Les Pages Jèrriaises

Ph'lip est ocquo faillyi

Mais i' vit en espéthance

à Portînfé, Saint Ou,
Vendrédi au sé.

Moussieu l'Editeu,

Deus-trais lignes seulement, car j'si ocquo bein faillyi et mes pouores gambes ne prennent pus d'forche. Faut espéther que y'étha un mio d'amendement d'vant long, car ch'est minséthablye d'être comme je si. Le docteu et la nosse mé disent tréjous d'vivre en bouonne espéthance, et j'pense bein que ch'est la seule chose à faithe, mais s'ils avaient mes maladies et mes maux, j'si seux que ch'né s'sait pas la même histouaithe.

Pour ag'ver tout, la Merrienne voudrait m'vaie tchitter à fumer, car oulle a oui que la fum'thie est la pièthe chose pour un homme de m'n âge. Ou m'cite l'exemplye d'san grand'onclye Abraham, tchi crévit d'bèthe à l'âge de chent ans par aver trop bu et fut trouvé mort dans un liet avec la femme d'san vaisin à côté d'li.

Chein que j'me d'mande, Moussieu, ch'est si y'a autchune autre chose qu'ou voudrait m'vaie abandonner si j'tais bête assez d'mettre ma pipe à côté. Eh bein, je n'm'en vais pas l'faithe, et si j'si au liet quand veindra la trompette de Gabriel, i' trouv'thont ma pipe à man côté et non pas la femme d'man vaisin.

J'éthais voulu vos en êcrithe pûs long, Moussieu, mais la chose à faithe ch'est d'avaler un lermin ou deux de tchiquechose tchi m'rêcaûff'tha l'tchoeu, et me mettre au liet. Et, don, à la s'maine tchi veint.

Ph'lip

 

Viyiz étout:


 

Les Pages Jèrriaises