À Portinfé,
Saint Ou.
Moussieu l'Editeu,
Comme ou l'savez, la s'maine pâssée j'avais attrapé une mauvaise maladie tchi m'empêchit de vos êcrithe la lettre que j'ai yeu l'habitude de vos envier toutes le s'maines. J'n'avais autchune forches dans mes bras, dans mes gambes ou, pour dithe vrai, dans autchune partie du corps. Même, j'n'avais autchun appétit; en un mot j'étais si faillyi que la preumie niet et les trais préchains je m'couochi sûs l'sofa, ayant print la précaution de faithe un bouon feu et j'dormis assez bein.
Le docteu vint m'vaie et m'dis que y'avait hardi d'gens tchi souffraient d'la meme maladie, et que si j'me r'pôsais et si j'prenais soin de m'garder caud, je r'séthais sûs mes pids dans tchiques jours. La Merrienne li fit mârri, li disant tchi'i' 'tait un imbécile, et tch'il éthait deu être un vétérinaithe.
Mais Moussieu m'ayant dit que je n'tais qu'un vièr pièrcheux, ou ramontit à s'n heuthe ordinaithe pour se couochi, et j'm'attendais, quand vint l'matin, qu'ou descendrait pour faithe une tâsse de tais, car ou savait qu'ou n'pouvait pas s'fier sûs mé pour le faithe comme de couótume. Mais, nouffé, Moussieu, je m'trompais car dans les sept heuthes ou s'mint à faithe des brais et à m'prier d'aller à s'n aide, et mé tch'avait bein d'la peine à bouogi. Ou continuait à crier et me j'êcoutais, mais quand ou m'ordonnit de téléphoner à l'Hôpita, car ou 'tait mouothante, j'vis bein que l'affaithe 'tait sérieuse et je d'mandis à un bouon vaisin, tchi 'tait v'nu vaie si je m'trouvais mûs de chèrchi un docteur, car j'criyais que ma bouonnefemme était mal. Eh bein, Moussieu ch'n'est pas si mal comme nou-s-éthait peut craithe, mais la Merrienne est au liet pour un bouon tchinze-jours avec la grippe, et chonna li sert bein. Si une femme n'a autchune sympathie pour san bouonhomme quand il est malade, ou n'peut pas s'attendre tch'il en étha hardi pour li dans les mêmes circonstances.
A ch'teu', Moussieu, pour l'affaithe du Vièr Marchi, tchi fit l'publyic réaliser tch'ils ont ocquo des drouaits, et tchi'i' n's'en vont pas être gouvèrnés par autchun comité des Etats. Y'a yeu bein trop d'chonna par le pâssé, mais j'crais que chein tchi s'est pâssé s'sa une léçon tchi ne s'sa pas oubliée. La Merrienne fut bein surprinse que san couôsin, le Député Ernest Lé Cornu, avait approuvé du projet, mais j'li dis que si Ernest avait une qualité pûs qu'une autre ch'tait la qualité de loyauté. S'il avait supporté san comité ch'tait parsqu'i' criyait que ch'tait la chose à faithe souos les circonstances. L'Ernest a 'te yun d'mes grands amins pour bein d's années, et un amin pûs loyal j'n'éthais jamais peut aver.
Je m'attendais de pouver vos donner tchiquechose de nouvé au sujet des élections, mais j'ai 'té desappointé. J'avais 'té persuadé que l'Bill Perchard ne s'sait pas oppôsé, mais j'avais creu qu'une élection pour Chantgni à Saint Louothains était certaine, car nou-s-avait ouï pâsler de quatre ou chinq candidats. I' nos reste l'élection pour Juré-Justicier, et l'élection pour Député en ville, mais jusqu'ichin y'en a pas un seul candidat pour lé District No. 2.
Jé sommes, la Merrienne et mé, à nos faithe jouaie de la Visite Royale au mais d'mai, et j'espéthons que Sa Majesté pouôrra trouver l'temps de pâsser par siez-nous pour une tâsse de tais et un p'tit fricot, car nou-s-entend partout que ch'est une charmante dame, tch'aime à pâsler ès gens ordinaithes comme nous.
La s'maine pâssée nou-s-avait craint que y'éthait bétôt une dguêrre entre les Russes et l's Améthitchains, et que toutes les nations s'saient en grand dangi d'extermination. Jêrri, i' pathaissait, n'existéthait pas longtemps, et ch'tait inutile de bâti des souostêrrains, car i' n'y éthait autchune seûzeté sûs la têrre ou en d'sous. Mais à ch'teu', grâce à la Providence, lé dangi est pâssé et il est à espéther que bétôt toutes les nâtions civilisées veindront à vaie que dans une dguêrre i' n'y a pas d'gâgnants, mais que les vaintcheurs sont perdants étout.
Sûs la gazette l'autre jour, i' y'avait un portrait du John Le Ruez avec san jeune boeu tch'il a vendu. Nou voudrait saver l'prix tch'il en a r'chu, mais tout ch'qu'est certain ch'est que l'boeu n'a pas 'té vendu pour quatre sous. Les bêtes tchi s'vendent au jour d'agniet ch'n'est pas nécessaithement pour lûs bieauté mais pour lûs élevage. I' n'y a pas un éleveur tchi n'sait pas que l'boeu tchi fait l'preumié prix au "show" produitha la miyeuthe race. Autrement nou n'éthait jamais ouï, pas exemplye, de l'Observer tchi 'tait si laid que nou-s-avait honte, et de bein d'autres d'la sorte. Faut d'mander au Francis Lé Ruez si n'est pas de m'n opinion que les pûs bieaux boeux, avec certaines exceptions, ne sont pas les miyeurs à garder.
Ph'lip
3/11/1962
Viyiz étout: