Le Ménage ès Feuvres,
St. Ouën.
Lé 5 dé juîn, 1976.
Moussieu l'Rédacteu,
Eh bein, m'èrvélà en Jèrri acouo eune fais, et j'sis bein èrconnaîssant d'pouver continnuer à viagi d'mème dans mes vièrs jours. En 1955, quatre ans auprès la fondâtion d'L'Assembliée d'Jèrriais, dé tchi j'eus l'honneu d'êt' membre fondateur et preunmié ségrétaithe, des vèrsets m'fûdrent dêdiés dans san dgiexième bulletîn. Iun des vèrsets disait :-
''Comme j'voudrais r'prendre mes pas
D'aut'fais, ès Landes, là-bas!
Qué j'aim'thais, don, èrvaie
Les Mielles et Les Tchennevais!
Si janmais j'èrfais viage...
J'racate nouot' vièr ménage!
J'y restéthai pouor bouon...
J'sis bein à mème – là don!''
Ch'est assez r'mèrquabl'ye qué partie d'chu vèrset a prouvé prophétique. Né v'la eune vîngtaine d'années d'passées d'pis, et j'ai r'prîns mes pas ès Landes touos l'ans et r'veu Les Mielles et Les Tchennevais, et j'ai racaté l'vièr ménage. Et j'ai 'té bein à mème dé rester d'dans pour bouan. J'l'éthais fait sénon qué v'là tchi m'éthait s'pathé d'ma fanmil'ye tch'est à l'exception dé tchiques couôsîns gèrmains, toute au Cannada et en Améthique.
Sus, l'aut' sens, si j'restais ''pour bouan'' en Améthique jé s'sais s'pathé d'touos m's anmîns en Jèrri. Ch'est en tchi j'ai adopté l'habitude dé pâsser, à tchiquechose près, la maîntchi d'ma vie en Jèrri et l'aut' maîntchi en Améthique. Et, quand j'sis là, j'attends fête d'èrvénîn vaie l's anmîns en Jèrri, et quand veint la St. Miché ou un p'tit pus tard, j'attends fête dé m'en r'aller au bieau solé et la chaleu des êtats au sud d'l'Améthique et r'vaie ma fanmil'ye là-bas. N'est-ch't-i' pon là eune bouanne solution?
Ch'est mangnifique dé pouver r'vénîn mangi des pliats Jèrriais, d'la soupe dé caboche et d'andgulle, des pais au fou, des nouvelles patates, et cétéra. Ouaithe tch'i' faut r'gretter les bouans gros pains fouangnés dans l'fou à côté d'l'âtre, des gâches à fouée et à crétons et bein d'aut' sortes d'gâches dé tchi les jannes d'aniet n'ont probabliément pon ouï pâler, comme par exempl'ye d'la gâche mêlee, d'la gâche dé pâte lévée, d'la grosse gâche et d'la breune gâche. Ou pouvez trouver les r'chettes pour toutes ches gâches dans les bulletîns d'L'Assembliée d'Jèrriais.
Ch'est rare qué nou-s-a des bourdélots et des fliottes à ch't heu, et nou n'vait pon fort dé nièr beurre. Et j'aimethais m'assiéthe en d'vant d'eune pliatelée d'baînis dans lus sau. Nou soulait aller les fliêter dans l'rotchi, souvent l'tou d'La Bouque à L'Êta, au r'nouvé d'vant tch'il' eûssent ouï l'coucou.
Heutheusement, nou-s-a acouo un fricot d'ormèrs dé temps en temps, et y'avait des pihangnes l'année pâssée. J'espéthe tchi s'en va y'en aver acouo tchitch'eunes ch't' année. Et j'avons la chance qué Madanme Fraînque Le Maistre, dé L'Êta, fait des mèrvelles dé temps en temps tchi vouos font l'ieau v'nîn dans la bouoche rein qu' d'y penser.
Enfin, si un tas des d'lices dé la tchuîsinne Jèrriaise ont dispathu un tas des p'tites rues et lus fossés sont acouo là, ès Landes et ichîn l'tou, et ch'est seux qu' mes anchêtres ont aîdgi à les bâti, ches vièrs fossés tchi s'êcroulent graduellement avaû l's années. En ont-i' vressé, ches vièrs anchêtres, par les c'mîns, dé clios en clios, au vrai, à siéthe la tchéthue, m'ner et r'muer les vaques! J'y pense souvent, à ches pouorres vièrs, quand j'mé donne lé pliaîsi d'marchi les rues l'tou du mènage. Et j'pense à mes p'tits jours quand la vie en campangne èrsembliait acouo à la vie d'lus temps sus tèrre.
Les gens m'dîsent acouo: ''Av'-ous veu des changements dépis vouot' dreine visite?'' Mais oui! J'en vai touos les jours. Mais y'en a ieu tant ches dreines années qué nou c'menche à n'y prendre pus d'avis. La chose la pus r'mèrquabl'ye est qué l'bâtissage dé maîsons continnue comme dé pus bé. Quand tchi qué ch'la s'en va arrêter?
I' m'sembl'ye (j'avoue qué jé n'sis p't-êt' pon assez au couothant d's affaithes en Jèrri pour en jugi comme i' faut) qué l's ouvrièrs tchi veinnent dé l'êtrangi travailli à mettre ches nouvieaux bâtisses à haut finnissent par rester à d'meuther en Jèrri, et qué v'la tch'augmente la nécessité d'continnuer à bâti d'aut' maîsons pour les louogi. Est-che tch'l' n'y a pon mouoyen pour nous Êtats d'empêchi l'agrandissement d'la population d'l'ile?
GEORGE D'LA FORGE
Viyiz étout: