Le Ménage ès Feuvres
St Ouën
Le 30 mai 1970
Moussieu l'Rédacteu,
Eh bien, bouannes gens, m'y r'vélà en Jèrri! Châque êté, quand j'y r'veins, j'mé d'mande “Est-che la dreine fais?” viyant qu'à m'n âge i' faut qu'nou s'attende qué y'a telle chose, qu'eune dreine fais, mais L'Bouan Dgieu m'a accordé l'privilège dé r'vénîn acouo ch't année, et v'la tchi m'encouothage à espéther qu'ou n's'en va pon êt' la dreine!
I' faut aver eune vielle réchinne dé Gris-Ventre pour comprendre l'amour qué j'ai tréjous ieu pour men Île natale et l'ordgi d'êt' Nouormand d'race! Quand j'sis en Améthique les gens m'disent: “Pourtchi dgiatre qu'ou voulez vous en r'aller dans chutte pétite île-là touos l's êtés d'même? J'avons tout ch'tch'i' faut ichîn en Améthique, et autant d'bieauté d'pays comme nou peut trouver dans l'monde entchi! “ “Et bein véthe” j'lus dis, “Ch'est vrai qu'L'Améthique est un bieau pays, et qué dans sa grande êtendue nou peut trouver toutes les saisons d'l'année, et qué du point d'veue géographique nou peut dithe que toutes les régions d'la terre - pliaines, vallées, forêts, montangnes, d'sèrts, riviéthes et gorges – s'y trouvent, mème les belles grèves. La grève lé long dé Fort Lauderdale, en Floride, par exempl'ye, où'est qué j'vais nouer en hiver, a eune vîngtaine ou pus d'milles dé bieau blianc sablion, mais ouaithe qué nou n'peut pon sénon admither touos ches avantages-là, et, i' faut l'admettre, en profiter quandi qu'nou peut, y'a tchiquechose dans l'sang d'un Jèrriais tchi lî nouôrrit tellement la mémouaithe dé ses p'tits jours dans s'n Île natale, qué l'bonheur d'y r'vénîn est comme un gout d'y r'va-s-y!
Et ch'la s'comprend: L's esprits d's anchêtres sont par les c'mîns quand nou marche les rues dans la campangne. Le Ménage - où'est qué j'sis à grifouoilli chutte lettre ichîn, a 'té l'hant des meins pour trais chents ans, et il' ont cèrtainement aîdgi à bâti les vièrs fossés ès alentours tchi, malheutheusement, s'êcroûlent un mio à la fais et pèrsonne né pathaît penser qu'ch'est san d'vé d'les rhabilyi et r'mett' les vielles pièrres en pliaiche. S'i' pouvaient r'vénîn, les pouôrres vièrs, en vèrraient-i' des changements! Pouv'ous vous înmaginner lus êtonnement, étout, quand il' éthaient à pâler à eune douzaine ou pus d'pèrsonnes par les c'mîns dévant en trouver ieune tchi comprendrait lus vielle langue matèrnelle? Et quand i' vèrraient toutes ches maîsons d'papi mâchi tchi craîssent comme d'la sèrcl'ye partout dans les campangnes, i' sé d'mand'daient pour tch'est tch'i' n'sont pon bâties en bieau granit du pays comme aut' fais!
Par la f'nétre d'ma chambre ichîn dans l'Ménage, j'vai la maîson d'La Forge où'est qué j'fus né. V'là tchi fait mes pensées r'tchuler eune septantaine d'années à mes p'tits jours dans la forge où'est qué j'passis tant d'heuthes comme mousse auve man p'pèe et Papa. J'voudrais-t-i' pouver r'vaie ches bieaux jours-là d'ma jannèche. J'n'avais qu'dgiex ans quand i' s'en fut à la Côte, man p'pée, et Papa et Manman avaient grand r'gret dé l'vaie s'y en aller et i' n'mé laîssîdrent pon m'en aller auve li, et i' gardîdrent man fréthe Fraînque étout. Mes fréthes Sydney et John Giffard lus en fûdrent auve p'pée et m'mée, et Papa dit : “S'i' sont naûfragis en mé, y'en étha tréjous deux d'sauvés par aver resté en Jèrri!”
Sans doute, j'tais heutheux auve Papa et Manman. J'm'èrsouveins si bein des vaîsîns tchi v'naient à la forge aver lus j'vaux féthés, et dé l'atmosphéthe dans la forge, et pour mé, mousse, y'avait un air dé mystéthe dédans - et d's odeurs qué j'n'oublyie pon auve lé passage du temps - l'odeu d'acrîn du tchèrbon et d'l'acrîn tchi sortait dé d'dans la toube à ieau quand Papa y m'ttait l'fé et l'acyi tout rouoge pour les tremper. Y'avait eune ligiéthe feunmée un mio partout. L'odeu d'brûlîn d'cône dé j'va vouos frappait en entrant. Oulle y restait tréjous car ch'tait bein des fais par jour que Papa m'ttait l'fé caud contre la corne pour l'ajuster à la forme du chabot du j'va dévant l'cliouer en pliaiche. Et j'm'èrsouveins des tchians du vaîsinné tchi v'naient miâtchi les mios d'corne tch'i' copait pour apprêter l'chabot et tchi tchilyaient dans l'aithe et dans san bosc a féther. All'ous m'dithe que j'avaiseune drôle d'idée au sujet d'eune bouanne odeu quand j'vouos dis que j'aimethais bein r'senti chette-là à ch't heu? P't êt' bein, mais j'vouos asseûthe qué pour mé, ché s'sait d'l'ieau d'Colongne compathée à l'odeu d'êcappe dé pétrole brûlée qu'nou sent par les c'mîns à ch't heu!
Nou n'peut quand mème pon r'vivre dans l'temps passé, et L'Caticème dans La Litourgie, tch'i' fallait apprendre par tchoeu quand j'allais a L'Êcole du Dînmanche à St. George dans chu temps-là, nouos dit tch'i' faut faithe san d'vé dans l'êtat dans tchi il a pliu à Dgieu d'vouos appeler dans chutte vie. J'n'ai janmais oublyiyé les bouannes léçons qu nou-s-apprannait a l'églyise, et j'sis r'connaîssant d'être - acouothe eune fais - dans l'vaîsinné où'est qué j'vis l'jour la preunmié fais, et parmi mes bouans anmîns en Jèrri!
George d'La Forge
Viyiz étout: