S'nou vîsite la ville dé Bayeux, nou dait vîsiter la Tapiss'sie d'Bayeux tchi raconte l'histouaithe d'la Contchête Nouormande dé l'Angliétèrre. Ch'est eune histouaithe bein înmportante pouor les Nouormands et l's Angliais et sustout pouor les gens d's Îles d'la Manche.
La gal'lie d'la Tapiss'sie est eune longue allée dans tchi la leunmiéthe est bein faibl'ye à seule fîn d'protégi les couleurs et les fis. Nou pâsse lé long d'la Tapiss'sie et nou peut s'appréchi assez pouor vaie les détails.
Ch'est eune surprînse d'èrmèrtchi l'êconomie des lîngnes - les faches, les gambes, les louêmes stichies sîmpliément auve eune lîngne - et pis la crouaîs'sie d'licate des fis. Nou vait mus étout l's annimaux et les p'tits scènes des bordeuses - y'a des dragons, des bêtes à ailes, des tchilieuvres, des lièvres, des tchians, un ours, des ouaîsieaux, des j'vaux, des chèrs, des léopards, des chanmeaux.... Nou vait étout les creux et l'damage des siècl'yes, et l'histouaithe n'est pon finnie à la fîn d'la Tapiss'sie, y'a tchiques mètres tchi manquent, tch'ont 'té pèrdus au but, mouontrant tout probabliément la couronnâtion d'Dgillaume coumme înmage dé mitheux du portrait du Rouai Douard l'Confêsseux sus san trône au c'menchement.
Et l'dessîn n'est pon tout à fait pliat nitout - sus les navithes y'a les cordes et les vailes tchi vont d'vant ou driéthe. Nou vait des lîngnes dé j'vaux, l'iun driéthe l'aut' - et les soudards étout. Les couleurs sont r'mèrquabl'yes - et l'dynnamisme des caractéthes étout, sustout dans les batâles.
Ch'n'est pon vraînment eune tapiss'sie - ch'est eune brod'die. Ou fut exhibée dans la Cathédrale eune fais par an, attatchie ès colonnes.
Geraint Jennings
2001
Viyiz étout: