Né v'là bétôt l'mais d'Juîn tch'appréche - et auve li la Fête Nouormande 2002. Ch't' année ch'est Jèrri tch'est la pliaiche d'la Fête - autrément counnu dans la Grand' Tèrre coumme la Fête des Rouaisouns. Y'a deux années nos vaîsîns en Dgèrnésy organnîsîtent eune divèrsément bouonne fête et l'année pâssée j'nos en fûmes à Coutanches pouor eune fête organnîsée par nos couôsîns d'la Grand' Tèrre.
Êtant des Jèrriais bein pratiques et bein organnîsés, j'têmes à faithe d'la publyicité pouor la Fête 2002 même duthant la fête dé 2001! Nou n'peut pon c'menchi la publyicité trop tôt à m'n avis.
Mais y'a des gens tchi mé d'mandent: mais tch'est qu'i' y'a sus l'programme pouor la Fête? Eh bein, j'm'en vais faithe acouo d'la publyicité en vos explyitchant les êvenéments d'la s'maine.
Ouaithe qu'les grands êvenéments lus en aillent prendre pliaiche lé weekend du 8 et 9 d'Juîn - ch'est-à-dithe lé weekend auprès lé long weekend du Jubilé - j'éthons des choses à vaie et à ouï et à faithe c'menchant Lundi lé trais d'Juîn quand l's êtudgiants d'la clâsse du sé - les Crapauds Avanchis - lus en vont chanter dans les rues d'la Ville pouor mèrtchi BBC Music Live. Les cheins tch'ont des vouaix sont invités d'nos r'joindre!
Y'étha d'la beusquéthie duthant la s'maine, et j'allons faithe braithe les peîles comme nou soulait faithe temps pâssé à la St. Jean. Mêcrédi à Vendrédi, j'éthons eune dgaîngue dé sounneurs dé l'Angliétèrre - La Sagesse Nouormande - tchi chante et joue la chifournie, les pouques à vent, les fliûtes à bé et d'aut's înstruments. Véthe-dgia, y'a d's Angliais tchi chantent en Jèrriais - ou savez, ch'est eune langue întèrnâtionale!
J'éthons étout Les Chantous de la Côte auve lus costumes, lus danses et lus chansons d'la Grand' Tèrre - et nos vaîsîns Dgèrnésiais lus en vont arriver Vendrédi pouor danser dans les rues d'St. Hélyi.
La Reine, bein seu, est not' Duc - et viyant qu'ch'est l'Jubilé, j'éthons eune liéthie d'poésie en Jèrriais sus des thèmes rouoyaux dans l'bar du Jersey Arts Centre Mêcrédi lé 5 d'Juîn à 6 heuthes. Ch'est gratuit, mais j'peux vos r'quémander eune bouonne vèrrée ou modgie d'café coumme nou fait dans ches cafés modèrnes et faîchonnabl'yes.
Lé grand weekend d'la Fête s'en va c'menchi Vendrédi lé 7 d'Juîn quand y'étha eune pathade en ville à un quart dé 7 du sé auve les participants d'la Fête dans lus costumes et auve lus couleurs. Si autcheune pèrsonne veut y prendre part auve un bannète ou en châtchant eune couleu d'Jèrri, ou s'sez les beinv'nus.
Toute la journée Sanm'di y'étha eune fête au Mangni d'Sanmathès - y'étha d's èrcitâtions et chansons en Jèrriais, en Dgèrnésiais et en Nouormand dans la grand' tente; y'étha d'la dans'sie et mûsique dans l'bel du mangni; y'étha des mèrvelles, du pain, du Calvados et du cidre; des livres, des CDs et des cassettes à vendre; et des lédgeunmes organniques.
Pus tard à 8 heuthes du sé, y'étha un concèrt par Magène, la dgaîngue Nouormande, à St. James en Ville - des patholes dé Jèrri, dé Dgèrnésy et d'la Grand' Tèrre sus d'la mûsique d'achteu. Les titchets sont à vendre dé siez l'Jersey Arts Centre.
Dînmanche, y'étha eune journée d'Héthitage à la Société Jersiaise - auve des touônnées, des lectuthes, des distchussions.
À 12 heuthes et d'mie y'étha l'opporteunité d'vaie un match dé choule à la crosse - eune vielle gamme Nouormande un mio coumme lé hurling Irlandais - entré d's êtchipes dé siez nous et d'la grand'tèrre. Chennechîn au Victoria Park. J'avons boutchi étout les tèrrains d'pétanque driéthe lé par pouor des gammes dé doque étc.
Et pouor finni la Fête y'étha un sèrvice en Jèrriais à la Chapelle Philadelphie à St. Pièrre à 6.30 du sé. Lé Pâsteur Brian Vibèrt s'en va donner lé sèrmon.
La Fête Nouormande 2002 s'sa un grand êvenément pouor Jèrri et pouor lé Jèrriais - et j'peux vos dithe qué la s'maine pâssé j'èrchus eune démande d'înformâtion entouor la Fête dé l'Australie!
Viyiz étout: