Le Ménage ès Feuvres,
St. Ouën.
Lé 17 d'octobre, 1970.
Moussieu l'Rédacteu,
Av'ous eune bouanne santé! Si la rêponse est oui èrmèrciez L'Bouan Dgieu trais fais par jour! Quand j'tais en France dreinement, jé d'meuthais siez un anmîn tch'est docteu, et j'faisais sa ronde auve li dans la campagne deux fais par jour, et j'vîns à penser tch'i' n'y a rein souos l'touannement du solé tchi peut rempliaichi eune bouanne santé - le miyeu don qué L'Bouan Dgieu peut accorder à autcheune pèrsonne.
Comme dans touos les mêtchièrs et vocations, y'a docteurs et docteurs. En Jèrri ou-s-avez la chance d'en aver tchi sont prêts à aller vouos vaie à la maison. Ch'n'est pon d'mème en Améthique. Là (ch'est à dithe dans les villes, i' s'pouorrait qu' ch'est difféthent dans les campangnes, mais j'en doute, car tout l'monde a un moto) quand nou-s-est malade i' faut aller à l'office du docteu. Nou n'gangne pon rein d'lî dithe, quand nou lî donne un coup d'téléphone, à li ou à la janne fille dans s'n office, que l'malade né peut pon gabather. I' vouos ditha Am'nez-lé dans vouot' moto! Si nou lî dit qué l'malade est trop afflyigi pour s'habilyi, i' vouos rêpondra Téléphonez à l'ambulance. Il' îthont lé qu'si et l'am'ner à m'n office!
Quand nou-s-y va, à l'office du docteu, en Améthique, y'en a eune douzaine ou pus à attendre lus tou pour lé vaie. Ch'est comme dans eune maison d'conmèrce en gros. La clinique du docteu a eune démie douzaine d'appartènements. Quand vouot' nom est appelé, nou va dans l'preunmyi et eune belle janne fille en blianche robe vouos met sus la balanche pour enregistrer vouot' paids. Dans l'préchain, eune aut' janne fille vouos met un thermomètre dans l'mûsé. Dans l'préchain, eune aut' prendra vouot' raideu du bras. Jé n'm'en vais pon vouos, dithe tch'est tch'i' s'arrive dans touos l's appartènements - ch'est s'lon tchi sorte d'maladie qu' nou-s-a - mais en fîn d'compte nou trouve lé docteu dans iun, et i' faut lî donner san drouait - il a les rêsultats des visites dans touos l's appartènements d'vant li, et i' connaît san mêtchi. Il a touos l's ôtis tch'i' faut pour vouos dêbouchi l'nez, vouos laver l's ouothelles, vouos êcaler l's ièrs ou vouos coper la gambe! Ou pouvez vouos fier tch'i' s'en va vouos r'faithe si ch'est possibl'ye.
Ayant veu comment qu' ch'la s'fait en Améthique, j'ai 'té frappé par l'humannité et la bouanté dé m'n anmîn tch'est docteu à Aigre, en Charente, en France. I' n'voulait pon passer sa vie dans eune office en ville à londgieu d'jours à tâter l'pouls ès malades. Il aimait mus s'êtablyi dans eune pétite ville et aver cèrtaines heuthes dé consultâtions siez li, et pis visiter les malades siez ieux dans la campangne.
Y'avait dêjà deux docteurs la quand i' s'êtablyit, et il n'avait ieu qu' un malade à souangni à la fîn des preunmié tchînze jours, et trais à la fîn du preunmié mais. À ch't heu, trais-quarts des gens d'la ville et du vaisinné sont ses clients et il a à peine lé temps d'mangni et d'dormi. I' n'est janmais eune niet au liet sans aver à sé l'ver pour aller souangni tchique malade.
Il est sustout l'anmîn et l'soulagement d's anciens. Comme dans bein des pays civilisés, les jannes né restent pon dans la campangne dé La Charente en France. L'agritchultuthe n'est pon assez profitabl'ye pour tch'i' piêssent lus mathier et acater moto, télévision, machinne à laver, etc., tout en mème temps, et il' aiment mus lus en aller travailli dans les villes. I' n'ont pon la pâcienche qué j'avions dans nouot' janne temps et i' veulent touos les conforts dé la vie en lus mathiant. V'la tchi veurt dithe qué la campangne est à ch't heu la d'maine des anciens, et i' faut tch'i' lus souangnent ieux-mèmes en vieillissant. Ch'n'est pon comme quand j'tais mousse à la forge. Dans chu temps-là i' n'y avait prèsque pon un mènage tchi n'avait pon un papa et eune manman ou eune vielle tante à d'meuther auve les jannes. À ch't heu, ch'est l'hôpita pour ieux!
Né v'la où'est qué m'n anmîn l'docteu fait du bein. I' souangne les vièrs dé bouan tchoeu et lus apportent lé soulagement et sustout, l'encouothagement d'continnuer jusqu'au drein soupi dans l'êtat dans tchi qué L'Bouan Dgieu l's a appelés, comme nouos dit La Litourgie. Et ch'est un vraie pliaîsi d'vaie l'souôri sus lus fache quand il arrive siez ieux. Il a mème la r'nommée d'êt' Le Médecin des Vieux! et la chose qué j'admithe acouo l'pus est qu'en d'ssus d'sa bouanté et sa considéthâtion pour l'âge est qu'la maladie, ouaithe qué ch'est la souche dé san gangne pain, l'attriste, et tch'i' n'y a rein tch'i' peut faithe pour arrêter l'mauvais ma tchi tue ses malades dé pus en pus - un ma tch'i' n'y a pon mouoyen d'èrdgéthi à mains tch'il est dêcouvèrt en temps - et acouo - i' faut qué L'Bouan Dgieu y mett' la main!
George d'La Forge
Viyiz étout: