Peterborough,
en Angliétèrre.
Lé 8 juillet, 1967.
Moussieu l'Rédacteu,
Dans les temps qué j'fus né - ch'tait en mil huit chent nénant'-tch-ieune - y'avait un tas dé p'tchiots tchi mouothaient d'la fliue. Tant pus qu'j'y pense, et tant pus qué j'compathe l'hygiène dé chu temps-la à la cheinne d'à ch't heu, tant pus j'sis êrmèrvilyi que j'eus la chance dé rester en vie duthant les preunmiéthes années d'ma jannèche!
Au jour d'aniet les p'tchiots sont habilyis ligièthement, justément assez pour les garder cauds, et quand l'temps est bé i' sont mîns d'houors à prendre l'air - au mains ch'est d'mème qué j'les vai êl'vés en Améthique, et i' faut penser qu'ch'est d'mème en Jèrri étout. Quand la m'mèe lus donne la boutelle, ou' met l'chuchot directement sus l'goulet, et chuchot et boutelle sont stérilisés chaque fais qu'l'êfant s'en sèrt. Quand i' c'menche à mangi, sa nouôrrituthe est régliée et divèrsifiee, les vitaminnes nécessaithes pour eune diète bein balanchie étant considéthées eune responsabilité par la méthe. Les mousses continuent à baithe du lait jusqu'à l'âge dé dgiex-sept ou dgiex-huit ans. En Améthique la grand partie d's êcoles en donnent ès êfants dans la journée. Le rêsultat en est qué l's êfants la-bas craissent pus grands et pus hauts qu'lus pathents.
La maladie d'la fliue (j'ai oui ch'la appelé Summer complaint en Angliais et Dysenterie en Français) 'tait, à m'n idée, certainement l'rêsultat d'manque d'hygiène. Lé p'tchiot chuchait san lait l'travèrs d'un long tuyau d'nièr caoutchouc tchi n'tait pon pus gros qu'un crayon d'pliomb, et tch'était long assez pour mett' la boutelle dé lait à côté du p'tchiot dans l'bèr. Sans doute, l's anciens lavaient chuchot et tuyau du mus tch'i' pouvaient, mais la stérilisâtion n'était pon connue dans chu temps-là.
Quand lé p'tchiot c'menchait a mangi ch'tait l'habitude dé li donner du papa, tchiquefais appelé d'la houichepote ou d'la bouoillie. V'la tch'était fait atout d'la flieu et d'ieau. Les cheins tch'avaient des vaques y'éthaient mint du lait. Mais la manièthe de l'donner es p'tchiots n'était pon tréjous hygiènique! Y'avait des méthes tchi gouôtaient chaque tchul'lee d'papa dévant l'donner à l'êfant pour s'asseûther tch'i' n'tait pon trop caud. Y'avait meme des méthes tchi lé m'ttaient dans les bouoches, criyant qu'lus salives aiguethaient la digestion du papa par l'êfant!
La console 'tait souvent eune aut' souche dé manque d'hygiène. Tchiquefais les gens en faisaient ieune en m'ttant du chucre dans un p'tit cliu d'coton. I' y'en m'ttaient assez pour la faithe à bein prés la mème grosseu d'un chuchot, et pis il' am'naient les cârres du cliu ensembl'yes et l's amathaient atout du fi ou un but d'ficelle. Ou' pouvez vouos înmaginner si v'la tch'était sain quand il avait fait sèrvi pus d'eune fais! D'autres, sans doute, avaient les vraies consoles en os ou en [iv]ouaithe atout lus rindelles mais les campangnards n'allaient pon en ville souvent pour en acater.
Tout chennechîn n'veurt pon dithe qué l's anciens n'connaissaient pon la proprété. I' faisaient d'lus mus et 'taient, en général, la proprété mème comme oulle 'tait connue dans chu temps-la. Ch'est tout simpliément eune affaithe qué l'hygiène et la stérilisâtion d'nouos jours n'était pon connue.
Et pis y'avait d'aut maladies des p'tchiots à craindre. Ieune 'tait la croupe, eune maladie d'la gorge tchi la faisait enflier et êtouffait l'êfant. V'la tch'a heutheusement dispathu d'nouos jours ouaithe qué la diphtérie est à bein près la meme maladie - mais nou n'en ouait pon pâler fort a ch't heu. J'm'èrsouveins tch'i' y'avait un tas d'êfants tch'en mouothaient, d'la croupe. Un tas de p'tchiots avaient l'meûdget étout - eune aut' maladie tch'a dispathu d'nouos jours. Quand j'tais mousse j'ouïyais souvent l's anciens dithe tch'i' fallait l'aver eune fais d'vant mouothi et qué s'nou n'l'avait pon comme êfant nou 'tait seux d'l'aver quand nou s'sait sus l'pus.
D'aut' maladies d'êfants 'taient la coqueluche, la rouogeule, la vétheule, la vétheule volante et l's ouothipieaux. Du sithot d'pavôts 'tait supposé êt' bouan comme èrmiéde pour la coqueluche. Y'avait l's éthitchettes étout. Ch'tait eune fouaiblièche des gambes, et les p'tchiots tch'en souffraient avaient les gambes vèrques. J'm'èrsouveins d'aver ieu la rouogeule et la vétheule volante mé-mème. Ches deux maladies-là 'taient contagieuses et quâsi touos les mousses l's attrapaient.
Quand nou pense que l's anciens couochaient dans des couochettes atout des ridgieaux tout l'tou, et les f'nêtres d'chambres freunmées, v'la tchi vouos donne eune idée du manque d'air dans les maisons du temps jadis. Les pouorres pétchiots d'chu temps-la vivaient souos les mèmes conditions. Il' 'taient tellement enfliubés qué nou sé d'mande comment tch'i' pouvaient respither. À c'menchi, la méthe viait eune frette lé tou du corps du p'tchiot. Ch'tait eune bande de coton dé chînq ou siex pids d'londgeu et ou pouvez vouos înmaginner combein d'fais qué v'la tch'allait l'tou du pouorre mousse. Et pis, la langeu d'flannelette par sus l'drapé et pis la p'luche dé flianné et la c'mînsole, et un bonnet sus sa tête. Quand il 'tait dans l'bèr atout des couvèrtuthes en d'ssus d'tout ch'la, j'mé d'mande s'i' pouvait êt' à s'n aise et respither comme i' faut!
George d'La Forge
Viyiz étout: