Le Ménage ès Feuvres,
St Ouën.
Lé 8 dé juin, 1974.
Moussieu l'Rédacteu,
Bônsouair, touos m's anmîns en Jèrri ! M'èrvélà parmi vous, et ouaithe qué j'n'ai 'té ichîn qu'eune dgiexaine de jours j'ai dêjà fait chein qu'un Jèrriais, r'vénant d'pâsser eune pause à l'êtrangi, rêve tréjous d'faithe - mangi d'la soupe dé caboche faite par eune Jèrriaise, des nouvelles patates et d'la pihangne ! Du vraie fricot, man bouanhomme ! I' n'y a rein d'miyeu au monde. Combein d'fais qu'jé l'dis ès Améthitchains tch'i' n'savent pon tch'est qué ch'est qué d'la soupe à mains tch'il' en aient mangi en Jèrri faite par eune Jèrriaise. Et comme un tas d'bouannes choses dispathaissent, la Jèrriaise et sa soupe dispathaîtront étout. Y'a sans doute un tas d'gens en Jèrri tchi s'appellent Jèrriais viyant tch'il' ont 'té nés ichîn, mais tch'i' n'sont pon "Jèrriais dans l'âme" comme nou dit. Ch'est pûtôt eune affaithe dé race, n'est-ch' pon ? Si un Chinnouais est né en Jèrri est-i' Jèrriais ?
"As-tu veu du changement ?" les gens m'disent. Eh bein, pon un tas d'pis qué j'tchittis l'Île lé mais d'novembre pâssé. Acouo pus d'maîsons en train d'êt' bâties, et acouo, mains d'vièrs anmîns par les c'mîns. I' s'en vont iun à la fais, et je s'sai beintôt tout seu d'ma sorte, affaithe d'âge, dans ma contrée si j'continnue acouo tchiques années dans l'rang des vivants. Ch'est vrai, quand même, qué ouaithe qué j'mé crai vyi j'en rencontre acouo tchitch'uns d'temps en temps tchi sont pus âgis qu'me. Dînmanche pâssé, par exempl'ye, en compagnie du Docteu L'Maistre et sa damne, j'arrêtis à Gros Nez à pâler au Sieur Fraînque Lé Mèrquand et à sa soeu, Mlle. Eva, tch' étaient dans lus bel à prendre l'air. Deux bouans vièrs Jèrriais dans l'âme, ches'là. Et nouos v'là à en dêclianqu'ter, du Jèrriais des Landes ! Si l'Sieur Edwin Vibert, un aut' charmant vièr St. Ouënais tchi d'meuthe à Gros Nez, avait 'té auve nous dans l'moment, nouos âges additionnées ensembl'ye daivent être dans les 340 ans. Pour mé, ch'est un grand pliaîsi d'pouver r'vaie ches vièrs anmîns d'temps en temps et pâler auve ieux dans l'langage dé nouos anchêtres tch'est si précieux pour nous et tchi s'en va à grands pas.
En pâlant des vièrs anmîns dispathus, v'là tchi ramémouaithe qu'en r'gardant les gâzettes du mais pâssé j'ai veu l'décès du Sieur Albert Durand. Jé l'viyais souvent dans l'Vièr Marchi quand j'tais janne et qu'j'allais vaie m'n anmîn Edwin John ("Jock") Luce à la "Nouvelle Chronique" et jé l'viyais étout au "Green Room Club" quand j'tions à pratitchi pour les séthées d'thiâtre. Dans ches bouans vièrs jours-là nou s'rencontrait souvent dans l'office d'la "Nouvelle Chronique". où'est qu' Maît' Ouoyamme Bisson, l'gérant, présidait driéthe lé conteux auve san gros nièr cat "Prêtro" assis sus l'conteux à ronronner à côté d'li. Lé Sieur Edmond Delaquaine, Rédacteu d'"La Chronique" d'l'aut' but du Vièr Marchi, nouos joingnait souvent pour un p'tit brîn en pâssant.
Dans chu temps-là, l'office dé la "Nouvelle Chronique" 'tait l'rendezvous pour un tas d'pèrsonnes au sanm'di. Ch'tait là qu'les campangnards v'naient payi lus comptes pour objets acatés ès vendues faites par "Le Feuvre Frères" (Phillip John Le Feuvre, Connêtabl'ye d'St. Ouën, et Francis Vibert Le Feuvre, Connêtabl'ye d'St. Pièrre et pus tard Juge), Encanteurs. Et pis certains Connêtabl'yes d'l'Île avaient d's appointements là auve lus pârouaîssiens l'arlévée. Quand j'èrvîns en Jerri en 1946, Moussieu Charles Billot, Connêtabl'ye d'St. Martin dans l'temps, rencontrait acouo d'ses pârouaîssiens à l'office des "Chroniques" près d'"Charing Cross" – successeur des deux "Chroniques" mentionnées souos la présidence, comme rédacteu, dudit Edmond Delaquaine. J'tais êmèrveilli d'vaie qu'eune vielle couôteunme dé mème avait continnué quandi qu' j'avais pâssé pus d'un quart dé siècl'ye à l'êtrangi.
Les changements continnuent. J'pense bein qué l's Assembliées d'Prîncipaux et Officièrs dé pâraisses s'en vont changi d'nom, dépis qu'tout êlecteur s'en va aver l'drouait d'y voter. Ch'est tout au nom du progrès. Et ch'est supposé d'êt' démocratique. Il est bientôt temps qu'tchitch'un m'diche tch'est qu chu mot-là veurt dithe. L's unions des travailleurs aiment à l'faithe sèrvi et i' n'y a rein d'pus autocratique qué ieux. Les Russes lé font sèrvi étout, et lus régînme est absolûment dictateur. Enfin, disons tch'il est temps qu'les prîncipaux d'pâraisses prennent la peine dé lus dênichi au sé à l'av'nîn et assister ès assembliées d'pâraisse, car ch'est seux que souos l'nouvieau régînme touos les malcontents s'en vont s'y trouver et i' pouôrront bein êt' en majorité et présenter des rêsolutions, pus ou mains d'sithabl'yes, tchi pâss'saient manque d'opposition suffisante si n'y a pon d'pèrsonnes responsabl'yes à contré-balanchi.
À la fîn des fîns y'a tchestchion d'bouogi l'estatue d'la Reine Victoria. J'en ai pâlé bein des fais dans mes lettres, et j'félicite lé Député Le Ruez pour aver am'né l'affaithe dévant L's Etats. À m'n idée, sa pliaiche est à la tête dé l'Av'nue Victoria ou dans l'par a côté. Dans touos les cas ché s'sait honteux d'la laîssi où'est qu'oulle est à ch't heu.
George d'La Forge
Viyiz étout: