Quand j'prîns ma r'traite, jé c'menchis man traîsième âge auvec ma traîsième otchupâtion. Preunmiéthement, j'avais l'idée d'acater un p'tit car - eune minibeusse - et d'la faithe peindre en rouoge, auvec les trais léopards en or comme êtchusson, et auvec les mots "Dêcouvriz lé vrai Jèrri" en Jèrriais et Angliais.
Tout comme, avant chenna i' tait nécessaithe d'arrangi un tas d'heuthes pouor pratitchi à la reue d'avo auvec les vitesses et les chabots d'un char à banc.
Courtouaisie dé Tantivy, jé c'menchi auvec iun d'lus cacheurs à chîn louis par heuthe duthant l'hivé dé 1995-6. I'n'tait pon trop mal pa'ce qué j'avais 'té cacheu d'grands ouadgîns en Australie, mais en Jèrri, i'y'avait des c'mîns pus êtraits qué "dans l'bisson".
Mais, j'rêussis bein (auvec l'aîgue dé man maître tchi 'tait hardi pâcient) auprès un examen lé long des c'mîns d'St. Jean. Jé c'menchînmes à La Collette et pis l'long du Quai des Marquands, La Route dé la Libéthâtion, Lé Rouoge Bouoillon et les Grand's Routes dé St. Jean et d'St. Louothains, Lé Mont Fêlard et d'èrtou. I'y'avait des veues, des ronds carrefours, et hardi d'angl'yes et d'vîthages, et étout les monts. Mais sustout i'y'avait lé c'mîn tchi change dé laize. Les fossés et les haies 'taient hardi sînnueuses; toutesfais i' s'appraîchaient d'la lîngne centrale. et pis, i'y'avait d'aut's vouaituthes, les ouadgîns, les tracteurs dé toutes sortes dé laize et d'vitesse et i' faut tréjous r'garder dans les mitheurs à cause des bikes et des motorbikes, siéthe les bikes douochement, êt' pâcient et n'pon rouôler hardi vite, et r'garder la longue tcheue d'vouaituthes driéthe té. M'ttez les veues blyînquantes bein à l'avanche et changiz d'vitesse (à la main) et jugiz l'espace et la distance.
Auprès tout chenna, i'y'avait l'examen êcrit - Lé Côde du C'mîn, les louais, eune spéciale route touristique du Vièr Châté à la Bouonne Niet. Tchi route? Nommez les c'mîns! Les hôtels et les pensions, où est qu'i' s'trouvent? Où est qu'est La Crouaix au Lion, Bèsnard et au Maître; Les Tchênes - Trais, Chînq et Sept; Les Vallées d'la Feugiéthe, la Suisse, des Mouothièrs et d'St Louothains et enfîn tchique chose dé difféthent - où est qu'est Lé Pot d'Rotchi? Dèrniéthement, i'y'avait eune briève întèrveue. "À ch't'heu, ous êtes ambassadeu dé Jèrri, séyiz poli, bein habilyi et rapp'lez tréjous - tout l'monde a raison!"
"Allez, ramassez douze randonneurs à La Grève dé Lé, man preunmyi travas auvec Tantivy. Mangnifique, j'peurs pratitchi tout seu," jé m'dis.
Tout allit bein, et jé c'menchis à cachi pouor "Classic Coaches" châque matîn d'vant lé musée tâchant d'pèrsuader les passants d'prendre eune p'tite touônnée dé l'Île. Ch'tait supèrbe parmi les vallées et l'long des ruelles, par les fèrmes, les mangnièrs, les clios et les côtils, entouor les baies et les p'tits hâvres, d'vant un châté ou eune grand' hougue à côté des salles parouaîssiales et les vielles églyises dé St. Louothains et d'la Sainte Trinn'té, dé St. Martîn lé Vyi et d'St. Saûveur d'l'Êpîngne.
Tout comme, les Sanm'dis 'taient les jours hardi întéthêssants, les jours d's arrivées et des d'parts.
Auvec eune p'tite beusse, j'les rencontrais, les transportais et les ramassais à travèrs l'Île dé toutes sortes d'hôtel et d'pension. J'tâchais d'les faithe beinv'nus et lus donner d's avis.
Pus tard, duthant l's années tchi vîntent, j'acceptais d'pus en pus les touônnées dé l'Île, par Tantivy/Blue Coach auvec les touristes Angliais et Français d'la Colomb'thie et d'la Caûchie Albert, tchiquefais eune journée et d'aut's fais, eune d'mié journée auprès la boutiqu'sie et l'dêjeuner. I'y' avait étout les vîsites spéciales à L'Hôpita Souôtèrrain, La Légende Vivante, Les Pot'ties et La Mênag'gie. Duthant la journée nou s'arrêt'tait au Café Boardwalk à St Brélade, au Café Romany à la Grève dé Lé, à la Haute Tombette et ès Pot'ties pouor prendre du thée ou un èrpas. J'lus disais l'histouaithe des lieux temps pâssé, les changes et l's idées d'l'av'nîn. J'lus d'mandais des tchestchions pouor faithe lé viage un mio pus întéthêssant pouor mé.
Auvec les Français, j'avais des spéciales touônnées en fanmil'ye, ou auve tchiques anmîns, ès lieux difféthents coumme La Hougue Bie, Lé Vièr Châté, La Maîson d's Orchidées, La Chapelle ès Pêtcheurs. J'tâchais d'pâler en Français et j'apprîns hardi d'phrâses, par exempl'ye "emprunter le tunnel", sembl'yant bizarre à mé! J'tais învité dêjeuner (san vîn!) et tchiques fais j'distchutions les romans d'Pagnol à cause d's iliets et La Cotte dé Saint Brélade qu'j'avons veu.
J'aime hardi bein Lé Châté d'Grosnez auvec la veue d's îles, d's êtchets des Pièrres dé Lé, Les Dithouilles et l's Êcréhos (ou les Rotchièrs) auvec lus légendes et histouaithes, et à l'horizon la belle Nouormandie, not' vièr Duché et pays d'not' Duc temps pâssé. Est-ch'qué pôssibl'ye qué Jèrri étout gângnit à Hastings, et qué j'soummes les contchéthants, même aniet, auvec not' vie pas exactément Angliaîche?
Étout, j'aime hardi bein ma p'tite belle Île, et jé m'd'mande tch'est qui va s'pâsser si nou dév'loppe coumme l's aut's - nos compétiteurs, nou risque dé dév'nîn coumme les aut's. Si j'gardons la charme, la trantchilité et l'ambience dé not' héthitage, et les dêv'loppons, j'allons rester combattant à cause dé not' difféthence. En dépit des choses dé nos jours, la puspart des touristes en vacanche ès pays êtrangièrs les vîsitent à cause d'l'ambience du pays r'spectif, sa tchuîsinne, san paysage, s'n architectuthe, san clyînmat, même sa langue tchique fais.
Où est qu'chenna s'trouve en Jèrri, si nou s'en va tréjous changi? Vive la difféthence!
Ralph Nichols
Chu texte gângnit la compétition pouor la millième page sus les Pages Jèrriaises au mais d'Septembre 1999
Viyiz étout: