîtent du Nord et s'arrangîtent dans les bouais.
Et là-bas j'trouvînmes un p'tit camp dé Nouormands du Cotentin, compliet auvec la c'val'lie, l's arbalêtchièrs et l'înfanterie, parmi les camps des alliés ès armes. Lus êtchussons, pendant d'eune branque ou pitchis dans la tèrre, 'taient sans armueûthies à chu temps-là, seulement auvec eune crouaix ou un portrait. Lus armes 'taient près lus tentes comme 'taient lus j'vaux. Lus chaîne-melle pendaient des chôlattes à côté dé lus teunettes. I' 'taient assis alentou d'un feu mangeant un fricot dé lapîn, et il' avaient les têtes mié-râsées, un mio rare. Un grand êtchusson, contre eune bûche, avait lé mot 'Haguedyk' d'ssus (ch'est lé nom d'un rempart au Sud dé Chèrbourg).
"Comme est qu'ous êtes?" j'lus dîmes, "pâl-ous lé vièr patois? J'sommes Jèrriais dé l'île dé Jèrri."
"Mais ch'est La Nouormandie," 'tait la rêponse d'un janne soudard, qui d'meuthait à Villedieu Les Poëlles; et pis l's autres c'menchîtent à pâler en lé bouon français, et d'explyitchi tchiqu' i'faîthaient et comment tch' i' tâchaient d'èrcréer l'atmosphéthe et la vie du temps pâssé et dé chu jour-là.
J'èrrînmes à chèrchi les Brétons et les mèrcénaithes, et èrgarder lus armes et lus pots à tchuithe, cassetrôles, et lus djougues, et p't-être obténîn eune cannée d'cidre, en sentant que j'avions vêtchu un mio du temps pâssé unniquement Nouormand et même Jèrriais. Tout alentou j'ouînmes les difféthantes langues et vînmes difféthantes tâches êtant accomplyies comme prépathâtis pouor la bataille.
J' c'menchînmes à ramonter lé mont parmi les bouais envers les pliens avas hèrbeux d'ssous lé mont, et j'vînmes des chents dé soudards à pid auvec lus êtchussons, sâbres et les doubl'yes haches èrlithant souos lé solé. I'sortîtent des bouais et i'formîtent eune lîngne dé bataille, eune grand' muthâle d'êtchussons, lus Rouai au mitan, entouothé par eune piêssante bande des dgèrrièrs - les dgèrrièrs d'san palais. I'n'y'avaient pas hardi d's arbalêtchièrs ou dé c'val'lie; avaient-i' 'té là à Stamford Bridge, où avaient-i' èrtithé auprès aver sèrvi lus tèrme. I' mîtent la chaîne-melle et les teunettes, étout, pathé ès cheins des Nouormands, mais il' avaient les g'veux pus longs. Deux êtendards 'taient l'vés dans la groupe du Rouai au centre d'la lîngne.
J'étions juste à mié-mont quand j'vînmes les Nouormands et les Brétons marchant driéthe lus Duc et sa c'val' lie, tchittant lus camps envèrs lé pid dé l'ava hardi bein armé (jusqu'aux dents!).
L's arbalêtchièrs 'taient pliaichis d'vant, pouor former les preunmièrs rangs. L'înfanterie formîtent en rang driéthe ieux, et la c'val'lie 'tait pliaichie à châque flianc, tout l'monde bein protégi, armé et hardi drîlyi.
Un c'mandement 'tait crié, l's arbalêtchièrs s'agenouoillîtent et tithîtent plusieurs fliottes d'èrchelles en amont à pliôre sus l's êtchussons ès Saxons, à ch't heu t'nus au d'ssus dé lus têtes, tandis qu' d' autres fliottes 'taient tithées directément envèrs ieux. Et pis, l'infanterie c'menchit à marchi amont l'mont envèrs ieux, lentement et sans cêsse.
Tchiques-uns d's arbalêtchièrs Saxons s'èrtithîtent, mais sans hardi d'êffet. L'înfanterie assaillit la muthâle d's êtchussons et lé combat, main à main, c'menchit, châque armée briochant ès autres auvec sâbres et haches, criant et sâbrant ès êtchussons. Tchiques soudards dé touos les deux armées tchîtent, et 'taient laîssis là où'est qu' i'tchîtent. Lé grand brait d'bataille des Saxons fut "Ut, Ut," tandis qu'les Nouormands criîtent "Dex aie" (Dgieu, aîdgiz-nos); Wace, notre poète êcrivit ches mots dans san Roman de Rou.
L's arbalêtchièrs Nouormands env'yitent tchiques hommes pouor r'mâsser l's èrchelles faites servies. La lîngne Nouormande èrtouônnitent ava l'mont et les grands rouaux, "Ut, Ut" haûchitent des Saxons driéthe lus muthâle d'êtchussons. Deux fais acouo, chutte mannoevre s'pâssîtent; au c'menchement, l's arbalêtchièrs, pis l'infanterie avanchit mais la c'val'lie restit en pliaiche. Dé pus en pus soudards 'taient morts ou bliessés, et duthant les arrêts, piêtons dé châque armée avanchîtent et traînîtent lus bliessés driéthe lus rangs. Lé Duc allit à j'va parmi ses soudards, souvent nueue-tête pouor lus montrer qu'i'n'tait pas mort, qu' i'tait acouo vif.
La traîsième avanche c'menchit et les rangs d'înfanterie dé châque armée s'mêlîtent en battant, futhieusement - pis les Nouormands env'yîtent eune aut'fais, mais chutte fais, la muthâle d' êtchussons des Saxons c' menchîtent à dêmembrer, et les Saxons cachîtent les Nouormands, lus armes en l'air et auvec des grands cris dé victouaithe. D'un assaut, la c'val'lie Nouormande et Brétonne galopit - ventre à terre - amont, dé touos les deux fliancs et plongit dans les buts câssés d'la muthâle d'êtchussons. Dédans, et driéthe, i'galopîtent, j'tant lus lances et hachant à tèrre sus l's êtchussons des Saxons auvec lus sâbres.
Entretant, l'înfanterie étout avait touônnée et c'menchit à battre l'ennemîn lé long du front. Les Saxons 'taient fendus en groupes, presqu'entouothées. Mais, i' s'èrgroupîtent et les Nouormands èrtouonnîtent et s'èrgroupîtent comme d'vant. Trais fais en pus i'assautîtent dé même mode, tréjous attendant qu'les Saxons 'taient fendus en groupes ou dêjoingnîtent lus rangs, pis, i'galopîtent futhieusement pouor isoler eune groupe, l'entouother et la dêtruithe.
Êventuellement, auvec un grand cri, la groupe du Rouai Harold 'tait entouothée; san corps rouaya, i'li d'fendit férocement, mais enfin, les deux êtendards tchîtent à la tèrre.
Guillaume Le Contchérant galopit amont l'mont, pliaichit s'n êtendard sus lé haut lieu, tchittit san teunette, touônnit à ses hommes et lus dît, "J'sommes les contchérants. Ch'est lé quatorze d'Octobre, mille chent souaixante six, n'oubliez pas chutte journée et chutte date - tout va changi en Angliéterre à l'av'nîn."
Quant à mé, en 2004, j'espéthe qué j' n' aillons pas célébrer la pèrte dé Nouormandie par Jean Sans Tèrre, mais qu'j'aillons célébrer et r'affèrmi nouotre alliégeance à notre Duc, Sa Majesté la Reine, et à notre héthitage.
Ralph Nichols
28/12/2000
Viyiz étout: