Ottawa, Ontario,
Cannada.
Lé 15 dé mai, 1976.
Moussieu l'Rédacteu,
M'èrvélà au Cannada, où'est qu' j'arrivis en novembre, 1919, et où'est qué j'restit pour trais ans d'vant m'en aller dans L's Êtats-Unis d'Améthique. Ch'est assez drôle qué quand j'dêpâsse la frontchièthe entre chu pays-là et l'Cannada j'mé sens pus comme si j'tais “siez nous”. Ch'est p't-êt' viyant qué j'vai eune couleu Britannique au haut dé tchiques mâts au Cannada. Lé temps pâssé j'en viyais partout tch'avaient lé “Union Jack” dans la cârre, 'mais à ch't heu qué l'Cannada a adopté la fielle d'érabl'ye comme emblième pour sa couleu nou n'la vait pon tant par les c'mîns, ouaithe qué nou la vait d'temps en temps dans la provînce d'Ontario. Ieune des choses tchi m'fait pliaîsi quand j'sis en Jèrri est d'vaie lé “Union Jack” au haut du mât sus l'Fort Régent. Ch'est la pus belle couleu au monde - et la pus chrêtchienne, car oulle est compôsée des crouaix d'St. George, St. André, St. David et St. Patrice. Mais y'a probabliément un tas d'gens tchi n'l'ont pon rêalisé.
En pâlent d'couleurs, i' m'veint à l'idée tch'i' y'a longtemps qué j'sis à êprouver à pèrsuader tchique Membre d's Êtats dé proposer d'changi la couleu d'Jèrri à chein qu' ou dév'thait être : Les trais léopards dé Nouormandie. La cheinne tch'est au haut du siège du Bailli dans la Chambre d's Êtats est mangnifique. À m'n idée ch'est stupide dé continnuer à appeler la crouaix d'St. Patrice la couleu d'Jèrri quand ch'est en rêalité la couleu Irlandaise. J'avons les trais léopards dé Nouormandie sus nouos sou, sus l'sceau d'nouot' baillage, sus hardi d'nouos timbres et sus nouos dotchûments officiels. Pourtchi pon sus nouot' couleu?
J'veins d'vaie la gâzette dé Jèrri du preunmyi d'avri, et dans la colonne tchi nouos rappelle cèrtains êvènements dé y'a septante-chînq ans j'vai l'accompte du naufrage du stînme Rossgull tchi nouos dit qu' à bâsse-ieau nou viyait l'haut d'ses mâts du phare dé La Corbiéthe. J'm'en r'souveins tout-à-fait bein. Dans chu temps-là ch'tait l'Sieur John d'Aubert, fréthe dé m'n oncl'ye et parrain Fraînque d'Aubert, tch'était chef-gardien du phare, et i' m'emm'nit pâsser san quart auve li dans l'phare pour vaie les mâts du navithe naufragi.
Pus tard, j'pâssis bein d's heuthes dans l'phare quand j'allis d'meuther à La Mouaie siez parrain et marriane d'Aubert. Y'avait trais gardiens pour le phare dans chu temps-là, lé chef-gardien d'Aubert, Mait' Ph'lippe Monamy et un Angliais nommé Torpy. Lé publyi 'tait pèrmîns d'visiter l'phare touos les jours quand le mé 'tait bâsse. Les visiteurs 'taient condîsits jusqu'à la lantèrne au haut du phare par les gardiens, et i' lus donnaient souvent l' “pourboire” (“tip”) en sortant. Il' 'taient supposés d'mett' les sou dans eune bouaîte et pis d'les chârer en portions êgales à la fîn du jour. Ch'tait quand i' iut dispute entre ieux au sujet d'ches sou-là qué l's autorités décidîdrent dé n'pus pèrmettre les visites sans eune pèrmission spéciale.
J'vai tch'i' y'avait un aut' résensement d's habitants d'l'Île dans l'mais d'avri, et j'vai qu'en 1891, année d'ma naîssance, y'avait 54,500 habitants, et qu'en 1971, huiptante ans pus tard, y'en avait 72,600. Combein ch't' année? Et combein tch'i' y'a d'vrais Jèrriais d'restant dans l'Île? Malheutheusement, nou vait pus d'noms Jèrriais dans la colonne des décès qué dans les mathiages et naîssances. Par exempl'ye, dans les naîssances dans la gâzette du preunmyi d'avri, sus quatorze noms i' n'y en a qu' deux tchi sont vrais nom Jèrriais.
J'pense bein qu' eune aut' églyise Anglyicanne s'en va pèrdre san minnistre dépis qu' l'Êvêque dé Winchester a décidé tch'i' faut en mett' trais en r'traite viyant qu' ch'est partie du système décidé pour l'Angliétèrre, à cause du manque dé candidats pour lé minnistéthe. Jé n'vai pon pourtchi freunmer d's églyises en Jèrri viyant tch'i' sont à l'faithe en Angliétèrre, si j'pouvons trouver des minnistres pour les dêssèrvi. J'avais quâsi pensé qué nou dév'thait s'ermett' souos nouot' ancien diocèse dé Coutances, mais i' sont à court dé prêtres en Nouormandie étout. Mais i' dait y'aver des minnistres dé souche Jèrriaise tchi s'saient contents dé v'nîn en Jèrri, et v'la tchi m'fait mal au tchoeu d'vaie l'nombre d'nouos églyises raptichi et l'nombre d's aubèrges grandi!
George d'La Forge
Viyiz étout: