Le Ménage ès Feuvres,
St Ouën
Lé 7 dé juin, 1975
Moussieu l'Rédacteu,
Eh bein, m'y r'vélà acouo eune fais en Jèrri, et ès alentours du Ménage ès Feuvres jé n'vai pon grands changements. Les clios, qu'j'ai connu toute ma vie, sont acouo là. Mais si l'affaithe continnue, les fossées tchi l's entouôthent dispathaîtront. I' s'êcrouôlent dé pus en pus, et pèrsonne né pathaît craithe qué ch'est san d'vé d'les r'léver. Pourtant, nouos anchêtres ont travailli dû à les bâti, ches vièrs fossêes, et nou créthait qu'lus d'scendants éthaient un moi d'ordgi à les prêsèrver quand ch'né s'sait qu'en lus mémouaithe.
Au r'fliéchi, j'pense bein qu'les Jèrriais tchi restent (i' dispathaîssent à grands pas étout, les Jèrriais, comme les vièrs fossés!) ont fort à faithe à gabather pour faithe un mio d'profit sus les fèrmes, et qu'ch'est l'couôtement d'la main d'śuvre tchi l's empêchent dé r'graie ches fossés tchi s'êcrouôlent.
J'vai, auvé pliaîsi, qu'La Bérgéthie en d'vant du gardîn du Ménage èrpathaît comme eune bérgéthie dépis qué l'Sieur Percy L'Masuthi, un moussieu d'esprit génétheux, l'a présentée à la Société Jersiaise à seule fîn, qu'étant la seule bèrgéthie tchi reste întact en Jèrri, ou s'sait prêsèrvée pour tréjous comme monument du temps pâssée. Malheutheusement i' n'y a pus d'brébis à am'ner d'dans pour êt' tondues. Pourtant, i' y'en avait tout pliein dans l'temps d's anciens par les c'mîns. Et dans les touos vièrs temps i' y'en avait tch'avaient quat' (tchiquefais six) cornes sus la tête. Ou n'mé criyiz pon! Eh bein, j'peux vouos en mouontrer la preuve. Ou n'avez qu'à r'garder l'portrait du Vièr Marchi à l'occâsion d'l'assèrmentâtion du Général Cavalier comme Lieutenant-Gouverneux d'l'île en dgiex-sept chent trente-huit. J'ai la chance d'en aver iun pendu dans la salle du Ménage, et les brébis d'ssus ont siex cornes! Ch'est presqu'încriyabl'ye d'nouos jours, mais ch'est absolûment vrai qu'un troupé d'ches brébis-là existait dans les vièrs temps.
En pâlant d'monuments, en allant en ville la statue d'la Reine Victoria est acouo sus la caûchie où'est qu'oulle est assujettie au manque dé respé d'un tas d'pigeons. J'pensais pourtant qu'ou s'en allait êt' transportée à un domicile pèrpétuel dans l'par à côté dé s'n avenue. J'espéthe dé lî vaie d'vant m'en r'aller en Améthique, viyant qué v'la tchi m'fait chose dé la vaie où'est qu'oulle est à ch't heu. J'n'ai janmais oublié qué ch'tait duthant san règne qué j'vis l'jour. Et quand j'tais mousse ichîn à St Ouën, san portrait 'tait dans l'parleux d'toutes les maîsons ès Landes. Dans chu temps-là les gens avaient du respé pour la fanmil'ye Rouoyale, et au c'menchement d'la dgèrre des Boèrs, ch'tait pour lyi qué j'chantions ''God Save the Queen'' dans les rues en marchant à l'êcole, et dans l'êcole étout touos les matîns.
À ch't heu les mousses n'y marchent pon, à l'êcole. Il' y vont en moto ou en beusse, et dans la beusse un tas d'ieux sont affrontés et i' font un catchet abominnabl'ye et i' n'pens'saient pon à donner lus pliaiche à un ancien. Et ch'est d'l'angliaichinn'nie qu'nou ouait. Et tchi grammaithe!
Est-ch' ravissant qu'les gens mé d'mandent si j'vai du changement dans l'Île quand j'èrveins d'hors pays? J'sis oblyigi de rêpondre qu'à m'n idée nouot' chièr Jèrri n'est pus l'Jèrri d'aut' fais. Mais j'aime bein y r'vénîn quand même et dé r'vaie les vièrs anmîns et les accoints, et r'bailli d'ma becque en Jèrriais. Malheutheusement, i' dispathaîssent à grands pas, les vièrs anmîns.
En liêsant les gâzettes du mais tchi veint dé s'pâsser, j'vai qu'les sou d'la trésôr'rie d's Êtats dispathaîssent étout, et qu'à forche d'êprouver, l'Sénateu Cyril Le Merquand a mênagi à faithe les Membres êtreindre lé chabot souos les reues pour ralenti la vitesse du rouôlement d'ches sou, viyant tch'il avaient apprîns l'vièr diton par tchśu tch'i' sont ronds pour rouôler!
Chutte fais ch'est les hanteurs d'aubèrges et les feunmeurs tchi s'en vont aîdgi à remplyi la trésôr'rie d'hèrpîns. Tant mus. Ch'est eunne bouanne source d'èrvenu pour les Êtats, et v'la tchi n'fait pon d'ma à la pouchette du contribuabl'ye à mains tch'i' s'sait ivrouangne. Si un homme peut affaûrder à satisfaithe eune sé pèrpétuelle, deux-s'trais cappeurs dé pus pour ses pîntes dé biéthe né l'mett'ta pon souos l'fou, et l'împot d'extra f'tha du bein au trésor du publyi.
Quand j'èrvîns en Jèrri y'a eune sémaine et que jé c'menchis à liéthe les gâzettes, j'avisis le nom de Mary Poppins. Aha ! j'pensis, né v'la p't-êt' eune janne fille tchi vaut la peine qué j'li faiche la carre! Mais, en liêsant pus liain, j'vai tch'i' y'a des chances qué l's unions des travailleurs né laîss'sont même pon la D'mouaîselle Poppins v'nîn en Jèrri! Quand tchi qu'les Jèrriais s'en vont êt' délivrés du joug des unions ?
George d'La Forge
Viyiz étout: